បញ្ហាជម្លោះនៃការលុកលុយរបស់រុស្ស៊ីលើអ៊ុយក្រែន ដែលឈានចូលដល់រយៈពេលជាង ២ខែទៅហើយនោះ បានធ្វើឲ្យមានភាពរអាក់រអួលជាច្រើនដល់ប្រទេសឥណ្ឌូនេស៊ីក្នុងនាមជាប្រធានក្នុងការរៀបចំកិច្ចប្រជុំ G20 នៅឆ្នាំនេះ និង បញ្ហាលំបាកសម្រាប់ប្រទេសជាសមាជិករួមទាំងសហរដ្ឋអាមេរិកផងដែរ។
គួរកត់សម្គាល់ថា ជុំវិញបញ្ហាសង្គ្រាមឈ្លានពាននៅអ៊ុយក្រែន ក្រុមប្រទេសសមាជិក G20 ភាគច្រើនគឺ បានដាក់ទណ្ឌកម្មយ៉ាងចាស់ដៃទៅលើប្រទេសរុស្ស៊ី ក៏ប៉ុន្តែ ប្រទេសដែលជាសមាជិកផ្សេងទៀតដូចជា ចិន និង ឥណ្ឌា មិនបានចូលរួមដាក់ទណ្ឌកម្មលើទីក្រុងម៉ូស្គូ នោះទេ។
សហរដ្ឋអាមេរិក និងសមាជិកមួយចំនួនទៀតនៃប្រទេសសេដ្ឋកិច្ចជឿនលឿនទាំង ៧ ឬ ហៅថា G7 ឥឡូវនេះ កំពុងស្នើទីក្រុងហ្សាកាតា ដែលប្រកាន់ជំហរថាខ្លួន រក្សាភាពមិនលំអៀង ក្នុងនាមជាប្រធានវិលជុំក្នុងនៃកិច្ចប្រជុំ G20 នៅឆ្នាំនេះ ឲ្យអញ្ជើញប្រធានាធិបតីលោក Volodymyr Zelensky ចូលរួមក្នុង កិច្ចប្រជុំខ្លះៗនៃក្នុងកិច្ចប្រជុំ G20។ នេះបើតាមការបញ្ចាក់ពីមន្ត្រីជាច្រើនរូប ដែលត្រូវបានស្រង់សម្ដីដោយ Bloomberg។
គួរកត់សម្គាល់ថា ប្រទេសដែលជាម្ចាស់ផ្ទះ ប្រធានវិលជុំ G20 ជាទម្លាប់តែងអញ្ជើញប្រទេសមួយចំនួនដែលមិនមែនជាសមាជិកឱ្យចូលរួមជាភ្ញៀវ នៃកិច្ចប្រជុំមួយចំនួនក្នុងនាមជាអ្នកសង្កេតការណ៍ ក៏ប៉ុន្តែមិនមានសិទ្ធិនៅក្នុងការពិភាក្សាផ្លូវការនោះទេ។
អត្ថបទគួរអាន
យ៉ាងណាមិញ ក្នុងសេណារីយោ ប្រសិនបើឥណ្ឌូនេស៊ីអញ្ចើញលោក Zelensky ប្រធានាធិបតីអ៊ុយក្រែន ឲ្យចូលរួមជាភ្ញៀវក្នុងកិច្ចប្រជុំកំពូលនៅខែ វិច្ឆិកាខាងមុខនេះមែន នោះភាពតានតឹងនឹងកើតមានទៅលើផ្នែកដឹកជញ្ជូន និង ទំនាក់ទំនងការទូតសម្រាប់ប្រទេសឥណ្ឌូនេស៊ី ជាមួយនិងរុស្ស៊ីកាន់តែខ្លាំងដែរ ក្នុងករណី លោក Putin ពិតជាសម្រេចចិត្តចូលរួមកិច្ចប្រជុំកំពូលដោយផ្ទាល់ដែលធ្វើឡើងនៅកោះបាលី ។ ម្យ៉ាងវិញទៀត វាក៏បង្ហាញភាពមិនច្បាស់លាស់ដែរថា តើការបន្ថែមអ៊ុយក្រែនចូលរួមនឹងអាចធានាបានថា មេដឹកនាំផ្សេងទៀតបង្ហាញខ្លួនក្នុងកិច្ចប្រជុំដែរ ឬក៏យ៉ាងណានោះទេ។
ទន្ទឹមនឹងនេះ មានការមើលឃើញជាច្រើនបានលើកឡើងថា យ៉ាងហោចណាស់មេដឹកនាំមួយចំនួន រួមទាំងប្រធានាធិបតីសហរដ្ឋអាមេរិកលោក Joe Biden ផងដែរ នឹងមិនចូលរួមអង្គុយនៅតុប្រជុំតែមួយជាមួយលោក Putin នោះទេ បើសិនជាលោកពូទីនពិតជាមកចូលរួមកិច្ចប្រជុំ G20ដែរនោះ។ ការរៀបចំកិច្ចប្រជុំរបស់ឥណ្ឌូណេស៊ី គឺនៅមិនទាន់មានភាពច្បាស់លាស់នោះទេថា អាចរៀបចំកិច្ចប្រជុំកំពូល ដើម្បីអនុញ្ញាតឲ្យលោក ពូទីន និងលោក បៃដិន ជួបគ្នាដោយផ្ទាល់ ឬ តាមវិធីសាស្ត្រផ្សេងនៅឡើយទេ។
គួររំលឹកថា សហរដ្ឋអាមេរិក កន្លងមក គឺស្ថិតក្នុងចំណោមអ្នកដែលគាំទ្រឲ្យមានការដករុស្ស៊ីចេញពី G20 ទាំងស្រុង ទោះជាប្រទេសផ្សេងទៀតរួមទាំងប្រទេសចិនប្រឆាំងនឹងទង្វើបែបនេះក៏ដោយ។ ទោះជាយ៉ាងណា កន្លងមក រុស្ស៊ីក៏ធ្លាប់ត្រូវបានដកចេញពីក្រុមតូចនៃប្រទេស G7 ផងដែរ បន្ទាប់ពីការបញ្ចូលតំបន់គ្រីមេ ដែលធ្លាប់ជាទឹកដីអ៊ុយក្រែន មកធ្វើជារបស់ខ្លួនក្នុងឆ្នាំ ២០១៤។
គួរជម្រាបថា កិច្ចប្រជុំនៅសល់ប៉ុន្មានខែទៀតប៉ុណ្ណោះ ហើយមិនទាន់មានការសម្រេចចិត្តនៅឡើយទេថា តើឥណ្ឌូនេស៊ិ នឹងអញ្ជើញអ៊ុយក្រែនឲ្យចូលរួមកិច្ចប្រជុំកំពូលនៅខែវិច្ឆិកាខាងមុខនេះ ឬក៏អត់នោះ។
ដោយឡែក បុរសជើងខ្លាំង លោក ពូទីន វិញមិនទាន់សម្រេចចិត្តថាត្រូវចូលរួមក្នុងកិច្ចប្រជុំកំពូលG20 ឬអត់នៅឡើយទេ ខណៈលោកកំពុងរង់ចាំមើលថា តើស្ថានការណ៍វិវត្តន៍ទៅជាយ៉ាងណាក្នុងរយៈពេលប៉ុន្មានខែខាងមុខនេះខណៈកិច្ចប្រជុំកំពូលនេះធ្វើឡើងនៅខែ វិច្ឆិកា ខាងមុខនេះ ៕
អត្ថបទ៖ វ៉ាន់ ស្រីរ័ត្ន
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
