តាមការរាយការណ៍ពីសារព័ត៌មានរ៉យទ័រ កោះតៃវ៉ាន់ បាននិយាយលើកឡើងជាច្រើនលើកច្រើនសារថា ប្ដេជ្ញានឹងការពារដែនកោះរបស់ខ្លួនប្រសិនបើមានការវាយប្រហារណាមួយកើតឡើង ប៉ុន្ដែ កោះតៃវ៉ាន់ក៏ចង់នៅរក្សាឲ្យមានស្ថានភាពដូចដើមវិញជាមួយចិន បើទោះបីជាន្លងមក កោះតៃវ៉ាន់បានលើកឡើងពីការគំរាមកំហែងដោយកងទ័ពជើងអាកាសរបស់ចិនថ្មីៗនេះ បានហោះក្រវែលកោះតៃវ៉ាន់យ៉ាងណាក្ដី។
បើទោះបីជា ការឈានទៅរកសង្គ្រាមកើតឡើងរវាងចិន និងកោះតៃវ៉ាន់នៅឆ្នាំក្រោយ មានកម្រិតទាបក្ដី ប៉ុន្ដែ មន្ត្រីជាន់ខ្ពស់ផ្នែកសន្ដិសុខនៃកោះតៃវ៉ាន់ លើកឡើងថា មានរឿងរាវហេតុការណ៍ជាច្រើនទៀត ដែលគេនឹងត្រូវយកចិត្តទុកដាក់តាមដាន ពោលគឺជា ព្រឹត្តិការណ៍ដែលអាចកើតឡើង។
អត្ថបទទាក់ទង
សូមរំឭកបន្ដិចថា ប្រទេសចិនថ្មីៗនេះ បានចេញមុខអះអាងថា សកម្មភាពយន្ដហោះយោធា របស់ខ្លួនដែលបានហោះ ក្រវែលក្បែរកោះតៃវ៉ាន់នោះ គឺគ្រាន់តែជាសកម្មភាពការពារអធិបតេយ្យភាព និងបូរណភាពទឹកដីរបស់ប្រទេសចិនក៏ដូចជាសន្តិភាព ព្រមទាំងស្ថិរភាពនៅក្នុងច្រកសមុទ្រកោះតៃវ៉ាន់ តែប៉ុណ្ណោះ។ បន្ថែមពីនេះ ចិនបានបន្ទោសថា ភាពតានតឹងរវាងចិន និងកោះតៃវ៉ាន់នេះ គឺដោយសារតែក្រុមមេដឹកនាំនៃកោះតៃវ៉ាន់នេះ មានការឃុបឃិតគ្នា ជាមួយនឹងកងកម្លាំងបរទេស។ យ៉ាងណាក៏ដោយចុះ ថ្មីៗនេះដែរ មេដឹកកំពូលរបស់រដ្ឋចិន គឺលោក ស៊ី ជីនពីង ក៏បានលើកឡើងថា នឹងបង្រួបបង្រួមជាមួយតៃវ៉ាន់ដោយសន្ដិវិធី។
ទោះជាបែបនេះក្ដី កាលពីដើមខែតុលានេះ មេដឹកនាំតៃវ៉ាន់ គឺលោកស្រី សៃ អ៊ីង វេន បានចេញមុខប្រកាសក្ដែងៗដែរថា កោះតៃវ៉ាន់នឹងមិនឱនលំទោនចំពោះចិននោះទេ ប៉ុន្ដែ លោកស្រីក៏បានបញ្ជាក់ឡើងវិញនូវបំណងចង់បានសន្ដិភាព និងការសន្ទនាជាមួយក្រុងប៉េកាំងផងដែរ។
សូមបញ្ជាក់ថា ភាពតានតឹងផ្នែកយោធារវាងកោះតៃវ៉ាន់ និងចិន មកទល់ពេលនេះ គឺជាកម្រិតមួយខ្ពស់បំផុត មិនធ្លាប់មានក្នុងរយៈពេល ៤០ឆ្នាំមកនេះ ហើយបើតាមមេដឹកនាំកោះតៃវ៉ាន់បានអះអាងថា ចិនអាចនឹងបង្កើនលទ្ធភាពក្នុងការចូលលុកលុយកោះតៃវ៉ាន់ពេញទីតែម្ដងនៅក្នុងឆ្នាំ២០២៥ខាងមុខនេះ៕
None
