អ្នកឧកញ៉ា សៀ ឫទ្ធី ៖ មុនចូលប្រឡូកក្នុងវិស័យជំនួញ យុវជនគួរចេញធ្វើការយកបទពិសោធន៍សិន តែកុំឲ្យលើស៥ឆ្នាំ

ក្នុងឱកាសធ្វើជាវាគ្មិនក្នុងសិក្ខាសាលាការតម្រង់ទិសសម្រាប់អាជីពការងារក្រោមប្រធានបទ«ការងារ ឬអាជីវកម្ម តើគួរជ្រើសរើសមួយណា? តើត្រូវត្រៀមខ្លួនអ្វីខ្លះ?»អ្នកឧកញ៉ា សៀ ឬទ្ធី ប្រធានក្រុមប្រឹក្សាភិបាលក្រុមហ៊ុនវើលដ៍ប៊្រីដគ្រុបបានចែករំលែកបទពិសោធន៍អាជីវកម្ម និងចំណេះដឹងជំនួញជាច្រើនដល់សិក្ខាកាម ដែលភាគច្រើនជាយុវជនក្នុងអង្គសិក្ខាសាលានេះ។ អ្នកជំនួញដ៏ល្បីល្បាញរូបនេះបានផ្តល់ជាគំនិតថា យុវជនគ្រប់រូបដែលគ្មានមុខជំនួញក្នុងដៃ ឬមិនចង់បន្តអាជីវកម្មពីឪពុកម្តាយ គួរទៅធ្វើការឲ្យគេសិន មុនឈានទៅបង្កើតអាជីវកម្មដោយខ្លួនឯង ព្រោះការធ្វើបែបនេះអាចឲ្យយុវជនទទួលបានបទពិសោធន៍ និងចំណេះដឹងនៃការធ្វើជំនួញ ដែលអាចជួយកាត់បន្ថយហានិភ័យនៃភាពបរាជ័យ។

ការផ្តល់គំនិតបែបនេះ ក៏ដោយសារអ្នកឧកញ៉ា សៀ ឫទ្ធី មុនក្លាយជាអ្នកជំនួញដ៏ល្បីល្បាញមួយរូបនៅកម្ពុជា ក៏ធ្លាប់ឆ្លងកាត់បទពិសោធន៍ធ្វើការឲ្យគេដូចគ្នាដែរ។ ហើយសម្រាប់ការធ្វើការឲ្យគេទៀតសោត អ្នកឧកញ៉ា សៀ ឫទ្ធី ជំរុញឲ្យយុវជនត្រូវជ្រើសរើសការងារណា ដែលត្រូវនឹងចំណង់ចំណូលចិត្ត និងអាចយកធ្វើជាបទពិសោធន៍ និងជាគំរូសម្រាប់ការបើកអាជីវកម្មនាពេលអនាគត។ ពោលគឺយុវជនគួរជៀសវាងធ្វើការតែដើម្បីប្រាក់ខែ និងការងារណាដែលខ្លួនគិតថា មិនអាចយកធ្វើជាបទពិសោធន៍សម្រាប់បម្រើឲ្យអាជីវកម្មខ្លួននាថ្ងៃអនាគត។ ក្រៅសិក្សាបទពិសោធន៍គំនិតអាជីវកម្មពីកន្លែងការងារ ក្នុងអំឡុងពេលធ្វើការឲ្យគេ យុវជនត្រូវចេះអភិវឌ្ឍសមត្ថភាពតាមរយៈការសិក្សារៀនសូត្របន្ថែម និងចេះបង្កើតការងារថ្មីៗ ដែលអាចជួយបង្កើនសមត្ថភាព។

ទោះបីយ៉ាងនេះក្តី អ្នកឧកញ៉ា សៀ ឫទ្ធី មិនលើកទឹកចិត្តឲ្យយុវជនធ្វើការងារឲ្យគេច្រើនឆ្នាំពេកនោះទេ បើទោះបីការធ្វើបែបនេះអាចជួយឲ្យយុវជនអាចទទួលបានបទពិសោធន៍ លំហូរសាច់ប្រាក់នឹងនរ និងបង្កើតចំណងមិត្តភាពក៏ដោយ។ សម្រាប់អ្នកឧកញ៉ា សៀ ឫទ្ធី យុវជនដែលមានបំណងចង់បង្កើតអាជីវកម្មដោយខ្លួនឯងមិនគួរធ្វើការឲ្យគេលើសពី៥ឆ្នាំនោះឡើយ ព្រោះវាអាចធ្វើឲ្យបាត់បង់ឱកាសក្នុងការប្រកបអាជីវកម្ម និងភាពរីកធំធាត់ហិរញ្ញវត្ថុជាដើម។

គួរបញ្ជាក់ផងដែរថា សិក្ខាសាលា "ការតម្រង់ទិសសម្រាប់អាជីវកម្មការងារ" ក្រោមប្រធានបទ "ការងារ ឬអាជីវកម្ម តើគួរជ្រើសរើសមួយណា? តើត្រូវត្រៀមខ្លួនអ្វីខ្លះ?" ដែលរៀបចំដោយ MR Training and Jobs Center នៅមជ្ឈមណ្ឌលម៉ានី ក្នុងអាគារ KAMPUS ធ្វើឡើងក្នុងគោលបំណងចែករំលែកចំណេះដឹង ក្នុងវិស័យធុរកិច្ច និងសហគ្រិនជោគជ័យដល់យុវជនដែលកំពុងសិក្សានៅមហាវិទ្យាល័យ និងអ្នកដែលកំពុងស្វែងរកការងារ ឬចង់ចាប់ផ្តើមអាជីវកម្ម។

ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា ដែលធ្វើជាធិបតីភាពក្នុងពិធីបិទសិក្ខាសាលាខាងលើបានជំរុញឲ្យសិក្ខាកាមដែលភាគច្រើនជាយុវជនត្រូវខិតខំសិក្សាស្វែងយល់ពីបទពិសោធន៍ជោគជ័យរបស់អ្នកជំនួញ និងពង្រឹងសមត្ថភាពបន្ថែម ដើម្បីបំពេញក្តីស្រមៃ ដែលចង់ក្លាយជាអ្នកជំនួញនាពេលអនាគត។ ទន្ទឹមនឹងអរគុណដល់វាគ្មិន ដែលបានចែករំលែកបទពិសោធន៍ និងចំណេះដឹងជំនួញដល់យុវជន ឯកឧត្តម បានក្រើនរំលឹកឲ្យយុវជនខិតខំតស៊ូ មានទំនួលខុសត្រូវ និងមានក្ដីសង្ឃឹមជឿជាក់លើសមត្ថភាពខ្លួនឯង៕