បើយោងតាមអ្នកតាមដានទីផ្សារ SNE Research ឱ្យដឹងថា ការចុះបញ្ជីរថយន្ត EV ទូទាំងពិភពលោកបានកើនឡើងជាង ៦១%ក្នុងឆ្នាំ២០២២ ឈានដល់ចំនួនដល់ជាង ១០លាន ៨សែនគ្រឿង។ របាយការណ៍បានបន្តថា BYD ដែលជាក្រុមហ៊ុនផលិតរថយន្តអគ្គិសនីដ៏ធំបំផុតមួយរបស់ចិនមានការលក់កើនឡើង២០៥%កាលពីឆ្នាំមុន តំណាងឱ្យ ១៧,៣%នៃទីផ្សាររថយន្តអគ្គិសនីសរុបនៅទូទាំងពិភពលោក ហើយទិន្នន័យនេះក៏បានធ្វើឱ្យ BYD ក្លាយជាក្រុមហ៊ុនលក់រថយន្តអគ្គិសនីច្រើនជាងគេបំផុតនៅលើពិភពលោក ដោយសារតែម៉ូឌែលរថយន្តរបស់ BYD ទាំងអស់បានចុះបញ្ជីជាប្រភេទរថយន្តអគ្គិសនីសរុបមានចំនួនជិត២លានគ្រឿង។
ទោះបីជាក្រុមហ៊ុន Tesla បានបង្ហាញកំណើននៃការលក់ ៤០% ក្នុងឆ្នាំមុនក៏ដោយ ក៏ប៉ុន្ដែ ក្រុមហ៊ុនផលិតរថយន្តអគ្គិសនីរបស់សេដ្ឋី Elon Musk មួយនេះ បានរអិលចុះមកចំណាត់ថ្នាក់ទីពីរវិញតាមពីក្រោយ BYD ជាមួយនឹងចំណែកទីផ្សារពិភពលោកនៅមានត្រឹម ជាង១២%។
អត្ថបទគួរអាន
ដោយឡែក រថយន្តម៉ូឌែលឈ្មោះ Geely ដែលជាក្រុមហ៊ុនផលិតរថយន្តអគ្គិសនី របស់ចិនមួយផ្សេងទៀត គឺជាក្រុមហ៊ុនតែមួយគត់របស់ចិន បន្ទាប់ពី BYD ដែលបានឈរនៅក្នុងកំពូលតារាងទាំងដប់ក្រុមហ៊ុន ហើយដែលបានប្រកាសអត្រាកំណើនការលក់ដល់ទៅបីខ្ទង់ដូច BYD ដែរ។
យោងតាមរបាយការណ៍បានឱ្យដឹងថា ការលក់រថយន្តប្រភេទ EV នៅក្នុងប្រទេសចិនបានកើនឡើង ជាង៩៧% ធៀបនឹងឆ្នាំមុនក្នុងចំនួនជាង ៦លាន៥សែនគ្រឿង ខណៈដែលទីផ្សារ EV នៅសហរដ្ឋអាមេរិក និងអឺរ៉ុបកើនឡើងជិត ៥០% ។
សូមជម្រាបថា ក្រៅពីក្រុមហ៊ុនចិន និងអាមេរិក ក្រុមហ៊ុន Hyundai Motor និង Kia របស់កូរ៉េ បានកើនឡើងការលក់រថយន្ដអគ្គិសនី ៤១% ដែរ ប៉ុន្តែ ចំណែកទីផ្សាររួមរបស់ក្រុមហ៊ុនផលិតរថយន្តកូរ៉េខាងត្បូងទាំងពីរ បានធ្លាក់ចុះមកត្រឹម ៤,៧%ធៀបនឹង៥,៤%ពីឆ្នាំមុន។ ក្រុមហ៊ុន Hyundai Motor Group បានធ្លាក់មកចំណាត់ថ្នាក់ទី៦ក្នុងបញ្ជីក្រុមហ៊ុនលក់រថយន្ដអគ្គិសនីច្រើនជាងគេទាំង១០ តាមពីក្រោយក្រុមហ៊ុន Geely របស់ចិន៕
