ការនាំចេញសម្លៀកបំពាក់ និងវាយនភណ្ឌរបស់វៀតណាមនៅឆ្នាំ២០២៣នេះ អាចនឹងឈានដល់ ៤៧ ទៅ ៤៨ពាន់លានដុល្លារ ក្នុងសេណារីយ៉ូ វិជ្ជមាន និងមានត្រឹម ៤៥ ដល់ ៤៦ពាន់លានដុល្លារ ក្នុងសេណារីយ៉ូទាបបំផុត។ នេះបើតាមសមាគមកាត់ដេរ និងវាយនភណ្ឌវៀតណាម។
ចំពោះរបៀបដែលក្រុមហ៊ុនសហគ្រាសសម្របខ្លួនតាមការផ្លាស់ប្តូរនៅក្នុងទីផ្សារ នឹងជះឥទ្ធិពលដល់កំណើនចំណូលរបស់ពួកគេ ក្នុងកាលៈទេសៈណាមួយ។
នៅក្នុងសេណារីយ៉ូវិជ្ជមាន ដែលក្នុងនោះអស្ថិរភាពនៅក្នុងទីផ្សារសាកលនឹងអាចត្រូវគ្រប់គ្រងបាន ពោលគឺជារួមគ្រប់សកម្មភាពនៃវិស័យទាំងអស់អាចនឹងងើបឡើងវិញ នៅចុងត្រីមាសទី១ នៃឆ្នាំ២០២៣ នោះការនាំចេញផលិតផលវាយនភណ្ឌ កាត់ដេរ របស់វៀតណាម អាចសម្រេចបាន ៤៨ពាន់លានដុល្លារ។
ចំណែកសេណារេយ៉ូទីពីរនោះ គឺទីផ្សារសាកល នឹងងើបឡើងវិញនៅចុងឆមាសទី១ នៃឆ្នាំ២០២៣ ដែលការនាំចេញផលិតផលវាយនភណ្ឌ និងកាត់ដេរ អាចឈានដល់ត្រឹមតែ ៤៥ពាន់លានដុល្លារប៉ុណ្ណោះ។ នៅក្នុងបរិបទនេះ នៅពេលទីផ្សារអន្តរជាតិ លែងមានតម្រូវការបញ្ជាទិញសម្លៀកបំពាក់ និងវាយនភណ្ឌក្នុងរយៈពេលវែង គឺក្រុមហ៊ុនអាជីវកម្មអាចផ្លាស់ប្តូរទៅការផលិតអ្វីផ្សេងវិញ។ តួយ៉ាង ក្នុងឆ្នាំ២០២២ គឺពួកគេបានចាប់ផ្តើមស្វែងរកទីផ្សារ និងការបង្កើតផលិតផលផ្សេងៗ។
អត្ថបទគួរអាន
ទោះនៅក្នុងសេណារីយ៉ូណាមួយក៏ដោយ ទីផ្សារសម្លៀកបំពាក់ និងវាយនភណ្ឌវៀតណាម នឹងមិនអាចវិលមករកស្ថានភាពល្អវិញក្នុងអំឡុងពាក់កណ្តាលឆ្នាំ២០២៣នេះឡើយ។
យ៉ាងណាក៏ដោយ អ្នកជំនាញបានលើកឡើងថា វាមានចំណុចច្បាស់លាស់នៅឆ្នាំក្រោយ ដោយបានកត់សម្គាល់ទៅលើការគ្រប់គ្រងបាននូវជំងឺកូវីដ-១៩ ហើយតំបន់អាស៊ីប៉ាស៊ីហ្វិកដែលនឹងមានកំណើនសេដ្ឋកិច្ចដ៏លឿនបំផុតក្នុងឆ្នាំ២០២៣នេះ និងការដកគោលនយោបាយសូន្យកូវីដ១៩របស់រដ្ឋាភិបាលចិន ក៏ដូចជាថ្លៃដើមភស្តុភារកម្មធ្លាក់ចុះផងដែរ។
ក្រុមហ៊ុននេះបន្តថា ករណីដែលល្អបំផុត គឺស្ថានភាពសេដ្ឋកិច្ចសាកលនឹងកាន់តែមានស្ថិរភាព ហើយជម្លោះភូមិសាស្រ្តនយោបាយត្រូវបញ្ចប់នៅត្រីមាសទី២ នោះការនាំចេញ អាចនឹងកើនឡើងដល់ ៤% ទៅ ៥% ពីឆ្នាំ២០២២។ ប៉ុន្តែ បើបញ្ហាទាំងនេះនៅតែបន្តកើតឡើងរហូតដល់ត្រីមាសទី៣ នោះការនាំចេញមិនមានអ្វីប្រែប្រួលឡើយ។ ហើយបើមានករណីសេណារីយ៉ូដ៏អាក្រក់បំផុតនោះ សេដ្ឋកិច្ចពិភពលោកនឹងធ្លាក់ចូលក្នុងវិបត្តិ ប្រាក់ចំណូលពីការនាំចេញវាយនភណ្ឌកាត់ដេរវៀតណាមនៅឆ្នាំ២០២៣ អាចនឹងទាបជាង ៥%៕
