តើអ្នកជំនាញយល់ឃើញបែបណាចំពោះដំណើរទស្សនកិច្ចរបស់សម្ដេច ហ៊ុន ម៉ាណែត ទៅប្រទេសម៉ាឡេស៊ី?

លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិកម្ពុជា នៃរាជបណ្ឌិត្យសភាកម្ពុជា យល់ឃើញថា ដំណើរទស្សនកិច្ចលើកដំបូងនៅប្រទេស ម៉ាឡេស៊ី នឹងក្លាយជាឱកាសមួយនៃការឧទ្ទេសនាមខ្លួនរបស់សម្ដេចធិបតី ហ៊ុន ម៉ាណែត ដែលទើបឡើងកាន់តំណែង ដែលការឧទ្ទេសនាមនេះ គឺជាប្រពៃណីនៅក្នុងតំបន់អាស៊ាន។

ក្រៅពីនេះ ដំណើរទស្សនកិច្ចនេះនឹងធ្វើឱ្យកម្ពុជា ទទួលបាននូវផលប្រយោជន៍ខាងផ្នែកនយោបាយ ការទូត ដែលជាឱកាសដែលប្រទេសទាំងពីរអាចពង្រឹង និងពង្រីកនូវកិច្ចសហការទ្វេភាគីឱ្យកាន់តែល្អ គ្រប់ជ្រុងជ្រោយ។ អ្នកជំនាញរូបនេះជឿថា នៅក្នុងដំណើរទស្សនកិច្ចផ្លូវការនេះដែរ ភាគីទាំងពីរនឹងពិភាក្សាពីការវិនិយោគ និងការធ្វើពាណិជ្ជកម្ម ព្រមទាំងពាក់ព័ន្ធនឹងពលករខ្មែរ ដែលបម្រើការងារនៅទីនោះ អំពីសិទ្ធិនិងផលប្រយោជន៍តាមច្បាប់។

បើតាមលោកបណ្ឌិត គិន ភា នៅក្នុងដំណើរទស្សនកិច្ចរបស់សម្ដេច ហ៊ុន ម៉ាណែត ក៏អាចនឹងមានការពិភាក្សាអំពីការការទប់ស្កាត់ និងមិនអនុញ្ញាតចំពោះការយកទឹកដីប្រទេសណាមួយមកប្រឆាំងនឹងរដ្ឋាភិបាល ឬការជ្រៀតជ្រែកផ្ទៃក្នុងរវាងប្រទេសទាំងពីរនោះដែរ។

ពាក់ព័ន្ធនឹងទំនាក់ទំនងរវាងថ្នាក់ដឹកនាំប្រទេស ម៉ាឡេស៊ី-កម្ពុជា ត្រូវបានប្រធានវិទ្យាស្ថានទំនាក់ទំនងអន្តរជាតិកម្ពុជា នៃរាជបណ្ឌិត្យសភាកម្ពុជា ជឿថា នឹងមានកិច្ចសហការកាន់តែស៊ីជម្រៅគ្រប់ជ្រុងជ្រោយបន្ថែមទៀត ដ្បិតថ្នាក់ដឹកនាំបន្តវេននិងគោលនយោបាយរបស់គណបក្សប្រជាជនកម្ពុជា គឺពុំមានអ្វីផ្លាស់ប្ដូរនោះទេ។

សូមបញ្ជាក់ថា ពាណិជ្ជកម្មទ្វេភាគីរវាងប្រទេសកម្ពុជា-ម៉ាឡេស៊ី ក្នុងឆ្នាំ២០២៣ មានទំហំជាង៦៣២លានដុល្លារ ពោលគឺមានការកើនឡើងជិត ២% បើធៀបនឹងឆ្នាំ២០២២។ ក្នុងនោះ កម្ពុជានាំចេញទៅ ម៉ាឡេស៊ីមានជាង១០០លានដុល្លារ ធ្លាក់ចុះជាង ៦%។ នេះបើយោងតាមទិន្នន័យពីអគ្គនាយកដ្ឋានគយ និងរដ្ឋាករកម្ពុជា៕

អត្ថបទ៖ បូ ដូឡា