អ្នកជំនាញក្នុងវិស័យសេដ្ឋកិច្ច ចាត់ទុកកម្រិតអតិផរណាជាង៦% នៅឆមាសទី១ ឆ្នាំនេះ ជាកម្រិតមួយខ្ពស់ និងគួរឲ្យព្រួយបារម្ភ ដែលទាមទារឲ្យរាជរដ្ឋាភិបាល ក្រសួងស្ថាប័នពាក់ព័ន្ធត្រូវយកចិត្តទុកដាក់ខ្ពស់ក្នុងការទប់ស្កាត់ និងដោះស្រាយ។ សម្រាប់អ្នកជំនាញអតិផរណាក្នុងកម្រិតនេះ អាចរុញច្រានឲ្យប្រជាពលរដ្ឋមានប្រាក់ចំណូលថេរ ឬទាប ធ្លាក់ក្រោមបន្ទាត់នៃភាពក្រីក្រ។ ទោះយ៉ាងណា អ្នកជំនាញមិនលើកទឹកចិត្តឲ្យរាជរដ្ឋាភិបាលមានការដំឡើងអត្រាការប្រាក់ ដើម្បីទប់ទល់នឹងការកើនឡើងអតិផរណានេះនោះទេ។
របាយការណ៍ប្រចាំឆមាសទី១របស់ធនាគារជាតិ នៃកម្ពុជា បានបង្ហាញឲ្យឃើញថា អតិផរណារួមជាមធ្យមរបស់កម្ពុជាបានកើនឡើងដល់កម្រិត៦,៥% នៅឆមាសទី១ឆ្នាំ២០២២ កើនឡើង២,៥% បើធៀបនឹងឆមាសទី១ និងកើន៣,៤% បើធៀបនឹងឆមាសទី២កាលពីឆ្នាំ២០២១។ ការកើនឡើងអតិផរណានេះ ត្រូវបានធនាគារជាតិនៃកម្ពុជាវាយតម្លៃថា គឺបណ្តាលមកពីការកើនឡើងតម្លៃប្រេងឥន្ធនៈ និងការរអាក់រអួលខ្សែច្រវាក់ផ្គត់ផ្គង់សកល ដែលបង្កឡើងដោយសង្គ្រាមរវាងរុស្ស៊ី និងអ៊ុយក្រែន និងការឆ្លងរាតត្បាតនៃជំងឺកូវីដ-១៩។ ការកើនឡើងតម្រូវការក្នុងស្រុកក្រោយស្ថានភាពជំងឺកូវីដ-១៩ មានភាពធូរស្បើយ ក៏កត្តារួមចំណែកមួយផងដែរ។
ពាក់ព័ន្ធការកើនឡើងកម្រិតអតិផរណានៅកម្ពុជានេះ លោកបណ្ឌិត ឆេង គឹមឡុង នាយកមជ្ឈមណ្ឌលនវានុវត្តន៍ផ្នែកអភិបាលកិច្ច និងប្រជាធិបតេយ្យ នៃវិទ្យាស្ថានចក្ខុវិស័យអាស៊ីយល់ឃើញថា ការកើនឡើងកម្រិតអតិផរណាចន្លោះពី៥%ទៅ៧% ក្នុងមួយខែរបស់កម្ពុជានៅមួយរយៈចុងក្រោយនេះ ជាកម្រិតមួយខ្ពស់ដែលទាមទារឲ្យមានការយកចិត្តទុកដាក់ខ្ពស់ពីរាជរដ្ឋាភិបាល។ លោកបណ្ឌិត ឆេង គឹមឡុងយល់ថា អតិផរណាក្នុងកម្រិតនេះវាអាចធ្វើឲ្យប៉ះពាល់ជាអវិជ្ជមានដល់វីភាពរបស់ប្រជាពលរដ្ឋ ជាពិសេសវាអាចរុញច្រានឲ្យប្រជាពលរដ្ឋ ដែលមានប្រាក់ចំណូលថេរ ឬទាបធ្លាក់ក្រោមបន្ទាត់នៃភាពក្រីក្រ ឬលើបន្ទាត់នៃភាពក្រីក្រតិចតួច ដែលបង្កឡើងដោយការកើនឡើងតម្លៃទំនិញ។
