ការរើប្រតិបត្តិការផលិតរបស់ក្រុមហ៊ុន មីនីបៀ មីតស៊ូមី ដែលជាអ្នកផ្គត់ផ្គង់វីដេអូហ្គេមរបស់ក្រុមហ៊ុនយក្ស Nintendo នាពេលនេះ គឺធ្វើឡើងបន្ទាប់ពីអាមេរិក កាលពីពេលថ្មីៗនេះ បានលុបចោលគម្រោងដាក់ទណ្ឌកម្មផ្នែកពន្ធគយលើឧបករណ៍វីដេអូហ្គេម ក្នុងចំណោមផលិតផលផ្សេងទៀត ដែលបាននាំចូលពីប្រទេសចិនទៅកាន់អាមេរិក។
ក្រុមហ៊ុន មីនីបៀ មីតស៊ូមី នឹងបង្ហាញពីគម្រោងការពង្រីកបន្ថែមនូវរោងចក្រផលិតរបស់ខ្លួនដែលមានទីតាំងនៅតំបន់សេដ្ឋកិច្ចពិសេសភ្នំពេញ ហើយគម្រោងនេះ នឹងមានការដំឡើងឧកបរណ៍វីដេអូហ្គេមសម្រាប់នាំចេញពេញសមត្ថភាពចាប់ពីឆ្នាំ២០២០ផងដែរ។
អត្ថបទទាក់ទង!
អ្នកនាំពាក្យរបស់ក្រុមហ៊ុនដដែលបានបញ្ជាក់ដែរថា មានផ្នែកខ្លះនៃផលិតកម្មបានចាប់ផ្ដើមហើយ តែយ៉ាងណាក្រុមហ៊ុនមិនទាន់អាចបង្ហាញនូវទំហំទឹកប្រាក់ដែលត្រូវបានវិនិយោគបន្ថែមនេះនៅឡើយទេ។ ទោះយ៉ាងណា អ្នកនាំពាក្យរូបនេះ បានឲ្យដឹងថា ក្រុមហ៊ុនគ្រោងនឹងបង្កើនផលិតកម្មនៅក្នុងប្រទេសកម្ពុជាជារួម ដែលបច្ចុប្បន្នក្រុមហ៊ុននេះ មានផលិតរួចហើយនូវផលិតផលមួយចំនួននៅកម្ពុជា ដូចជាគ្រាប់បាល់ អំពូលភ្លើង LED ក្រោមក្រុមហ៊ុនបុត្រសម្ព័ន្ធរបស់ខ្លួនឈ្មោះ Minebea Cambodia ហើយគ្រោងនឹងពង្រីកចំនួនកម្មករធ្វើការរហូតដល់២ម៉ឺននាក់ នៅ២ទៅ៣ឆ្នាំខាងមុខនេះ ពោលគឺពីចំនួនកម្មករដែលមានបច្ចុប្បន្ន៧ពាន់នាក់។
ក្រុមហ៊ុន Nintedo មានចំណែក១៦,៤% នៃការលក់របស់ក្រុមហ៊ុនមីនីបៀ មីតស៊ូមី នៅក្នុងឆ្នាំសារពើពន្ធរហូតដល់ខែមីនាឆ្នាំ២០១៩នេះ ហើយក្រុមហ៊ុននេះ ក៏ធ្លាប់បានប្រកាសផែនការកាលពីខែកក្កដាកន្លងទៅ អំពីគម្រោងការរបស់ខ្លួនក្នុងការរើសផ្នែកផលិតកម្មចេញពីប្រទេសចិន ទៅកាន់ប្រទេសវៀតណាមផងដែរ។
ក្រុមហ៊ុន មីនីបៀ មីតស៊ូមី បានបញ្ជាក់ថា ការសម្រេចចិត្តផ្លាស់ប្តូរផលិតកម្មនៃឧបករណ៍វីដេអូហ្គេមដ៏ពេញនិយមដែលខ្លួនបានផលិតនេះ គឺធ្វើឡើងដើម្បីគេចផុតពីភាពមិនច្បាស់លាស់នៃអនាគត រវាងសង្គ្រាមពាណិជ្ជកម្មអាមេរិក និងចិន។
សូមបញ្ជាក់ដែរថា កាលពីពេលកន្លងទៅថ្មីៗនេះដែរ ក្នុងជំនួបជាមួយនឹងសម្ដេចតេជោ ហ៊ុន សែន លោក យ៉ូស៊ីហ៊ីសា កៃនូម៉ា ប្រធានក្រុមហ៊ុន Minebea Cambodia បានឲ្យដឹងថា ក្រុមហ៊ុននេះ នឹងផលិតឧបករណ៍ក្មេងលេងដែលនឹងបិទស្លាកថា «ផលិតនៅកម្ពុជា (Made in Cambodia)» ដើម្បីធ្វើការនាំចេញទៅទីផ្សារពិភពលោក។
នៅក្នុងជំនួបនោះដែរ សម្ដេច ហ៊ុន សែន បានថ្លែងថា នេះជាមោទនភាពរបស់កម្ពុជាចំពោះការបិទស្លាកសញ្ញាសម្គាល់ប្រភពដើមផលិតនៅកម្ពុជាលើឧបករណ៍ក្មេងលេងនេះ។
បើតាមការអះអាងរបស់លោក យូស៊ីហ៊ីសា បានបញ្ជាក់ថា ក្រុមហ៊ុន Minebea Cambodia មានទុនវិនិយោគនៅកម្ពុជាប្រមាណ ៣៧២ លានដុល្លារកាលពីឆ្នាំ ២០១៨ ហើយក្រុមហ៊ុនរំពឹងថា ទុននេះនឹងកើនដល់ ៤០០ លានដុល្លារក្នុងឆ្នាំ ២០១៩ នេះ។ លោកបន្តថា ក្រៅពីផលិតផលឧបករណ៍ក្មេងលេង ក្រុមហ៊ុនក៏ផលិតអំពូលភ្លើងឆ្លាតវៃផងដែរ។
None
