បន្ទាប់ពីឈប់រៀន លោក Mark Zuckerberg បានបង្កើតនិងអភិវឌ្ឍ Facebook រហូតដល់សព្វថ្ងៃ ក្លាយជាបណ្ដាញសង្គមដែលមានអ្នកប្រើប្រាស់រាប់ពាន់លាននាក់ និងរកចំណូលបានរាប់ពាន់លានដុល្លារមួយឆ្នាំៗ។
ឥឡូវនេះ ជាង ១២ឆ្នាំក្រោយ Mark Zuckerberg ទទួលបានសញ្ញាបត្រកិត្តិយសពីសកលវិទ្យាល័យ Harvard University ហើយ។ Zuckerberg សរសេរនៅលើហ្វេសប៊ុកថា ៖ «អ្នកម៉ាក់, កូនតែងប្រាប់ម៉ាក់ហើយថា កូននឹងត្រឡប់ទៅយកសញ្ញាបត្រវិញឲ្យបាន»។
Mark Zuckerberg (ម៉ាក ហ្សាក់ឃើប៊ើគ) ជាមហាសេដ្ឋីមួយរូបក្នុងចំណោមមហាសេដ្ឋីជាច្រើនរូប ដែលសុទ្ធសឹងជាអ្នករត់ចោលការសិក្សានៅថ្នាក់សកលវិទ្យាល័យ ទៅបង្កើតក្រុមហ៊ុនបច្ចេកវិទ្យា តួយ៉ាង លោក ប៊ីល ហ្គេតស៍ (Bill Gates) ស្ថាបនិកក្រុមហ៊ុន Microsoft និង លោក ស្ទីវ ចបស៍ (Steve Jobs) ស្ថាបនិកក្រុមហ៊ុន Apple ជាដើម។
លោក ហ្សាក់ឃើប៊ើគ បានសញ្ញាបត្រក្នុងរយៈពេល ១២ឆ្នាំបន្ទាប់ពីចាកចោលសាលា គឺឆាប់ជាងលោក ប៊ីល ហ្គេតស៍ ដែលឈប់រៀនទៅបង្កើត Microsoft នៅឆ្នាំ១៩៧៥ ហើយទើបទទួលសញ្ញាបត្រពី Harvard University នៅឆ្នាំ២០០៧ គឺអស់រយៈពេល ៣២ឆ្នាំទើបបាន៕
