អ្នកជំនាញហិរញ្ញវត្ថុ១៥,០០០នាក់នឹងមកជួបប្រជុំគ្នានៅទីក្រុងបាងកក ដែលកំពុងជួបវិបត្តិទឹកជំនន់

សារព័ត៌មាន Bloomberg បានរាយការណ៍ថា ស្របពេលដែលប្រតិភូហិរញ្ញវត្ថុជុំវិញពិភពលោករហូតដល់១៥,០០០នាក់នឹងធ្វើដំណើរមកទីក្រុងបាងកក ដើម្បីជួបប្រជុំគ្នាលើបញ្ហាសំខាន់ៗមួយចំនួនពាក់ព័ន្ធនឹងសេដ្ឋកិច្ច និងហិរញ្ញវត្ថុ តែទីក្រុងមួយនេះនៅមិនទាន់អាចដោះស្រាយវិបត្តិទឹកជំនន់បាននៅឡើយទេ ហើយថែមទាំងប្រឈមនឹងព្យុះភ្លៀងថ្មីបន្ថែមទៀត។
កិច្ចប្រជុំកំពូលនេះ គ្រោងប្រព្រឹត្តទៅចន្លោះពីថ្ងៃទី១២-១៨ ខែតុលា ប៉ុន្តែការព្យាករអាកាសធាតុបង្ហាញថា ចាប់ពីថ្ងៃទី១១-១៣ ខែតុលា ដែលជាថ្ងៃចាប់ផ្តើមបើកទ្វារកិច្ចប្រជុំ ទីក្រុងបាងកកនឹងត្រូវរងគ្រោះដោយព្យុះភ្លៀងជាថ្មី។ អ្វីដែលកាន់តែព្រួយបារម្ភនោះ គឺសមត្ថភាពស្តុកទឹក នៃទំនប់ជុំវិញទីក្រុងបាងកក បានកើនឡើងដល់៩១% ទៅហើយ។ កាលពីប៉ុន្មានថ្ងៃមុនភ្លៀងធ្លាក់ជាប់ៗគ្នា៣ថ្ងៃបានបណ្តាលឱ្យទីក្រុងបាងកក លិចលង់យ៉ាងធ្ងន់ធ្ងរ ប៉ះពាល់ដល់ជីវភាពពលរដ្ឋទូទាំងទីក្រុង និងរំខានដល់ជើងហោះហើរតាមផ្លូវអាកាសទៀតផង។
ស្ថិតក្នុងស្ថានភាពនេះ បានបង្ខំឱ្យលោក អានុទីន ឆានវីរៈគុល (Anutin Charnvirakul) នាយករដ្ឋមន្ត្រីថៃ បញ្ជាឱ្យគ្រប់ស្ថាប័នពាក់ព័ន្ធប្រញាប់ប្រញាល់ដោះស្រាយគ្រោះធម្មជាតិនេះជាបន្ទាន់ ដើម្បីការពារមុខមាត់ជាតិ។ អាជ្ញាធរថៃ ត្រូវបានណែនាំឱ្យត្រៀមលក្ខណៈទប់ទល់នឹងជំនន់ទឹកភ្លៀងធ្ងន់ធ្ងរ និងបញ្ចៀសការកកស្ទះចរាចរណ៍ តាមរយៈការត្រៀមរថយន្តធុនធំ និងរថយន្តសារ៉ែនបើកផ្លូវ ដើម្បីត្រៀមដឹកជញ្ជូនប្រតិភូប្រសិនបើផ្លូវថ្នល់ត្រូវបានជន់លិច, ដាក់ពង្រាយម៉ាស៊ីនបូមទឹកនៅជុំវិញទីក្រុង និងត្រៀមការពារធានាសុវត្ថិភាពចរាចរណ៍សម្រាប់ក្បួនរថយន្តប្រតិភូជាង៤០០គ្រឿង។
លោក ហាណារ៉ុង យ៉ាអូវ៉ាល័រ (Hannarong Yaowalers) អ្នកជំនាញធនធានទឹកថៃ បានព្រមានថា ទំនប់ទឹកជាច្រើនជុំវិញទីក្រុងបាងកក បានកើនឡើងលើសសមត្ថភាពផ្ទុកធម្មតារួចទៅហើយ។ ប៉ុន្តែអ្នកនាំពាក្យរដ្ឋាភិបាលថៃ បានអះអាងថា របាំងការពារទឹកជំនន់នៅតែអាចទ្រាំទ្របាន ដោយកម្រិតទឹកទន្លេបច្ចុប្បន្ននៅទាបជាងរបាំងការពារប្រហែល១ម៉ែត្រ ដែលនៅតែអាចទទួលទឹកបន្ថែមទៀត៕
ដោយៈ សរ សុជាតិ