ការដែលជប៉ុនលែងពឹងផ្អែកលើចិននេះ ត្រូវបានគេរំពឹងថា វានឹងធ្វើឲ្យគ្រប់ផលិតផលទាំងអស់ នឹងអាចកើនឡើងថ្លៃដើមផលិត ដោយសារតែការងាកចេញពីទីផ្សារផលិតដែលមានតម្លៃទាប គឺប្រទេសចិនេះ។ តើក្រុមហ៊ុនជប៉ុនទាំងនោះកំពុងត្រៀមខ្លួនបិទបញ្ចប់ការពឹងផ្អែកលើប្រទេសចិនទាំងស្រុង ឬមួយយ៉ាងណា?
បើតាមការចុះផ្សាយដោយសារព័ត៌មានជប៉ុន Nikkei Asia បានឲ្យដឹងថា កាលពីរដូវក្តៅកន្លងទៅ គម្រោងដែលមានភាពអាថ៌កំបាំងមួយនៃក្រុមហ៊ុន Honda Motor ដែលមានផែនការក្នុងការកែទម្រង់រចនាសម្ព័ន្ធខ្នាយក្សរបស់ខ្លួនឡើងវិញ ដើម្បីធ្វើការសាងសង់រថយន្តដឹកអ្នកដំណើរ និងម៉ូតូដោយប្រើគ្រឿងបន្លាស់នៅប្រទេសចិនតិចតួចបំផុតតាមដែលអាចធ្វើទៅបាន។ ហើយក្រុមហ៊ុននេះ នឹងត្រូវជ្រើសរើសថា តើខ្លួនត្រូវបន្តធ្វើអាជីវកម្មនៅក្នុងប្រទេសចិនទៀតដែរ ឬយ៉ាងណាករណីបើចិនចូលឈ្លានពានកោះតៃវ៉ាន់មែននោះ។
មែនទែនទៅ ជាង៣០%នៃការលក់របស់ក្រុមហ៊ុនហុងដា (Honda) របស់ជប៉ុន គឺមាននៅក្នុងប្រទេសចិន ហើយគោលនយោបាយរបស់ក្រុមហ៊ុននេះ ក្នុងការធ្វើឱ្យប្រទេសចិនក្លាយជាកត្តាចម្បងនៃប្រាក់ចំណូលរបស់ខ្លួននឹងមិនផ្លាស់ប្តូរនាពេលអនាគតនោះដែរ។ ទោះបីជាក្រុមហ៊ុនផលិតរថយន្តយក្សរបស់ជប៉ុនមួយនេះ មិនមានបំណងចាកចេញពីប្រទេសចិនក្នុងពេលឆាប់ៗនេះក៏ដោយ ក៏ខ្លួនកំពុងប្រឈមមុខនឹងហានិភ័យរបស់ប្រទេសចិន ដើម្បីធានាថាក្រុមហ៊ុនបានត្រៀមខ្លួនរួចជាស្រេចសម្រាប់គ្រាអាសន្នណាមួយកើតឡើង។
អត្ថបទគួរអាន
យ៉ាងណាមិញ ប្រសិនបើមានរំខាន៨០% ក្នុងរយៈពេលពីរខែនៃការនាំចូលវត្ថុធាតុដើម និងគ្រឿងបន្លាស់របស់ជប៉ុនពីប្រទេសចិន ដែលមានតម្លៃប្រហែល ៩ ពាន់លានដុល្លារ នោះប្រទេសជប៉ុននឹងមិនអាចផលិតផលិតផលបានជាច្រើនប្រភេទ រួមទាំងឧបករណ៍ប្រើប្រាស់ក្នុងផ្ទះ រថយន្ត ជ័រ សម្លៀកបំពាក់ និងផលិតផលអាហារជាច្រើនទៀតផងដែរ។
ក្នុងករណីមានការរំខានបែបនេះ តាមការប៉ាន់ស្មានរបស់សាស្ត្រាចារ្យផ្នែកសេដ្ឋកិច្ចជប៉ុន លោក Yasuyuki Todo និងសហការីរបស់លោកនៅសាកលវិទ្យាល័យ Waseda បានឲ្យដឹងថា ផលិតកម្មដែលមានទំហំតម្លៃប្រហែល ៣៦០ ពាន់លានដុល្លារនឹងរលាយបាត់ ដោយវានឹងស្មើនឹងការបាត់បង់ប្រហែល ១០% នៃផលិតផលក្នុងស្រុកសរុបរបស់ប្រទេសជប៉ុនទាំងមូលតែម្តង។
គួរជម្រាបដែរថា បន្ទាប់ពីការបញ្ចប់សម័យសង្គ្រាមត្រជាក់ សកលភាវូបនីយកម្មបានបញ្ចូលប្រទេសអតីតប្លុកកុម្មុយនិស្ត និងបង្កើនការពឹងពាក់គ្នាទៅវិញទៅមកផ្នែកសេដ្ឋកិច្ច ហើយជប៉ុនមានទំនាក់ទំនងសេដ្ឋកិច្ចយ៉ាងខ្លាំង ជាពិសេសជាមួយប្រទេសចិន។ មិនតែប៉ុណ្ណោះ គិតត្រឹមឆ្នាំ ២០២០ ការនាំចូលរបស់ជប៉ុនពីប្រទេសចិនមានចំណែកទីផ្សារដល់ទៅ ២៦% នៃទីផ្សារនាំចូលសរុប ពោលគឺធំជាងទីផ្សារអាមេរិកទៅទៀតដែលមានត្រឹម ១៩% និងអាល្លឺម៉ង់មាន ១១% ទៅទៀត។
គួររំលឹកដែរថា មិនមែនមានតែជប៉ុននោះទេ ប្រទេសជច្រើនផ្សេងទៀតបាននឹងកំពុងព្យាយាមដកប្រទេសចិនចេញពីខ្សែចង្វាក់ផ្គត់ផ្គង់របស់ពួកគេដូចគ្នាដែរ។ កាលពីខែឧសភាកន្លងទៅ រដ្ឋបាលលោក បៃដិន បានបង្កើតដៃគូក្របខណ្ឌសេដ្ឋកិច្ចឥណ្ឌូប៉ាស៊ីហ្វិក (IPEF) ជាមួយប្រទេសចំនួន ១៤ រួមទាំងប្រទេសជប៉ុន សហរដ្ឋអាមេរិក និងឥណ្ឌាផងដែរ ហើយនោះវាសរបង្ហាញថា ប្រទេសទាំងនោះនឹងចែករំលែកព័ត៌មានអំពីផលិតផលសំខាន់ៗ និងការផ្លាស់ប្តូរសារពើភ័ណ្ឌផ្សេងៗ ដើម្បីឆ្លើយតបទៅនឹងការកើតឡើងបញ្ហាណាមួយ។
ដោយឡែក ក្រុមហ៊ុនអាមេរិកដូចជា Apple ដែលរីកចម្រើនដោយការរចនា ដែលមានមូលដ្ឋាននៅសហរដ្ឋអាមេរិក និងមានផលិតកម្មនៅក្នុងប្រទេសចិននោះ ក៏កំពុងផ្លាស់ប្តូរទិសដៅក្នុងការកាត់បន្ថយការពឹងផ្អែករបស់ពួកគេលើប្រទេសចិនជាបណ្ដើរៗផងដែរ៕
