ថ្លែងក្នុងសន្និសីទសារព័ត៌មាន អ្នកនាំពាក្យរដ្ឋាភិបាល លោក ផៃ ស៊ីផាន បានវាយប្រហារស្ថាប័នព័ត៌មានមួយចំនួន ដែលបានផ្សាយបន្តនូវការផ្សាយរបស់កាសែតអាមេរិក Wall Street Journal ដែលបានសរសេរកាលពីថ្ងៃទី២១ ខែកក្កដា ថា ចិននិងកម្ពុជាបានចុះកិច្ចព្រមព្រៀងកាលពីនិទាឃរដូវកន្លងទៅ ដើម្បីផ្តល់សិទ្ធិផ្តាច់មុខឱ្យប្រទេសចិនក្នុងការប្រើប្រាស់ផ្នែកមួយនៃមូលដ្ឋានទ័ពជើងទឹករាម នៅកម្ពុជា។
លោក ផៃ ស៊ីផាន បានរិះគន់សារព័ត៌មានអន្តរជាតិមួយចំនួន រួមទាំងវិទ្យុសំឡេងសហរដ្ឋអាមេរិក ផងដែរ ថាជា«ពួកក្ងាន»។
លោក ផៃ ស៊ីផាន បាននិយាយដូច្នេះថា «កាសែតបរទេស ខ្ញុំមិនបញ្ចេញឈ្មោះទេ គឺមានជាប្រព័ន្ធក្នុងការផ្សាយបន្ត រាប់ទាំង Voice of America។ អាហ្នឹងគឺថាឲ្យតែឮថាម៉េច គឺឆ្លើយតាមគេ។»
បន្ទាប់ពីការរិះគន់ហើយ លោក ផៃ ស៊ីផាន បានប្រកាសថា នឹងមានការដឹកក្រុមអ្នកកាសែតទៅមូលដ្ឋានទ័ពជើងទឹករាម ខេត្តព្រះសីហនុ ដើម្បីមើលឲ្យច្បាស់ថា តើទីតាំងនោះ វាស័ក្ដិសមសម្រាប់ដាក់តាំងមូលដ្ឋានទ័ពចិនឬអត់។
អត្ថបទទាក់ទង
លោក ផៃ ស៊ីផាន បាននិយាយដូច្នេះថា «យើងមានព្រឹត្តិការណ៏មួយ អញ្ជើញអ្នកសារព័ត៌មានទាំងអស់ រាប់ទាំង VoA អញ្ជើញទៅ ដើម្បីទៅពិនិត្យមើលខ្លួនឯង ឲ្យនិយាយតែខ្លួនឯងចុះ។»
លោក ផៃ ស៊ីផាន បាននិយាយបន្តថា «តាមពិត នៅកន្លែងមូលដ្ឋាន កន្លែងខ្លះ គេអត់ឲ្យយើងថតទេ សុំត្រៀមលក្ខណ:។ យើងគ្រាន់តែសុំឲ្យមើល តើមូលដ្ឋានទ័ព គេមិនសូវបើកចំហណាស់ណាប៉ុន្មានទេ គ្រាន់តែសុំមើល តើវាសមស្របនឹងការដាក់មូលដ្ឋានកងទ័ពនាវាចិននៅហ្នឹងដែរ ឬទេ?»
អត្ថបទកាសែត Wall Street Journal នោះ ដែលដកស្រង់សម្ដីមន្រ្តីអាមេរិកមិនបញ្ចេញឈ្មោះ ដែលបានឃើញកិច្ចព្រមព្រៀងនោះ បានអះអាងថា ភាគីទាំងពីរមិនបានប្រកាសជាសាធារណៈនោះទេ បន្ទាប់ពីចុះហត្ថលេខាហើយ។
យោងតាម Wall Street Journal កិច្ចព្រមព្រៀងនោះ នឹងអនុញ្ញាតឲ្យចិនប្រើមូលដ្ឋានជើងទឹករាម រយៈពេល៣០ឆ្នាំ ហើយនឹងបន្តជាស្វ័យប្រវត្តិ រៀងរាល់១០ឆ្នាំម្ដង នៅក្រោយរយៈពេល ៣០ឆ្នាំដំបូងនោះ៕
None