សម្រាប់លោកបណ្ឌិត ឆេង គឹមឡុង មិនមែនមានតែកម្ពុជានោះទេ ដែលជួបប្រទះបញ្ហាការកើនឡើងអតិផរណា សូម្បីប្រទេសផ្សេងៗនៅសហគមន៍ ជាពិសេសប្រទេសមានសេដ្ឋកិច្ចរីកចម្រើន ក៏កំពុងឈឺក្បាលវិលមុខជាមួយបញ្ហានៃការកើនឡើងកម្រិតអតិផរណានេះដែរ។ យ៉ាងណាលោកបណ្ឌិតអះអាងថា កម្រិតអតិផរណានៅកម្ពុជាអាចខ្ពស់ជាងប្រទេសមួយចំនួននៅក្នុងតំបន់ តែក៏មានប្រទេសខ្លះមានកម្រិតអតិផរណាខ្ពស់ជាងកម្ពុជាផងដែរ។ ដើម្បីទប់ទល់នឹងការកើនឡើងកម្រិតអតិផរណានេះ ធនាគារកណ្តាលរបស់ប្រទេសមួយចំនួននៅតំបន់អាស៊ី និងនៅសហភាពអឺរ៉ុបបាននាំគ្នាដំឡើងអត្រាការប្រាក់ ដើម្បីស្តារស្ថានការណ៍ដ៏អាក្រក់ ដែលបណ្តាលមកពីការកើនឡើងអតិផរណារបស់ខ្លួន។
អត្ថបទគួរអាន
ក៏ប៉ុន្ដែ សម្រាប់ទស្សនៈរបស់លោកបណ្ឌិត ឆេង គឹមឡុង គឺលោកមិនលើកទឹកចិត្តឲ្យកម្ពុជាអនុវត្តវិធានការស្តារកម្រិតអតិផរណាតាមរយៈការដំឡើងអត្រាការប្រាក់នោះទេ ដ្បិតវាអាចធ្វើឲ្យប៉ះពាល់ដល់អ្នកប្រកបអាជីវកម្ម ក្នុងវិស័យសហគ្រាសធុនតូច និងធម្យម ដែលមានតម្រូវការឥណទាន សម្រាប់ទ្រទ្រង់ដំណើរការអាជីវកម្មរបស់ខ្លួន។ អ្នកជំនាញសេដ្ឋកិច្ចរូបនេះ សង្កត់ធ្ងន់ថា រដ្ឋគួររក្សាស្ថិរភាពអត្រាការប្រាក់តាមគោលនយោបាយ ដែលដាក់ចេញដោយធនាគារជាតិ និងជំរុញលើកទឹកចិត្តឲ្យមានការផ្តល់អត្រាការប្រាក់សមល្មមដល់វិស័យសក្តានុពល ដើម្បីបង្កើនភាពទាក់ទាញ និងប្រកួតប្រជែង។
ជាមួយគ្នានេះ លោកបណ្ឌិត គី សិរីវឌ្ឍ អ្នកស្រាវជ្រាវសេដ្ឋកិច្ច និងជាប្រធានមជ្ឈមណ្ឌលសិក្សាចិន នៃរាជ្យបណ្ឌិតសភាកម្ពុជា យល់ឃើញថា កម្រិតអតិផរណារបស់កម្ពុជា មានកំណើនប្រហាក់ប្រហែលនឹងប្រទេសមួយចំនួនក្នុងតំបន់ បើទោះបីតម្លៃប្រេងឥន្ធនៈនៅកម្ពុជាអាចខ្ពស់ជាងប្រទេសមួយចំនួនក៏ដោយ។លោកបណ្ឌិត គី សិរីវឌ្ឍ ពន្យល់ថា កម្រិតអតិផរណា