បន្ទាប់ពីរាជរដ្ឋាភិបាលអនុញ្ញាតឲ្យបើកដំណើរការអាជីវកម្មទេសចរឡើងវិញ ក្រោយព្រឹត្តការណ៍ ៣វិច្ឆិកា បានបិទបញ្ចប់ អ្នកជំនាញនៅក្នុងវិស័យទេសចរណ៍ លោក ស្រីឆាយ ស៊ីវលីន ប្រធានសមាគមភ្នាក់ងារទេសចរណ៍កម្ពុជាបានគូសបញ្ជាក់ថា សកម្មភាពទេសចរណ៍បាននឹងកំពុងចាប់ផ្តើមរំកិលទៅរកភាពល្អប្រសើរឡើងវិញបន្តិចហើយ ក្រោយពីព្រឹត្តិការណ៍៣ វិច្ឆិកាឆ្លងផុតដោយជោគជ័យ។
លោកស្រីបញ្ជាក់ថា ក្រោយពីកម្ពុជាឆ្លងផុតព្រឹត្តិការណ៍ ៣វិច្ឆិកា រួចហើយយើងពិតជាមានក្តីរំពឹងឡើងវិញថា អាចនឹងមានការចេញធ្វើដំណើរកម្សាន្តរបស់ភ្ញៀវទេសចរក្នុងស្រុក ហើយវិស័យទេសចរណ៍នឹងប្រសើរឡើងវិញទៅតាមនោះដែរ ប៉ុន្តែភ្លាមៗនេះក៏មិនមានសន្ទុះភ្ញៀវកើនឡើងខ្លាំងក្លាដូចពេលធម្មតានោះដែរ ខណៈជំងឺកូវីដ មិនទាន់បិទបញ្ចប់ទៅវិញនោះ។
អត្ថបទទាក់ទង!
លោកស្រីបន្តថា «យើងពិតជាមានក្តីរំខ្ពស់ថា នឹងមានភ្ញៀវទេសចរក្នុងស្រុកកើនឡើងវិញខ្លាំងពិសេសនៅក្នុងឳកាសពិធីឈប់សម្រាកឆ្លងឆ្នាំសាកល ២០២០ ចូលឆ្នាំ ២០២១ខាងមុខ តំបន់ដែលជាទិសដៅទេសរណ៍នៅតែជាតំបន់សមុទ្រ កោះ និងតំបន់ភាគឥសា ឦសានប្រទេសប្រាកដជានឹងមានភ្ញៀវទេសចរក្នុងស្រុកសម្រុកទៅលេងកម្សាន្ដច្រើននៅទីនោះ ។
តាមរបាយការណ៍ក្រសួងទេសចរណ៍ ក្នុងរយៈពេល៩ខែ ឆ្នាំ២០២០ទេសចរអន្តរជាតិមកទស្សនាកម្ពុជាមានជាង ១លាននាក់ ថយចុះ ៧៤ ភាគរយ និងទទួលបានទេសចរផ្ទៃក្នុង ជាង៧លាននាក់ ថយចុះ ៥១ភាគរយ ដែលការថយចុះនេះ គឺដោយសាររងផលប៉ះពាល់ខ្លាំងពីវិបត្តិជំងឺកូវីដ-១៩។
ក្នុងដំណាក់កាលវិបត្តិកូវីដ-១៩ ចាប់ពីខែមេសា ដល់ខែកញ្ញា និន្នាការទេសចរណ៍មានការប្រែប្រួលយ៉ាងខ្លាំង ជាក់ស្ដែង ទេសចរសម្រាកលំហែកម្សាន្តមាន ៤៣ ភាគរយ ទេសចរធុរកិច្ច និងការទូតមានជាង ៥៤ភាគរយ និងផ្សេងៗមានជាង ២ភាគរយ។
តាមការព្យាកររបស់ក្រសួងទេសចរណ៍ ឆ្នាំ២០២០ កម្ពុជានឹងទទួលទេសចរផ្ទៃក្នុងបានប្រមាណ ៩លាននាក់ ថយចុះ ២០ភាគរយ ធៀបនឹងឆ្នាំ២០១៩ ខណៈទេសចរផ្ទៃក្នុងនឹងវិលមកប្រក្រតីភាពឡើងវិញក្នុងរយៈពេល ៣ឆ្នាំ ពោលគឺឆ្នាំ២០២៣ កម្ពុជានឹងទទួលបាន ១១លាននាក់៕
None
