ក្រុមហ៊ុន Huons Global នឹងដឹកនាំក្រុមហ៊ុនក្នុងស្រុកកូរ៉េខាងត្បូង ៣ទៀត គឺក្រុមហ៊ុន Prestige BioPharma, Humedix និង Boran Pharma នៅក្នុងគម្រោងនេះ ដែលនឹងចាប់ផ្ដើមផលិតវ៉ាក់សាំងគំរូដំបូង នៅខែសីហា ខាងមុខនេះ ដើម្បីឆ្លើយតបទៅនឹងតម្រូវការការផ្គត់ផ្គង់ពីមូលនិធិវិនិយោគផ្ទាល់រុស្ស៊ី (RDIF) ។ នេះបើយោងតាមការផ្សាយរបស់ ស៊ីអិនប៊ីស៊ី ។
សម្រាប់ដំណើរការផលិតនេះ សម្ព័ន្ធក្រុមហ៊ុនទាំង៤ខាងលើ នឹងស្ថាបនារោងចក្រថ្មីមួយ ។ ដំណឹងនេះបានធ្វើឲ្យតម្លៃហ៊ុនរបស់ក្រុមហ៊ុន Huons Global បានកើនឡើង ២៩% នៅក្នុងអំឡុងពេលជួញដូរនាព្រឹកថ្ងៃសុក្រនេះ ។
អត្ថបទទាក់ទង
គួរបញ្ជាក់ថា វ៉ាក់សាំងកូវីដ-១៩របស់រុស្ស៊ី ឈ្មោះ Sputnik V នេះ មួយរយៈចុងក្រោយនេះ បានទទួលការគាំទ្រពីប្រទេសនានាកាន់តែច្រើនឡើង ខណៈដែលពិភពលោកកំពុងជួបប្រទះនឹងរលកទី៣នៃការឆ្លងរាតត្បាតនៃវីរុសកូវីដ-១៩ ។
នៅដើមសប្ដាហ៍នេះ ឥណ្ឌាដែលជាប្រទេសផលិតវ៉ាក់សាំងធំបំផុតមួយនឹងគេដែរនោះ ក៏បានអនុម័តសម្រេចប្រើប្រាស់វ៉ាក់សាំង Sputnik V របស់រុស្ស៊ី ផងដែរ ហើយបើតាមមន្ត្រីការទូតឥណ្ឌាប្រចាំទីក្រុងមូស្គូ បានឲ្យដឹងថា វ៉ាក់សាំង Sputnik V គ្រោងនឹងដឹកជញ្ជូនទៅឲ្យឥណ្ឌា នៅដំណាច់ខែមេសានេះ ។
ចំណែកឯនៅអឺរ៉ុបវិញ ទីភ្នាក់ងារឱសថអឺរ៉ុបកំពុងធ្វើការពិនិត្យទៅលើវ៉ាក់សាំងរុស្ស៊ី ខណៈដែលប្រទេសនៅអឺរ៉ុបជាច្រើនកំពុងខិតខំបង្កើនការចាក់វ៉ាក់សាំងឲ្យប្រជាជនរបស់ខ្លួន ដែលត្រូវបានប៉ះពាល់ដោយសារតែការផ្គត់ផ្គង់វ៉ាក់សាំងយឺតយ៉ាវ ៕ (ប្រភព៖ ស៊ីអិនប៊ីស៊ី)
