ទីភ្នាក់ងារព័ត៌មានរ៉យទ័របានរាយការណ៍ថា នៅឆ្នាំចុងក្រោយនៃរដ្ឋបាលលោកប្រធានាធិបតី ចូកូ វីដូដូ (Joko Widodo ) រដ្ឋាភិបាលនៃប្រជាជាតិជាង២០០លាននាក់នេះ បានស្នើថវិកាជាតិសរុបដល់ទៅជាង៣ពាន់ទ្រីលានរ៉ូពី ឫប្រមាណជាង២១៦ពាន់លានដុល្លារ កើនឡើងជាង៦ភាគរយបើធៀបនឹងការចំណាយដែលបានស្នើកាលពីឆ្នាំ២០២៣។
ការស្នើសុំបង្កើនថវិកាជាតិនេះ គឺដើម្បីធានាលើការឧបត្ថម្ភធនថាមពល ស្របពេលតម្លៃប្រេងពិភពលោកកំពុងមានការកើនឡើង។ ក្រៅពីនេះឱនភាពសារពើពន្ធសម្រាប់ឆ្នាំក្រោយ ក៏ត្រូវបានគេមើលឃើញថា មានចំនួន២,២ភាគរយ នៃផលិតផលក្នុងស្រុកសរុបបើធៀបនឹងទស្សនវិស័យនៃកំណើន ដែលគេបានព្យាករណ៍ថា មានទំហំ២,៣ភាគរយ នៃផលិតផលក្នុងស្រុកសរុបសម្រាប់ឆ្នាំនេះ ជាមួយនឹងកំណើនសេដ្ឋកិច្ចដែលគេព្យាករណ៍នៅឆ្នាំ២០២៤ មានក្នុងកម្រិតប្រមាណ៥,២ភាគរយ ។
លោកស្រី ស្រ៊ី មូលយ៉ានី អ៊ីនដ្រាវ៉ាទី (Sri Mulyani Indrawati) រដ្ឋមន្ត្រីក្រសួងហិរញ្ញវត្ថុឥណ្ឌូនេស៊ី បានលើកឡើងពីហានិភ័យនៃការកើនឡើងតម្លៃប្រេងឆៅពិភពលោកចំពោះថវិកានៅឆ្នាំក្រោយ។ លោកស្រីបាននិយាយថា ភាពមិនប្រាកដប្រជាជាសកលនឹងនៅតែនៅជាមួយយើង ដូច្នេះថវិការដ្ឋនឹងត្រូវបន្តការពារប្រជាជនពីភាពតក់ស្លុតណាមួយ។
អត្ថបទគួរអាន
ដោយឡែក លោក ចូសួ ប៉ាដេដេ ( Josua Pardede) ប្រធានសេដ្ឋវិទូរបស់ធនាគារ Permata ដែលជាធនាគារកណ្តាលប្រជាជាតិនេះបាននិយាយថា ការបង្កើនការចំណាយបន្ថែមទៀតប្រហែលជាត្រូវការជាចាំបាច់សម្រាប់ការការពារពីផលប៉ះពាល់នៃលក្ខខណ្ឌអាកាសធាតុ អែលនីណូ (El Nino) ដែលបណ្តាលឱ្យអូសបន្លាយរដូវប្រាំងអាចធ្វើឱ្យប៉ះពាល់ដល់ការប្រមូលផល។ លោកបានមានប្រសាសន៍ថា " វិធានការបន្ថែមអាចនឹងត្រូវការ ដើម្បីប្រមើលមើលពីផលប៉ះពាល់នៃបាតុភូត អែលនីណូ មកលើតម្លៃម្ហូបអាហាររបស់ប្រជាជន"។
មន្ត្រីជាន់ខ្ពស់រូបនេះបានបន្ថែមថា រដ្ឋាភិបាលក៏នឹងអាចពិនិត្យជំនួយជាសាច់ប្រាក់ប្រចាំឆ្នាំរបស់រដ្ឋាភិបាល ដើម្បីទិញស្បៀងអាហារផងដែរ ស្របពេលដែលកម្រិតអតិផរណាលើតម្លៃស្បៀងអាហារ ដែលបង្កឡើងដោយ អែលនីណូ អាចកើតឡើងនៅក្នុងឆមាសទីមួយនៃឆ្នាំ ២០២៤។
មកដល់ពេលនេះអត្រាអតិផរណាប្រចាំឆ្នាំរបស់ប្រទេសឥណ្ឌូនេស៊ីបានកើនឡើងបន្តិចក្នុងខែសីហា ពោលគឺដល់៣,២៧% ប៉ុន្តែនៅតែស្ថិតនៅចន្លោះពី២ទៅ៤% នៃលទ្ធភាពគ្រប់គ្រងបាន។ សម្រាប់ឆ្នាំ២០២៤ខាងមុខត្រូវបានគេព្យាករណ៍ថា អតិផរណាអាចធ្លាក់មកទាបជាង២,៨ ភាគរយបើធៀបនឹង៣,១ភាគរយ នៃកម្រិតនៅឆ្នាំ២០២៣៕
