លោក Natsuo Yamaguchi ប្រធានគណបក្ស Komeito គ្រោងនឹងធ្វើទស្សនកិច្ចនៅប្រទេសចិនចាប់ពីថ្ងៃទី២៨-៣០ខែសីហា ដោយសង្ឃឹមជួបជាមួយប្រធានាធិបតីចិនលោក Xi Jinping ដើម្បីប្រគល់សំបុត្រផ្ទាល់ខ្លួនមួយទៅឱ្យមេដឹកនាំចិនរូបនេះ ពីនាយករដ្ឋមន្ត្រីជប៉ុនលោក Fumio Kishida។
អត្ថបទគួរអាន
តាមសេចក្តីប្រកាសរបស់គណបក្សខាងលើ ភាគីចិនថា «ពេលវេលាបច្ចុប្បន្ននេះ គឺមិនសមស្របឱ្យមានជំនួបនេះ ដោយលើកពីស្ថានភាពបច្ចុប្បន្ននៃទំនាក់ទំនងជប៉ុន-ចិន» ប៉ុន្ដែ មិនបានបញ្ជាក់អំពីមូលហេតុច្បាស់លាស់ឡើយ។ ទន្ទឹមគ្នានេះ ក្រសួងការបរទេសចិនក៏មិនទាន់បានឆ្លើយតបភ្លាមៗ ចំពោះសំណើសុំការបំភ្លឺដោយអ្នកសារព័ត៌មានដែរ។ យ៉ាងណាក៏ដោយចុះ គណបក្ស Komeito បន្ថែមថា ខ្លួនសង្ឃឹមនឹងអាចកែសម្រួលពេលវេលាសមស្របណាមួយនាពេលអនាគត សម្រាប់ដំណើរទស្សនកិច្ចនេះ។
គេអាចដឹងថា ទំនាក់ទំនងរវាងចិន-ជប៉ុនបានធ្លាក់ចុះខ្លាំងនៅមួយរយៈពេលចុងក្រោយនេះ ដោយសារបញ្ហាមួយចំនួន។ ក្នុងនោះ កាលពីសប្ដាហ៍មុននេះ ប្រទេសជប៉ុនបានចាប់ផ្តើមបញ្ចេញទឹកវិទ្យុសកម្មចេញពីរោងចក្រថាមពលនុយក្លេអ៊ែរ Fukushima ចូលទៅក្នុងមហាសមុទ្រប៉ាស៊ីហ្វិក បើទោះបីជា មានការជំទាស់ទាំងក្នុងនិងក្រៅប្រទេស រួមទាំងប្រទេសចិនដែបានថ្កោលទោសចំពោះទង្វើនេះក៏ដោយ។ ជាការឆ្លើយតប ទីក្រុងប៉េកាំងក៏បានចេញបម្រាមលើការនាំចូលផលិតផលជលផលទាំងអស់រួមទាំងត្រី និងគ្រឿងសមុទ្រពីប្រទេសជប៉ុនបណ្តោះអាសន្នផងដែរ៕
