ដំណើរការផ្សារម៉ាក្រូទី២ នៅក្រុងសៀមរាប អង្គរ មិនទាន់ទាំងដល់ពេលមួយខែផង លោក Thomas Humpmer អគ្គនាយកក្រុមហ៊ុនផ្សារម៉ាក្រូផ្នែកអភិវឌ្ឍន៍ពាណិជ្ជកម្មអន្តរជាតិ បានបង្ហើបប្រាប់សារព័ត៌មានអេឡិចត្រូនិច ខេមបូណូមីស ថា ជាការពិតណាស់ ក្រុមហ៊ុននឹងពង្រីកសាខាបន្ថែមទៀត បន្ទាប់ពីសាខាទី១ ទី២ នេះ ទទួលបានជោគជ័យ នាពេលកន្លងមកថ្មីៗនេះ។
លោក ថូម៉ាស បន្តថា ក្រុមហ៊ុនកំពុងតែសម្លឹងមើលការពង្រីកទីតាំងនៅលើផ្លូវ៦០ម៉ែត្រ បន្ថែមទៀត ហើយអ្វីៗគ្រប់យ៉ាងកំពុងស្ថិតនៅក្នុងការចរចានៅឡើយទេ។ មិនមែនមានតែនៅលើផ្លូវ៦០ម៉ែត្រទេ ក្រុមហ៊ុននឹងមើលឲ្យបានច្រើនទីតាំង សម្រាប់ពេលអនាគត ដែលអាចគាំទ្រដល់អាជីវកម្មរបស់ក្រុមហ៊ុន។ ហើយការបើកពង្រីកអាជីវកម្មសាខានីមួយៗត្រូវតែផ្អែកទៅលើតម្រូវការរបស់អតិថិជន ដង់ស៊ីតេប្រជាជនរស់នៅ និងសក្តានុពលតំបន់។ ក្រុមហ៊ុនមានគំនិតជាវិជ្ជមានយ៉ាងច្រើន ក្នុងការពង្រីកអាជីវកម្មបន្ថែមនៅប្រទេសកម្ពុជា។
អគ្គនាយកក្រុមហ៊ុនម៉ាក្រូផ្នែកអភិវឌ្ឍន៍ពាណិជ្ជកម្មអន្តរជាតិ បានអះអាងយ៉ាងដូច្នេះថា ៖ “នៅក្នុងដំណាក់ដំបូងរបស់យើង គឺយើងនឹងពង្រីកសាខាប្រមាណ ៧សាខាទៀត។ ដំបូងឡើយ យើងគិតថា យើងនឹងបើកប្រមាណ ៨ ទៅ ៩ទីតាំង ក្នុងរយៈពេលដ៏ខ្លីខាងមុខនេះ។ យើងនឹងមើលទៅលើចំនួនប្រជាជន តម្រូវការអតិថិជន ដង់ស៊ីតេប្រជាជន និងចំនួនអាជីវកម្ម ដើម្បីបើកផ្សារម៉ាក្រូឲ្យត្រូវទីតាំង និង បម្រើដល់ពួកគេឲ្យបានល្អ”។
លោក Thomas Humpmer អគ្គនាយកក្រុមហ៊ុនផ្សារម៉ាក្រូផ្នែកអភិវឌ្ឍន៍ពាណិជ្ជកម្មអន្តរជាតិ
អត្ថបទគួរអាន!
លោកបានបន្តថា នៅក្នុងប្រទេសថៃ គិតត្រឹមដំណាច់ឆ្នាំ២០១៨ មានផ្សារម៉ាក្រូចំនួន ១២៩ផ្សារ។ ក្រុមហ៊ុនមើលឃើញឱកាសសម្រាប់ពង្រីកបន្ថែម ដូចជា កំពុងដំណើរការនៅកម្ពុជានៅពេលនេះផ្ទាល់។
ក្រុមហ៊ុនមាន ៣សាខា នៅប្រទេសឥណ្ឌា ហើយក្រុមហ៊ុនទើបនឹងចុះបញ្ជីបើកការិយាល័យនៅប្រទេសមីយ៉ាន់ម៉ា និងការិយាល័យនៅប្រទេសចិន។ ក្រុមហ៊ុន ស្យ៉ាម ម៉ាក្រូ នឹងស្វែងរកឱកាសសក្តានុពល សម្រាប់ការពង្រីកបន្ថែម។ អ្វីដែលក្រុមហ៊ុនពេញចិត្តជាងគេ គឺប្រទេសកម្ពុជា ដោយសារតែម៉ាក្រូនៅកម្ពុជា ជាផ្សារក្រៅប្រទេសដំបូងបង្អស់ដែលទទួលបានជោគជ័យ ហើយក្រុមហ៊ុននឹងបន្តចាក់បន្ថែមថាមពលដើម្បីពង្រីកឲ្យបានច្រើន។
បើតាមការអះអាងពីលោក យ៉ុត្តាផម ចារឺនសុខ (Yuttapoom Jarernsuk) អគ្គនាយកគ្រប់គ្រងក្រុមហ៊ុន ផ្សារ ម៉ាក្រូ ប្រចាំនៅប្រទេសកម្ពុជា បានបញ្ជាក់ដែរថា ការពង្រីកសាខាផ្សារម៉ាក្រូនីមួយៗត្រូវចំណាយទុនវិនិយោគប្រមាណ ២០លានដុល្លារអាមេរិក។
ចុះហេតុអ្វីបានជាក្រុមហ៊ុនផ្សារម៉ាក្រូ ដែលជាផ្សារលក់ទំនិញបោះដុំដ៏ធំរបស់ថៃមួយនេះ ទុកចិត្តក្នុងការវិនិយោគនៅកម្ពុជា?
