ជនអន្តោប្រវេសន៍អាស៊ីរាប់លាននាក់ ដែលរស់នៅលើទឹកដីសហរដ្ឋអាម៉េរិក កំពុងភ័យខ្លាចចំពោះវិធានការបណ្ដេញរបស់លោក ដូណាល់ ត្រាំ

បុរសជនជាតិឥណ្ឌាម្នាក់ ឈ្មោះ សាមូអែល (Samuel) វ័យ៤២ឆ្នាំ បានរស់នៅលើទឹកដីសហរដ្ឋអាម៉េរិក ចាប់តាំងពីឆ្នាំ២០១៣ មកម៉្លេះ។ ​ទោះបីជាលោកបានរៀបការជាមួយពលរដ្ឋអាម៉េរិក និងបើកអាជីវកម្មរកស៊ីនៅទីនោះយ៉ាងណាក្ដី ក៏លោកនៅតែខ្វះឋានៈជាពលរដ្ឋស្របច្បាប់។ ការវិលត្រលប់មកកាន់អំណាចជាថ្មីរបស់លោក ដូណាល់ ត្រាំ បានធ្វើឱ្យជនអន្តោប្រវេសន៍ខុសច្បាប់ដូចជា សាមូអែល (Samuel) ជាដើមកាន់តែមានការភ័យខ្លាច ខណៈដែលលោកប្រកាសដាក់ចេញវិធានការក្ដៅឱ្យបណ្ដេញជនអន្តោប្រវេសន៍ខុសចេញទ្រង់ទ្រាយធំចេញពីទឹកដីសហរដ្ឋអាម៉េរិក។

ទិន្នន័យបង្ហាញថា ប្រជាជនឥណ្ឌា បានក្លាយជាជនអន្តោប្រវេសន៍ខុសច្បាប់ដែលរស់នៅលើទឹកដីសហរដ្ឋអាម៉េរិកច្រើនជាងគេបំផុតក្នុងចំនួនរហូតដល់ទៅ៧២ម៉ឺន៥ពាន់នាក់ បន្ទាប់មកប្រជាជនចិនជាប់ចំណាត់ថ្នាក់លេខ២ ដែលមានចំនួន៣៧ម៉ឺន៥ពាន់នាក់ និងចំណាត់ថ្នាក់លេខ៣ គឺប្រជាជនហ្វីលីពីន ដែលមានចំនួន១៣ម៉ឺននាក់។

គិតមកទល់ពេលនេះ រដ្ឋបាលរបស់លោក ដូណាល់ ត្រាំ បានបណ្ដេញជនអន្តោប្រវេសន៍ប្រមាណ៧.៤០០នាក់ ចេញពីទឹកដីសហរដ្ឋអាម៉េរិកហើយ ដោយប្រើជើងហោះហើរយោធាដើម្បីបញ្ជូនពួកគេត្រលប់ទៅប្រទេសកំណើតរបស់ពួកគេវិញ ដូចជា ប្រទេសឥណ្ឌា និងប្រទេសចិន ជាដើម។

ការចាប់ខ្លួនជនអន្តោប្រវេសន៍បានកើនឡើងយ៉ាងគំហុក ដោយក្នុងមួយថ្ងៃមានចំនួនរហូតដល់ទៅប្រមាណ១ពាន់នាក់ឯណោះចាប់តាំងពីលោក ដូណាល់ ត្រាំ បានចូលកាន់តំណែងជាផ្លូវការនៅថ្ងៃទី២០ ខែមករា ឆ្នាំ២០២៥ មក។

សូមបញ្ជាក់ថា ជនអន្តោប្រវេសន៍ដើរតួនាទីយ៉ាងសំខាន់ក្នុងការបម្រើការងារក្នុងវិស័យដូចជាសំណង់ កសិកម្ម និងបដិសណ្ឋារកិច្ចជាដើម ហើយច្បាស់ណាស់ថា ការបណ្ដេញជនអន្តោប្រវេសន៍ខុសច្បាប់ទ្រង់ទ្រាយធំបែបនេះ នឹងធ្វើឱ្យឧស្សាហកម្មទាំងនេះជួបការរអាក់រអួល ឬរាំងស្ទះដោយសារខ្វះមនុស្សធ្វើការ៕

ដោយ: តែម សុខុម