រដ្ឋមន្ត្រី ក្រសួងហិរញ្ញវត្ថុសាំងហ្គាពួរ គឺលោក Heng Swee Keat បាននិយាយនាពេលថ្មីៗនេះថា រដ្ឋាភិបាលនឹងកំណត់បែងចែកថវិកាប្រមាណ ជាង ៥៧០ លានដុល្លារអាមេរិក ដើម្បីប្រយុទ្ធប្រឆាំងនឹងការរីករាលដាលនៃវីរុស Covid 19 នៅក្នុងប្រទេសរបស់ខ្លួន និងរៀបចំនូវថវិកាប្រមាណ ៤ពាន់លានដុល្លារអាមេរិកផ្សេងទៀត គឺនឹងត្រូវផ្ដល់ជូនសម្រាប់ការគាំទ្រសេដ្ឋកិច្ច នៅក្នុងវិស័យអាជីវកម្ម និងអ្នកប្រើប្រាស់។
លោក Heng បាននិយាយនៅក្នុងសភាកាលពីពេលថ្មីៗនេះថា ឆ្នាំនេះ សាំងហ្គាពួរបានចូលដល់ទសវត្សរ៍ថ្មីមួយ ដែលត្រូវបានកត់សម្គាល់ដោយការផ្លាស់ប្ដូរបរិយាកាសនៅក្នុងប្រតិបត្តិការ និងភាពមិនប្រាកដប្រជាធំៗ។ លោកបន្ថែមថា រដ្ឋាភិបាល បាននិងកំពុងខិតខំប្រឹងប្រែងដើម្បីបន្ថយ ល្បឿននៃការរីករាលដាលនៃវីរុស Covid 19 នៅក្នុងប្រទេសសាំងហ្គាពួរ។
អត្ថបទទាក់ទង!
ភាគច្រើននៃទឹកប្រាក់ប្រមាណជាង ៥៧០ លានដុល្លារអាមេរិក សម្រាប់គាំទ្រដល់ការប្រយុទ្ធប្រឆាំងនៃការរីករាលដាលនៃវីរុស Covid 19 នោះ នឹងត្រូវផ្ដល់ទៅឲ្យក្រសួងសុខាភិបាល។ រីឯទឹកប្រាក់ប្រមាណ ៤ពាន់លានដុល្លារផ្សេងទៀត នឹងត្រូវដកយកជាង ២.៨០០ លានដុល្លារ សម្រាប់ប្រើប្រាស់គាំទ្រដល់អាជីវកម្ម និងការចំណាយលើប្រាក់បៀវត្សរ៍បុគ្គលិក និងទឹកប្រាក់នៅសេសសល់ គឺយកទៅប្រើសម្រាប់ជួយដល់អ្នកប្រើប្រាស់ក្នុងការចំណាយលើការរស់នៅប្រចាំថ្ងៃ ពិសេសគឺ គ្រួសារដែលមានប្រាក់ចំណូលទាប។
គិតមកទល់ថ្ងៃទី ១៩ កុម្ភៈនេះ សាំងហ្គាពួរមានករណីឆ្លងវីរុស Covid 19 កើនឡើងដល់ចំនួន ជាង ៧០ ករណី ហើយរដ្ឋាភិបាលប្រទេសនេះ បានមើលឃើញថា ផលប៉ះពាល់មកលើសេដ្ឋកិច្ច ដោយសារតែវីរុសឆ្លងនេះ គឺមានឥទ្ធិពលខ្លាំងជាង ការរីករាលដាលនៃជំងឺរលាកផ្លូវដង្ហើម SARS កាលពីឆ្នាំ២០០៣ ទៅទៀត៕
None
