លោក ហួន សុរង្សី ប្រធាននាយកដ្ឋានកិច្ចការសិប្បកម្ម នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ជឿជាក់ថា អំបិលកំពត និងកែបនឹងមានទីផ្សារកាន់តែល្អប្រសើរ ប្រសិនបើបានចុះបញ្ជីជាទំនិញសម្គាល់ភូមិសាស្ត្រ។ លើសពីនេះ ការចុះបញ្ជី GI នេះ ក៏នឹងជួយជំរុញកំណើនផលិតកម្មអំបិល ដែលកំពុងមានការថយចុះឲ្យមានការកើនឡើងវិញ ក៏ដូចជាជំរុញឲ្យអំបិលកម្ពុជាអាចហក់ចូលទីផ្សារអន្តរជាតិផងដែរ។ បច្ចុប្បន្នក្រសួងឧស្សាហកម្ម និងក្រសួងសេដ្ឋកិច្ច និងហិរញ្ញវត្ថុកំពុងធ្វើការរួមគ្នា ដើម្បីដាក់ចេញយន្តការលើកទឹកចិត្តដល់អ្នកផលិត ដើម្បីជំរុញការផលិតអំបិលនៅកម្ពុជា។
មិនខុសគ្នាលោក ហួន សុរង្សី នោះទេលោក ប៊ុន យោង ប្រធានមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍រំពឹងថា ប្រសិនបើអំបិលខេត្តកែបអាចចុះក្នុងបញ្ជីផលិតផលសម្គាល់ភូមិសាស្ត្រ វានឹងជួយជំរុញតម្លៃអំបិល ដែលផលិតបាននៅខេត្តកែបនឹងមានតម្លៃខ្ពស់ជាងពេលបច្ចុប្បន្ន ហើយផលិតករនឹងទទួលបានប្រាក់ចំណេញច្រើនជាងមុន។
គួរបញ្ជាក់ថា ក្រសួងពាណិជ្ជកម្ម និងភាគីពាក់ព័ន្ធកំពុងរៀបចំនីតិវិធី ដើម្បីចុះបញ្ជីអំបិលកំពត និងកែបជាផលិតផលសម្គាល់ភូមិសាស្ត្រ ដើម្បីអភិរក្ស និងជំរុញកំណើនផលិតកម្មអំបិលនៅកម្ពុជាឲ្យកាន់តែល្អប្រសើរ។
អត្ថបទគួរអាន
យើងសង្កេតឃើញថា ការផលិតអំបិលនៅប៉ុន្មានឆ្នាំចុងក្រោយមានការធ្លាក់ចុះគួរឲ្យកត់សម្គាល់ ដែលបង្ខំឲ្យកម្ពុជាត្រូវនាំចូលអំបិលពីក្រៅប្រទេសដើម្បីបំពេញតម្រូវការប្រើប្រាស់ក្នុងស្រុក។ ការធ្លាក់ចុះទិន្នផលអំបិលនៅកម្ពុជានេះ ត្រូវបានមន្ត្រីជំនាញនៃក្រសួងឧស្សាហកម្មអះអាងថា គឺបណ្តាលមកពីបញ្ហាអាកាសធាតុ គួបផ្សំប្រជាពលរដ្ឋមួយចំនួនបានបោះបង់ការផលិត ក្រោយជួបបញ្ហាខ្វះដើមទុន និងខ្វះអ្នកស្នងតំណែងបន្តពីអ្នកផលិតដែលមានវ័យចាស់ជរា។ ជាក់ស្តែងកាលពីឆ្នាំ២០២២ កន្លងទៅកម្ពុជាផលិតអំបិលបានតែប្រមាណ៤ម៉ឺនតោនប៉ុណ្ណោះធ្លាក់ចុះ៧០% បើធៀបនឹងឆ្នាំមុន ខណៈកម្ពុជាមានតម្រូវការអំបិលសម្រាប់ប្រើប្រាស់ក្នុងរង្វង់១០ម៉ឺនតោនឯណោះ។ កាលពីឆ្នាំមុនកម្ពុជាបាននាំចូលអំបិលពីឥណ្ឌាចំនួន១ម៉ឺន៦ពាន់តោន ដើម្បីបម្រុងទុក និងបំពេញតម្រូវការប្រើប្រាស់ក្នុងស្រុក។ បច្ចុប្បន្នកម្ពុជាមានផ្ទៃដីផលិតអំបិលប្រមាណ៤ពាន់៥៧៧ហិកតា៕
