ហាងកាហ្វេ Starbucks សាខាថ្មីមួយ នៅតៃវ៉ាន់ បានសាងសង់ឡើង ដោយសម្បកទូកុងតឺន័រចាស់ៗ ២៩ ទូ មកតំរៀបគរពីលើគ្នាធ្វើជាហាងកាហ្វេ និងមានទំហំប្រមាណ ៣២០ ម៉ែត្រការ៉េ។ ហាងថ្មីមួយនេះ ត្រូវបានគេចាត់ទុកថា គឺជាការច្នៃប្រឌិតថ្មីមួយ ប្លែកមិនធ្លាប់មាននៅក្នុងទីក្រុងតៃវ៉ាន់។ មិនតែប៉ុណ្ណោះ ក្រុមហ៊ុនកាហ្វេ Starbucks ក៏មានផែនការពង្រីកហាងទូកុងតឺន័រនេះ បន្ថែមទៀត នៅពេលខាងមុខផងដែរ។
សាខាថ្មី នៅតៃវ៉ាន់អាចនិយាយបានថា គឺជាសាខាដំបូងបំផុតរបស់ Starbucks ដែលយកទូកុងតឺន័រមកធ្វើជាហាងកាហ្វេទាំងស្រុងតែម្ដង ដោយមិនមានសាងសង់អគារឡើយ ខណៈដែលកន្លងមក Starbucks មានជាង ៤០ សាខានៅទូទាំងពិភពលោក បានប្រើប្រាស់ទូកុងតឺន័រ មករចនាបន្ទាប់បន្សំនៅក្នុងហាងកាហ្វេរបស់ខ្លួនប៉ុណ្ណោះ។
អត្ថបទទាក់ទង!
ហាងកាហ្វេ Starbucks កុងតឺន័រនេះ ត្រូវបានគេរំពឹងថា អាចនឹងមានវត្តមាននៅប្រទេសជប៉ុននៅពេលឆាប់ៗខាងមុខផងដែរ។
ទោះយ៉ាងណា Starbucks នៅកម្ពុជា មានជាច្រើនសាខា គេមិនទាន់ឃើញ មានប្រើប្រាស់ទូកុងតឺន័រមកធ្វើជាហាងកាហ្វេនៅឡើយទេ ខណៈដែលគំរូហាងនេះ ហាក់បាននិងកំពុងរលត់បាត់ខ្លួនពីលើទីផ្សារជាបន្តបន្ទាប់។
បើគិតមកទល់បច្ចុប្បន្ននេះ នៅកម្ពុជា ផ្សារកុងតឺន័រដែលធ្លាប់តែមនុស្សចេញចូលព្រោងព្រាត កាលពីគ្រាបើកដំបូងៗ បានសម្រេចបិទទ្វារ រុះរើឥវ៉ាន់ចេញគ្មានសល់ ខណៈដែលហាងកុងតឺន័រខ្លះទៀត បើកបានតែប៉ុន្មានខែ អត់មានភ្ញៀវចូល ក៏បានសម្រេចបិទទ្វារចោលដែរ និងមានខ្លះទៀត សាងសង់មិនទាន់រួចរាល់ស្រួលបួលផងបានសម្រេចបិទចោលវិញទាំងមិនបានបើកលក់ផង។
អត្ថបទគួរឲ្យចាប់អារម្មណ៍!
គួរជម្រាបថា កាហ្វេ Starbucks បានចូលមកក្នុងទីផ្សារកម្ពុជា នៅអំឡុងខែតុលា ឆ្នាំ២០១៦ ខណៈដែលបច្ចុប្បន្ន មានជាង ១០សាខាហើយ ក្នុងនោះមាន ២សាខានៅខេត្តសៀមរាប។
គិតមកទល់ពេលនេះ ម៉ាកហាងកាហ្វេ ដែលមានវ័យជាង ៤០ឆ្នាំមួយនេះ មានសាខាចំនួន ២៤.០០០ ហាង ជាមួយទីផ្សារមាននៅជាង ៧៥ ប្រទេស នៅទូទាំងពិភពលោក៕
None
