លោក ចន ដេវីដ ឡាវឡក (John-David Lovelock) អ្នកវិភាគនៅក្រុមហ៊ុន Gartner បានលើកឡើងថា ការរំពឹងទុកលើសមត្ថភាពរបស់បញ្ញាសិប្បនិម្មិតជំនាន់ថ្មី ឬ Generative AI (GenAI) កំពុងធ្លាក់ចុះ ដោយសារតែអត្រាបរាជ័យមានកម្រិតខ្ពស់ក្នុងការសាកល្បងលើកដំបូង និងការមិនពេញចិត្តចំពោះដំណើរការរបស់ AI ជំនាន់ថ្មីនេះ។
តែទោះជាយ៉ាងណាក៏ដោយ អ្នកវិភាគរូបនេះបាននិយាយថា អ្នកផ្តល់គម្រូមូលដ្ឋានកំពុងវិនិយោគរាប់ពាន់លានដុល្លារជារៀងរាល់ឆ្នាំ ដើម្បីបង្កើនទំហំដំណើរការ និងភាពជឿជាក់ចំពោះម៉ូដែល AI ជំនាន់ថ្មី។ ជាក់ស្ដែងការចំណាយលើកម្មវិធីនេះត្រូវបានគេរំពឹងថា នឹងមានចំនួនសរុប៦៤៤ពាន់លានដុល្លារនៅឆ្នាំ២០២៥ ដោយបានកើនឡើង៧៦% បើធៀបនឹងឆ្នាំ២០២៤ និងអាចបន្តកើនឡើងថែមទៀតនៅឆ្នាំ២០២៦។
ការចំណាយលើបញ្ញាសិប្បនិម្មិត GenAI នេះទំនងជានឹងកើនឡើងគួរឱ្យកត់សម្គាល់នៅទូទាំងទីផ្សារស្នូលសំខាន់ៗ និងទីផ្សាររាយរងទាំងអស់នៅឆ្នាំ២០២៥។ បញ្ញាសិប្បនិម្មិត GenAI នឹងមានឥទ្ធិពលផ្លាស់ប្តូរនៅគ្រប់ទិដ្ឋភាពទាំងអស់នៃទីផ្សារចំណាយលើព័ត៌មានវិទ្យា (IT) ដោយបង្ហាញអំពីអនាគតដែលបច្ចេកវិទ្យា AI កាន់តែមានសារសំខាន់ចំពោះប្រតិបត្តិការអាជីវកម្ម និងផលិតផលប្រើប្រាស់។
ការកើនឡើងការចំណាយលើ GenAI ក្នុងឆ្នាំ២០២៥ នឹងត្រូវបានជំរុញភាគច្រើនដោយសារការរួមបញ្ចូលសមត្ថភាពជាមួយនឹង AI ទៅក្នុងផ្នែករឹងដូចជាម៉ាស៊ីនមេ ស្មាតហ្វូន និងកុំព្យូទ័រជាដើម ដោយអត្រា៨០%នៃការចំណាយលើ GenAI គឺជាផ្នែករឹង៕
អត្ថបទ៖ សុខ មង្គល