គេមិនវាយតម្លៃលើតម្លៃប្រេងឥន្ធនៈនោះទេ ប៉ុន្ដែគេវាយតម្លៃលើអត្រានៃការកើនឡើងតម្លៃប្រេងឥន្ធនៈ ហើយក្នុងនោះ វាជារឿងមួយល្អដែរសម្រាប់កម្ពុជា ដោយសារមានការជួយជ្រោមជ្រែងពីរាជរដ្ឋាភិបាលបានធ្វើឲ្យអត្រានៃការកើនឡើងតម្លៃប្រេងឥន្ធនៈ មានភាពយឺតយ៉ាវជាងប្រទេសមួយចំនួននៅក្នុងតំបន់។
អ្នកជំនាញរូបនេះ អះអាងថា ការដំឡើងអត្រាការប្រាក់មិនមែនជាវិធីសាស្ត្រល្អក្នុងការកាត់បន្ថយអត្រាអតិផរណានោះទេ ពោលគឺមានតែការបន្ទាបអត្រាការប្រាក់ប៉ុណ្ណោះ ដែលជាយុទ្ធសាស្ត្រល្អក្នុងការរក្សាលំនឹង និងកាត់អត្រាអតិផរណា។ ប៉ុន្តែ សម្រាប់កម្ពុជាលោកបណ្ឌិតយល់ថា ការរក្សាស្ថានភាពអត្រាការប្រាក់ដូចបច្ចុប្បន្នជាការល្អ។
ធនាគារជាតិ នៃកម្ពុជាបានព្យាករណ៍ថា កម្រិតអតិផរណារបស់កម្ពុជានៅឆមាសទី២នឹងមានការថយចុះមកវិញនៅក្នុងកម្រិតជាមធ្យមប្រមាណ៣,២% ប្រសិនបើសម្ពាធនៃការឡើងថ្លៃតម្លៃប្រេងឥន្ធនៈអាចគ្រប់គ្រងបាន ឬត្រូវបានកាត់បន្ថយ។ ជារួមស្ថានភាពអតិផរណានៅឆមាសទី២កើន ឬចុះ វាអាស្រ័យលើវិបត្តិសង្គ្រាមនៅអ៊ុយក្រែន និងខ្សែចង្វាក់ផ្គត់ផ្គង់សកលមានភាពធូរស្បើយ ឬក៏នៅបន្តតានតឹង។ ជាមួយគ្នានេះធនាគារជាតិនៃកម្ពុជាព្យាករណ៍ស្ថានភាពអតិផរណាពេញមួយឆ្នាំ២០២២ របស់កម្ពុជានឹងមានក្នុងកម្រិតជាមធ្យមប្រមាណ ៤,៨%។
ការព្យាករណ៍នេះត្រូវបានធ្វើឡើងក្រោមការសន្មតថា ថ្លៃក្រុមទំនិញ និងសេវាកម្មពាក់ព័ន្ធនឹងប្រេងឥន្ធនៈមានការថមថយពី១៨,២% មកនៅត្រឹម៩,៣% ក្រោយរំពឹងថាតម្លៃប្រេងឆៅសកលនឹងថមថយចាប់ពីខែកក្កដា ដល់ចុងឆ្នាំ២០២២ ហើយតម្លៃម្ហូបអាហារថយចុះពី៥,៥% មកនៅត្រឹម២,៥% ក្រោយរំពឹងខ្សែចង្វាក់ផ្គត់ផ្គង់មានភាពល្អប្រសើរនៅពេលចិនមានការបន្ធូរបន្ថយលើការរឹតត្បិតកូវីដ-១៩ គួបផ្សំទិន្នផលកសិកម្មរដូវវស្សាមានភាពប្រសើរ និងការថយចុះតម្លៃប្រេងឥន្ធនៈ និងអតិផរណាស្នូលថមថយពី ៤,៩% មកនៅត្រឹម២,៦% ក្រោយតម្រូវការក្នុងស្រុកធ្លាក់ចុះ៕
