ក្រុមហ៊ុនផលិតរបស់ចិនកំពុងជួបផលវិបាកក្នុងការនាំចេញផលិតផល ដោយសារវិបត្តិសង្គ្រាមនៅអ៊ុយក្រែន

រដ្ឋមន្ត្រីក្រសួងពាណិជ្ជកម្មចិន លោក Wang Wentao បាននិយាយថា ប្រទេសចិនកំពុងសង្ឃឹមថានឹង លើកកម្ពស់ពាណិជ្ជកម្មរបស់ខ្លួនជាមួយរុស្ស៊ី និងអ៊ុយក្រែនបន្ថែមទៀត ដោយទីក្រុងប៉េកាំងនៅតែព្យាយាមដើរលើខ្សែបន្ទាត់ការទូតរវាងទីក្រុងម៉ូស្គូ និងទីក្រុងកៀវ។

បើទោះបីជា ចិនហាក់បង្ហាញថា ខ្លួននឹងនៅតែបន្តរកស៊ីជាមួយរុស្ស៊ី និងអ៊ុយក្រែនក៏ពិតមែន តែក្រុមហ៊ុនផលិតធំៗក្នុងប្រទេសចិន បានឱ្យដឹងថា អាជីវកម្មរបស់ពួកគេជាមួយអ៊ុយក្រែន និងរុស្ស៊ីត្រូវបានប៉ះពាល់ដោយផ្ទាល់ ពោលគឺបាត់បង់ទំនាក់ទំនងជាមួយអតិថិជន ហើយអតិថិជនមិនចង់បង់ប្រាក់នោះទេ និងទាមទារក្រុមហ៊ុនទាំងនោះប្រគល់ទំនិញទាំងអស់ក្នុងពេលតែមួយ ព្រោះប្រាក់រូប្លរបស់រុស្ស៊ីត្រូវបានធ្លាក់ថ្លៃយ៉ាងកំហុកនៅក្រោយពេលផ្ទុះសង្គ្រាមនៅអ៊ុយក្រែន ដោយសារតែរងសម្ពាធផ្នែកសេដ្ឋកិច្ចពីលោកខាងលិច។

យ៉ាងណាមិញ ទោះចង់ឬមិនចង់ វាប្រាកដណាស់ថា អ្នកប្រើប្រាស់នៅក្នុងប្រទេសរុស្ស៊ី និងនៅអ៊ុយក្រែននឹងបាត់បង់អំណាចទិញរបស់ពួកគេសម្រាប់រយៈពេលវែងឆ្ងាយ ដោយសារតែវិបត្តិដែលបង្កឡើងដោយសង្រ្គាមមួយនេះ។ 

ប្រទេសចិន គឺជាដៃគូពាណិជ្ជកម្មដ៏ធំបំផុតរបស់ទាំងរុស្ស៊ី និងអ៊ុយក្រែន ហើយប្រទេសចិនក៏មានការវិនិយោគ និងផលប្រយោជន៍ពាណិជ្ជកម្មយ៉ាងទូលំទូលាយនៅក្នុងតំបន់នានានៃប្រទេសអ៊ុយក្រែន នោះរាប់បញ្ចូលទាំងការវិនិយោគធំៗដោយក្រុមហ៊ុនដឹកជញ្ជូន និងពាណិជ្ជកម្មរបស់រដ្ឋរបស់ចិននៅកំពង់ផែតាមតំបន់សមុទ្រខ្មៅ ដែលត្រូវបានរងផលប៉ះពាល់ដោយផ្ទាល់ដោយការប្រយុទ្ធគ្នាយ៉ាងខ្លាំងក្លារវាងកងទ័ពរុស្ស៊ី និងអ៊ុយក្រែន។

គួរឱ្យកត់សម្គាល់ថា ស្របពេលដែលរុស្ស៊ីរងទណ្ឌកម្មសេដ្ឋកិច្ច ហើយធ្វើឱ្យប្រាក់រូប្លរបស់រុស្ស៊ីធ្លាក់ចុះខ្លាំង គេមើលឃើញថា ប្រាក់យន់របស់ចិនឯណេះវិញ បានរក្សាភាពរឹងមាំនាពេលថ្មីៗនេះ និងឈរនៅកម្រិតសុវត្ថិភាពល្អប្រសើរ ទោះបីជាមានភាពចលាចលផ្នែកហិរញ្ញវត្ថុខ្លះៗក៏ដោយ។

ស្របពេលដែលមានការដាក់ទណ្ឌកម្មផ្នែកហិរញ្ញវត្ថុរបស់សហរដ្ឋអាមេរិក និងចក្រភពអង់គ្លេសប្រឆាំងនឹងប្រទេសរុស្ស៊ី គេរំពឹងថា នឹងនាំឱ្យមានការកើនឡើងនៃបរិមាណប្រតិបត្តិការប្រាក់យន់ កាន់តែច្រើនឡើងថែមទៀត នៅក្នុងទាក់ទងនឹងពាណិជ្ជកម្មរវាងរុស្ស៊ី-ចិន។ ហើយកត្តានេះ គឺជាហេតុផលមួយនឹងបន្ដជួយឲ្យប្រាក់យន់នៅតែបន្ដភាពរឹងមាំ ប៉ុន្តែនៅពេលតម្លៃប្រាក់យន់មានខ្ពស់ វាក៏ជាដំណឹងអាក្រក់មួយ សម្រាប់វិស័យនាំចេញរបស់ប្រទេសចិនផងដែរ៕ 

អត្ថបទ ស៊ើង និមល់