បើតាមរបាយការណ៍បានឲ្យដឹងថា ចំណូលពន្ធដារ នៅ៦ខែដំបូងនៅឆ្នាំនេះ ប្រមូលបានដល់ទៅជិត ១.៧០០ លានដុល្លារអាមេរិក កើនឡើង ១២% ធៀបនឹងរយៈពេលដូចគ្នាកាលពីឆ្នាំ២០១៩ ប៉ុន្ដែចំណូលគយវិញ ប្រមូលបានតែជិត ១.៣០០ លានដុល្លារអាមេរិកប៉ុណ្ណោះ ធ្លាក់ចុះជាង១៦%។
របាយការណ៍ពីអគ្គនាយកដ្ឋានពន្ធដារ បង្ហាញថានៅរយៈពេល៦ខែ ដំបូងនៅឆ្នាំ២០២០នេះ ចំណូលពន្ធដារ នៅតែប្រមូលបានប្រមាណជិត ១ពាន់៧០០ លានដុល្លារអាមេរិក ស្មើនឹងប្រមាណជិត៦០% នៃផែនការប្រចាំឆ្នាំ ធៀបនឹង ៦ខែដំបូងឆ្នាំ២០១៩ គឺមានការកើនឡើង១២%។ ក្នុងនោះ ចំណូលពន្ធដារ ២ ប្រភេទ នៅតែរក្សាបានកំណើនគួរឲ្យកត់សម្គាល់រួមមាន អាករលើតម្លៃបន្ថែមប្រមូលបានប្រមាណ ៣៣៦លានដុល្លារអាមេរិក ធៀបនឹងរយៈពេលដូចគ្នាកាលពីឆ្នាំ២០១៩កើនឡើងជាង ៤,៨% និងពន្ធលើប្រាក់ចំណូលមាន ប្រមាណ ៦៥៧លានដុល្លារអាមេរិក ធៀបនឹងរយៈពេលដូចគ្នាកាលពីឆ្នាំ២០១៩ កើនឡើងជាង២៣%។
អត្ថបទទាក់ទង!
ដោយឡែក បើក្រឡេកមកមើលចំណូលដែលប្រមូលដោយអគ្គនាយកដ្ឋានគយ និងរដ្ឋាករវិញ នៅក្នុងរយៈពេល៦ខែដំបូង នៅឆ្នាំ២០២០នេះ ប្រមូលបានប្រមាណជិត១.៣០០លានដុល្លារអាមេរិក ប៉ុន្ដែមានការថយចុះប្រមាណជាង ១៦% ធៀបនឹងរយៈពេលដូចគ្នាកាលពីឆ្នាំ២០១៩។
តាមរបាយការណ៍គយ បានឲ្យដឹងទៀតថា ចំណូលដែលប្រមូលបាននៅក្នុងឆមាសទី១ នៅឆ្នាំនេះ គឺត្រូវជាប្រមាណជិត៤៤% នៃផែនការកំណត់ដោយច្បាប់។ ក្នុងនោះ ចំណូល ដែលបានមកពីមុខទំនិញយានយន្ដ បានថយចុះជិត៣២% គ្រឿងសំណង់ថយចុះ ជាង២៨% ខណៈដែលមុខទំនិញប្រេងឥន្ធនៈកើនឡើង៥,៥% និងមុខទំនិញចម្រុះផ្សេងទៀត កើនឡើងជាង៣%។
ថ្លែងនៅក្នុងសេចក្ដីប្រកាសព័ត៌មានអំពីចំណូលគយនៅឆមាសទី១ឆ្នាំនេះ ឯកឧត្តម គុណ ញឹម ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានគយ និងរដ្ឋាករបានឲ្យដឹងថា ការនាំចូលទំនិញយានយន្ដ មានការធ្លាក់ចុះខ្លាំងជាបន្តបន្ទាប់ ពិសេសនៅក្នុងត្រីមាសទី២នៃឆ្នាំនេះ ខណៈដែលមុខទំនិញយានយន្ដនេះ គឺជាប្រភពពន្ធគយដ៏សំខាន់។
ប្រភពចំណូលរបស់អគ្គនាយកដ្ឋានគយ និងរដ្ឋាករ គឺបានមកពីប្រភពពន្ធ និងអាករសំខាន់ៗដូចជា ពន្ធគយ ឬហៅថាពន្ធនាំចូល, អាករពិសេស និងអាករលើតម្លៃបន្ថែម (VAT)។ ជាមួយគ្នានេះ នៅក្នុងឆមាសទី១ឆ្នាំនេះ បើប្រៀបធៀបទៅនឹងឆមាសទី១ ឆ្នាំ២០១៩ ឃើញថាចំណូលពន្ធគយយចុះជិត២០%,អាករពិសេសធ្លាក់ចុះ ជាង២១% និងអាករលើតម្លៃបន្ថែម (VAT) ថយចុះជាង៩%។
គួរបញ្ជាក់ថានៅក្នុងសន្និសីទសារព័ត៌មានកាលពីពេលថ្មីៗនេះ ឯកឧត្តមវង្សី វិស្សុតរដ្ឋលេខាធិកាប្រចាំការក្រសួងសេដ្ឋកិច្ច និងហិរញ្ញវត្ថុបានលើកឡើងថា ចំពោះការប្រមូលចំណូលនៅឆ្នាំ២០២១ខាងមុខនេះ ចំណូលពន្ធដារអាចនឹងមិនមានសន្ទុះកំណើនខ្លាំងដូចមុនទៀតនោះឡើយដោយសារតែមានអាជីវកម្មជាច្រើនដែលរងផលប៉ះពាល់ពីកូវីដ-១៩ រកស៊ីមិនចំណេញប្រាក់ច្រើនដូចមុននោះទេ។ ប៉ុន្ដែសម្រាប់ចំណូលពន្ធគយវិញ អាចនឹងមានងើបឡើងគួរឲ្យកត់សម្គាល់ ដោយសារតែសកម្មភាពសេដ្ឋកិច្ចស្ទុះងើបឡើងវិញ។
គួររំឭកដែរថា កាលពីឆ្នាំ២០១៩ បើបូកសរុបចំណូលដែលប្រមូលដោយគយ និងពន្ធដារ ឃើញថាមានដល់ទៅ ជាង៦ពាន់លានដុល្លារអាមេរិកឯណោះ។ ក្នុងនោះដែរ ពន្ធគយប្រមូលបានជាង៣ពាន់២០០ លានដុល្លារអាមេរិក កើនឡើង៣០%ធៀបនឹងឆ្នាំ២០១៨ និងមានលើសផែនការដែលបានកំណត់ប្រមាណ ៤២,៧%។ រីឯ ចំណូលពន្ធដារវិញ កាលពីឆ្នាំ២០១៩ ប្រមូលបាន២ពាន់៨០០លានដុល្លារអាមេរិក កើនឡើងលើសផែនការជាង ២៣% ហើយបើប្រៀបធៀបនឹងការបម្រូលចំណូលកាលពីឆ្នាំ២០១៩ គឺមានការកើនឡើងជាង២៨%៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
