លោក Le Trung Hieu អគ្គនាយករងនៃ ការិយាល័យស្ថិតិទូទៅវៀតណាម បានអះអាងថា តាមការរំពឹងទុក សេដ្ឋកិច្ចវៀតណាម នឹងកើនឡើង៨% នៅឆ្នាំ២០២២ បើទោះបីជា នៅត្រីមាសកន្លងទៅនេះ ស្ថានភាពសេដ្ឋកិច្ចមិនសូវជាអំណោយផលក្ដី។
សេដ្ឋកិច្ចវៀតណាម នៅ៩ខែដំបូងនៅឆ្នាំ២០២២ បានកើនឡើងជាង ៨,៨% ដែលជាកំណើនមួយខ្ពស់បំផុតមិនធ្លាប់មានគិតតាំងពីឆ្នាំ២០១១មក ហើយកំណើននេះទៀតសោត ត្រូវបានរួមចំណែកដោយកំណើនជិត ១៣,៧% នៅត្រីមាសទី៣។
អ្នកជំនាញផ្នែកស្រាវជ្រាវសេដ្ឋកិច្ចតំបន់អាស៊ីរបស់ធនាគារ HSBC បាននិយាយថា វៀតណាមគឺជាប្រទេស ដែលមានសេដ្ឋកិច្ចដ៏លេចធ្លោមួយ នៅអំឡុងពេលដែលសេដ្ឋកិច្ចសាកលកំពុងតែអាប់អួ។ អ្នកជំនាញសេដ្ឋកិច្ចបន្ថែមថា សេដ្ឋកិច្ចសកលកំពុងប្រឈមនឹងបញ្ហាអតិផរណាកើនឡើង តម្រូវការប្រើប្រាស់នៅអឺរ៉ុបមានការធ្លាក់ចុះ ដោយសារតែតម្លៃថាមពលក្នុងតំបន់នោះហក់កើនឡើងខ្ពស់។
បន្ថែមពីនេះ បញ្ហាវិស័យអចលនទ្រព្យនៅប្រទេសចិនធ្លាក់ចុះ និងគោលនយោបាយគ្មានកូវីដ១៩របស់ប្រទេសនេះ ក៏បានធ្វើឲ្យប៉ះពាល់ដល់អំណាចនៃការបញ្ជាទិញផងដែរ។ ស្ថានភាពនេះ ក៏បានធ្វើឲ្យប៉ះពាល់មកដល់ប្រទេសវៀតណាមដែរ ប៉ុន្ដែ បើមើលជារួមវៀតណាមនៅតែមានភាពធន់ក្នុងការទ្រទ្រង់ការលំបាកទាំងនេះ។
ធនាគារ HSBC ដែលមានមូលដ្ឋាននៅហុងកុង បានប៉ាន់ប្រមាណសេដ្ឋកិច្ចវៀតណាមនៅឆ្នាំ២០២២នេះថានឹងកើនឡើង ៦,៩% ជាកម្រិតកំណើនខ្ពស់បំផុតនៅក្នុងតំបន់អាស៊ីអាគ្នេយ៍ ខណៈដែលធនាគារអភិវឌ្ឍអាស៊ីវិញ បានព្យាករថានឹងមានកំណើន៦,៥%។
អត្ថបទគួរអាន
ដោយឡែក តាមការព្យាករថ្មីចុងក្រោយរបស់ធនាគារពិភពលោកចំពោះកំណើនសេដ្ឋកិច្ចវៀតណាមវិញ គឺមាន៧,២% នៅឆ្នាំ២០២២ ជាកំណើនមួយខ្ពស់ជាងគេបំផុតនៅក្នុងតំបន់អាស៊ីបូព៌ា និងប៉ាស៊ីហ្វិក។ វៀតណាមក៏ត្រូវបានគេរំពឹងថា នឹងបន្ដជាប្រទេសដែមានកំណើនសេដ្ឋកិច្ចឆាប់រហ័សបំផុតនៅក្នុងតំបន់អាស៊ីនៅឆ្នាំ២០២៣។
ទោះជាយ៉ាងណា ប្រទេសក្បែរខាងកម្ពុជាមួយនេះ នៅតែប្រឈមនឹងការរងផលប៉ះពាល់ ដោយសារតែបញ្ហាសកលមួយចំនួន ដូចជាបញ្ហាតម្លៃថាមពលឡើងថ្លៃ និងសម្ភារវត្ថុធាតុដើមឡើងថ្លៃជាដើម។
ប្រធានសភាពាណិជ្ជគម្មអឺរ៉ុបប្រចាំវៀតណាម លោក Alain Cany បានគូសបញ្ជាក់ថា ផលតិផលទំនិញប្រើប្រាស់ វាយណ្ឌ និងអេឡិចត្រូនិក កំពុងចាប់ផ្ដើមដំឡើងថ្លៃកាន់តែខ្ពស់ ដោយសារតែផលរំខាននៃខ្សែចង្វាក់ផ្គត់ផ្គង់ ដែលបង្កឡើងដោយវិបត្តិសង្គ្រាមរុស្ស៊ី និងអ៊ុយក្រែន និងបញ្ហារឹតបន្ដឹងវិធានការគ្មានកូវីដ១៩របស់ទីក្រុងប៉េកាំងជាដើម។ ប្រទេសវៀតណាម អាចប្រឈមបញ្ហាលើការនាំចូលវត្ថុធាតុដើម ប្រសិនបើប្រទេសចិន បន្ដពង្រីការបិទខ្ទប់របស់ខ្លួន ព្រោះមានដល់ទៅ ៥៥% នៃវត្ថុធាតុដើម និងគ្រឿងប្រើប្រាស់នាំចូលរបស់វៀតណាម គឺបាននាំចូលពីប្រទេសចិន។ ដោយឡែក ចំពោះការនាំចេញវិញ វៀតណាមក៏អាចជួបផលប៉ះពាល់ដោយសារតែបញ្ហាតម្រូវការធ្លាក់ចុះទាបនៅតំបន់អឺរ៉ុប អាមេរិក និងទីផ្សារចិនផងដែរ។ នេះបើតាមការអះអាងរបស់អ្នកជំនាញសេដ្ឋកិច្ចរបស់ធនាគារ HSBC៕
