បើតាមសម្តេចនាយករដ្ឋមន្ត្រីកម្ពុជា ប្រភពចំណូល ៥ពាន់លានដុល្លារអាមេរិកដែលរំពឹងប្រមូលបាននៅឆ្នាំនេះ គឺគ្រប់គ្រាន់សម្រាប់ការចំណាយបើកប្រាក់បៀវត្សរ៍ជូនមន្ត្រីរាជការ និង សល់មួយផ្នែកទៀតសម្រាប់ការចំណាយវិនិយោគសាធារណៈ ដូចជាគម្រោងសាងសង់ហេដ្ឋារចនាសម្ព័ន្ធនានាផងដែរ។
ប្រមុខដឹកនាំរាជរដ្ឋាភិបាលកម្ពុជាបានអះអាងថា ទោះបីចំណូលពន្ធដារ និងពន្ធគយនៅឆមាសទី១ក្នុងឆ្នាំ២០២១ បានបង្ហាញសញ្ញាអវិជ្ជមានក៏ដោយ ប៉ុន្ដែ រាជរដ្ឋាភិបាលនៅតែមានលទ្ធភាពគ្រប់គ្រាន់ក្នុងការទ្រទ្រង់ការចំណាយនៅឆ្នាំនេះ។
ជាក់ស្តែង នៅរយៈពេល៧ខែកន្លងមកនេះ រដ្ឋទទួលបានចំណូលពីពន្ធដារ និងពន្ធគយជាង ៣ពាន់លានដុល្លារអាមេរិក។ ក្នុងនោះ ចំណូលពន្ធដារ មានជាង១ពាន់៧រយលានដុល្លារ ស្មើនឹងជាង៧៦% នៃផែនការ ខណៈចំណូល គយវិញ មានជាង១ពាន់៣រយលានដុល្លារ ស្មើនឹងជិត៥៧% នៃផែនការ។
សម្តេចនាយករដ្ឋមន្ត្រីកម្ពុជា រំពឹងទុកថា នៅសល់រយៈពេល ៥ខែទៅមុខទៀតនេះ កម្ពុជាយ៉ាងហោចណាស់នឹងប្រមូលបានចំណូល ២ពាន់លានដុល្លារបន្ថែមទៀត ដែលនាំឲ្យចំណូលដែលប្រមូលដោយពន្ធដារ និងគយ នឹងកើនដល់៥ពាន់លានដុល្លារនៅពេញ១ឆ្នាំ២០២១។
ក្នុងន័យនេះ បើគិតជាមធ្យម គិតមួយខែៗ រដ្ឋប្រមូលចំណូលពន្ធបានប្រមាណ ៤០០លានដុល្លារអាមេរិក ខណៈការចំណាយលើការបើកប្រាក់ខែជូនមន្ត្រីរាជការវិញមានប្រមាណ ២៥០លានដុល្លារក្នុងមួយខែ ដូច្នេះ រដ្ឋនៅសល់១៥០លានដុល្លារអាមេរិកទៀត ដើម្បីចំណាយលើការវិនិយោគនានា។ នេះបើតាមការគូសបញ្ជាក់ដោយសម្តេច តេជោ ហ៊ុន សែន។
អត្ថបទគួរអាន
ស្របពេលដែល កម្ពុជាកំពុងមានការឆ្លងរីករាលដាលកូវីដ-១៩ និងមានការចំណាយច្រើនទៅលើការប្រុទ្ធទប់ទល់នឹងមេរោគឆ្លងដ៏កាចសាហាវមួយនេះក៏ដោយ ប៉ុន្ដែ មកទល់ពេលនេះ ចំពោះការសងបំណុលទៅកាន់ប្រទេសម្ចាស់កម្ចី និងដៃគូអភិវឌ្ឍន៍ផ្សេងៗទៀត គឺកម្ពុជានៅតែបន្ដសងជាធម្មតា មិនមានការស្នើសុំផ្អាកការសងបំណុលនោះទេ។
របាយការណ៍ពីក្រសួងសេដ្ឋកិច្ច និងហិរញ្ញវត្ថុបង្ហាញថា គិតត្រឹមដំណាច់ឆ្នាំ២០២០ កម្ពុជាមានសន្និធិបំណុលសាធារណៈសរុបជាង៨ពាន់៨រយលានដុល្លារអាមេរិក ដោយសុទ្ធសឹងជាបំណុលសាធារណៈក្រៅប្រទេស។
បើគិតតាំងពីឆ្នាំ១៩៩៣ មកត្រឹមដំណាច់ឆ្នាំ២០២០ កម្ពុជា បានទូទាត់សងសេវាបំណុលជូនដៃគូអភិវឌ្ឍន៍សរុបជាង២ពាន់លានដុល្លារ។ ដោយឡែក សម្រាប់ឆ្នាំ២០២០ កម្ពុជាបានទូទាត់សងសេវាបំណុលជូនដៃគូអភិវឌ្ឍន៍ជាង៣៦០លានដុល្លារអាមេរិក។
បើតាមរបាយការណ៍របស់អគ្គនាយកដ្ឋានពន្ធដារកាលពីថ្ងៃទី២០ កក្កដា ការប្រមូលចំណូលពន្ធដារនៅឆមាសទី១ឆ្នាំ២០២១ សម្រេចបានជាង១ពាន់៥រយលានដុល្លារអាមេរិក ធ្លាក់ចុះជិត១១% បើធៀបនឹងឆមាសទី១ កាលពីឆ្នាំ២០២០។ រីឯចំណូលពន្ធ ប្រមូលដោយ អគ្គនាយដ្ឋានគយ និងរដ្ឋាករនៅឆមាសទី១នេះដែរមាន ជាង១ពាន់១រយលានដុល្លារអាមេរិក ធា្លក់ចុះជិត៩% បើធៀបនឹងឆមាសទី១កាលពីឆ្នាំ២០២០៕
None
