ផែនការប្រើប្រាស់បច្ចេកវិទ្យារបស់ក្រុមហ៊ុនតូយ៉ូតា ដែលជាអ្នកផលិតរថយន្តជប៉ុនដ៏ធំ គ្របដណ្តប់លើទិដ្ឋភាពផ្សេងៗគ្នាជាច្រើន ក្នុងនោះមានការអភិវឌ្ឍបន្ទុកថាមពលឬអាគុយជំនាន់ក្រោយ និងការរចនារោងចក្រធ្វើរថយន្តឡើងវិញទៀតផង។ ផែនការបច្ចេកវិទ្យាដែលត្រូវបានប្រកាសកាលពីថ្ងៃអង្គារមានលក្ខណៈពេញលេញបំផុតនៅក្នុងផែនការរួមរបស់ក្រុមហ៊ុនផលិតរថយន្តតូយ៉ូតា សំដៅប្រកួតប្រជែងនៅក្នុងទីផ្សាររថយន្តអគ្គិសនី ដែលកំពុងរីកចម្រើនយ៉ាងឆាប់រហ័ស និងដែលនាំមុខដោយគូប្រជែងនានា ដូចជាក្រុមហ៊ុន Tesla ជាដើម។
ក្រុមហ៊ុន Toyota បាននិយាយថា ខ្លួនមានបំណងបំពាក់អាគុយលីចូម-អ៊ីយ៉ុងជំនាន់ក្រោយឱ្យរថយន្តអគ្គិសនីរបស់ខ្លួនចាប់ពីឆ្នាំ ២០២៦ តទៅ។ អាគុយនេះនឹងធ្វើឱ្យរថយន្តរត់បានឆ្ងាយជាងមុន ហើយសាកភ្លើងឆាប់ពេញជាងមុន។ ទន្ទឹមនឹងនេះ ក្រុមហ៊ុនតូយ៉ូតាក៏បានប្រកាសអំពី"របកគំហើញបច្ចេកវិជ្ជា"ដែលនឹងធ្វើឱ្យអាគុយស្ងួតកាន់តែធន់ជាងមុន ដោយខ្លួនកំពុងបង្កើតមធ្យោបាយផលិតអាគុយប្រភេទនេះឱ្យបានយ៉ាងច្រើននិងរហ័ស ដើម្បីធ្វើពាណិជ្ជកម្មចាប់ពីឆ្នាំ ២០២៧ ឬឆ្នាំ ២០២៨ តទៅ។
អត្ថបទគួរអាន
សូមរំលេចថា អាគុយស្ងួតអាចផ្ទុកថាមពលបានច្រើនជាងអាគុយទឹកឬអាគុយសើមបច្ចុប្បន្ន ប៉ុន្តែអាគុយប្រភេទនេះមានតម្លៃថ្លៃ ហើយទំនងជានៅតែថ្លៃយូរឆ្នាំទៅមុខទៀត។ ជាគោលដៅទីផ្សារ គឺក្រុមហ៊ុន Toyota នឹងផលិតរថយន្តអគ្គិសនីបំពាក់ដោយលីចូម-អ៊ីយ៉ុង ដែលមានប្រសិទ្ធភាពជាងមុន និងដែលអាចឱ្យរថយន្តរត់បានចម្ងាយ ១ ០០០ គីឡូម៉ែត្រ នៅពេលដែលរថយន្តអគ្គិសនីរបស់ក្រុមហ៊ុន Tesla ដែលលក់ដាច់ជាងគេលើពិភពលោក អាចរត់បានចម្ងាយប្រហែល ៥៣០ គីឡូម៉ែត្រប៉ុណ្ណោះ បើផ្អែកតាមបទដ្ឋានសហរដ្ឋអាមេរិក។ លើសពីនេះទៅទៀត ក្រុមហ៊ុន Toyota បាននិយាយថា រថយន្តអគ្គិសនី ដែលប្រើអាគុយស្ងួតនឹងរត់បានចម្ងាយ ១ ២០០ គីឡូម៉ែត្រ ហើយត្រូវការថេរវេលាសាកអាគុយត្រឹមតែ ១០ នាទីប៉ុណ្ណោះ ខណៈដែលរថយន្តអគ្គិសនីរបស់ក្រុមហ៊ុន តេស្លា អាចចរបាន ៣២១ គីឡូម៉ែត្រ ហើយត្រូវការថេរវេលាសាកអាគុយ ១៥ នាទី។
ផែនការលម្អិត ក្រោមការដឹកនាំរបស់នាយកប្រតិបត្តិថ្មី ឈ្មោះ ខូជី សាតុ (Koji Sato) ក្រុមហ៊ុន Toyota បានអនុម័តការកែប្រែជាច្រើន ដែលវិស្វករ និងអ្នករៀបចំផែនការបាននិងកំពុងអភិវឌ្ឍអស់រយៈពេលជាច្រើនខែ ទុកឱ្យក្រុមហ៊ុនជ្រើសរើស។
លោក តាកេរ៉ូ កាតុ (Takero Kato) ប្រធានផ្នែករោងចក្ររថយន្តអគ្គិសនីប្រើថាមពលអាគុយ នៅក្រុមហ៊ុនតូយ៉ូតា បានអះអាងថា រោងចក្ររថយន្តអគ្គិសនីដើរដោយថាមពលអាគុយ ដែលត្រូវបានបង្កើតឡើងក្នុងខែឧសភា មានបំណងផលិតរថយន្តឱ្យបានប្រហែល ១ លាន ៧ សែនគ្រឿងនៅឆ្នាំ ២០៣០ ។ នៅក្នុងខែមេសា ឆ្នាំ ២០២៣ នេះ ក្រុមហ៊ុនផលិតរថយន្តតូយ៉ូតាបានលក់រថយន្តអគ្គិសនីចំនួនជាង ៨ ពាន់គ្រឿងនៅទូទាំងពិភពលោក ក្នុងនោះមានទាំងរថយន្តម៉ាក Lexus ដែរ។ ដោយឡែក នៅក្នុងឆ្នាំ ២០២២ ក្រុមហ៊ុន Toyota បានលក់រថយន្តទាំងអស់ជិត ១០ លាន ៥ សែន គ្រឿង ហើយមានតម្លៃទីផ្សារសរុបប្រហែល ២៥៤ ពាន់លានដុល្លារ៕