ជុំវិញសំណួរនេះ លោក Thomas Humpmer អគ្គនាយកក្រុមហ៊ុនផ្សារម៉ាក្រូផ្នែកអភិវឌ្ឍន៍ពាណិជ្ជកម្មអន្តរជាតិ បកស្រាយថា ដោយសារមើលឃើញពីកំណើនសេដ្ឋកិច្ចប្រទេសកម្ពុជា រីកចម្រើនយ៉ាងរឹងមាំប្រមាណ ៧ភាគរយ ជាង ២០ឆ្នាំកន្លងមកហើយ។ ហើយកម្ពុជាមានលក្ខខណ្ឌអំណោយផលយ៉ាងខ្លាំងសម្រាប់ការវិនិយោគ។ ភាពងាយស្រួលនៃការធ្វើអាជីវកម្មនៅទីនេះ កាន់តែប្រសើរឡើង និងកាន់តែងាយស្រួល ហើយការចាប់ដៃគូជាមួយក្រុមហ៊ុនក្នុងស្រុក បានផ្តល់ការយល់ដឹងច្បាស់លាស់ដល់ពួកយើង ដែលអនុញ្ញាតឲ្យយើងដើរនៅក្នុងគន្លងផ្លូវ ដែលបានកំណត់សម្រាប់អាជីវកម្មរួចជាស្រេច។
ផ្សារម៉ាក្រូ ដែលបើកក្រោមស្លាកក្រុមហ៊ុន ម៉ាក្រូ (ខេមបូឌា) ជាសម្ព័ន្ធសហគ្រាសចម្រុះរវាង ក្រុមហ៊ុន Siam Makro Public Company Limited របស់ថៃ។ ផ្សារនេះស្តុកលក់ទំនិញបោះដុំរហូតដល់ជាង ១ម៉ឺនមុខ ហើយផ្សារនេះត្រូវគេមើលឃើញថា នឹងដើរតួជាអ្នកផ្គត់ផ្គង់ផលិតផលម្ហូបអាហារដ៏ធំ និងសំខាន់ជាងគេមួយ សម្រាប់វិស័យលក់រាយនៅកម្ពុជា។
ជារៀងរាល់ឆ្នាំ ថៃបានធ្វើការជំរុញទំនាក់ទំនងពាណិជ្ជកម្មជាមួយកម្ពុជា តាមរយៈការនាំចូលទំនិញជាច្រើនប្រភេទមកដាក់តាំងលក់នៅក្នុងពិព័រណ៍ពាណិជ្ជកម្មថៃនៅកម្ពុជា ហើយតាមការសង្កេត ពលរដ្ឋខ្មែរនិយមចូលចិត្តប្រើប្រាស់ផលិតផលថៃ ដោយបានអះអាងថា ផលិតផលថៃមានគុណភាពល្អនិងមានតម្លៃសមរម្យ។ ហើយកម្ពុជា គឺជាទីផ្សារសំខាន់សម្រាប់ការនាំចេញរបស់ថៃ។
នាពេលកន្លងមក ថ្នាក់ដឹកនាំកំពូលនៃប្រទេសទាំងពីរបានសម្រេចដាក់ចេញនូវគោលដៅពង្រីកទំហំពាណិជ្ជកម្មទ្វេភាគីរវាងកម្ពុជានិងថៃ ឲ្យបានដល់ ១៥ពាន់លានដុល្លារ នៅត្រឹមឆ្នាំ២០២០ខាងមុខ៕
None
