នេះបើយោងតាមប្រភពមកពីក្រុមហ៊ុនបម្រើសេវាកម្មអចលនទ្រព្យក្នុងស្រុកមួយ ដែលសុំមិនបញ្ចេញឈ្មោះ បានប្រាប់សារព័ត៌មានអេឡិចត្រូនិក ខេមបូណូមិស។
ប្រភពបានបង្ហើបឲ្យដឹងទៀតថា ក្រុមហ៊ុនសិនត្រាល់ គ្រុប គឺជាក្រុមហ៊ុនលក់រាយដ៏ធំជាងគេបំផុតនៅប្រទេសថៃ បានមកស្វែងរកទីតាំងវិនិយោគបើកផ្សារទំនើបនេះ ជាច្រើនកន្លែងមកហើយ ទាំងនៅក្នុងក្រុង និង ជាយរាជធានីភ្នំពេញ ហើយទើបតែថ្មីៗនេះ ក្រុមហ៊ុនបានចាប់អារម្មណ៍នឹងទីតាំងនៅម្តុំស្ពានអាកាសទី៤ តិចណូ ដែលស្ថិតនៅក្នុងសង្កាត់បឹងកក់ ខណ្ឌទួលគោក។ បើមិនមានការប្រែប្រួលនោះទេ តាមផែនការផ្សារទំនើបដ៏ធំមួយនេះ នឹងធ្វើការសាងសង់នៅលើផ្ទៃដីប្រមាណជា ៣ហិកតា។
ក្រុមហ៊ុនសិនត្រាល់គ្រុបដែលវិនិយោគផ្សារទំនើបដ៏ធំបំផុតនៅកម្ពុជានេះ បច្ចុប្បន្ន មានអាជីវកម្មធំៗជាច្រើនដូចជា ផ្សារទំនើបថៃ ផ្សារទំនើប BigC មជ្ឈមណ្ឌលប៉ាត់តាយ៉ា រ៉ូប៊ីនសុន ឌីផាតមិនស្ទ័រ មជ្ឈមណ្ឌលសណ្ឋាគារផ្លាហ្សា និង ក្រុមហ៊ុនផលិតអាហារទាន់ចិត្ត ជាដើម។ ហើយទាំងអស់នេះ នឹងមកដល់និងមានវត្តមាននៅក្នុងប្រទេសកម្ពុជាក្នុងពេលឆាប់ៗនេះ។
ក្រុមអ្នកជំនាញអចលនទ្រព្យសុទ្ធតែបានអះអាងថា ការបោះទីតាំងវិនិយោគនៅទីនោះ គឺជាទីកន្លែងដែលល្អបំផុតនៅក្នុងរាជធានីភ្នំពេញ ជាទីកន្លែងប្រមូលផ្តុំទៅដោយអគារពាណិជ្ជកម្មជាច្រើន សាលារៀន សាកលវិទ្យាល័យ មន្ទីរពេទ្យ និងក្រសួង គ្រឹះស្ថាននានាសម្រាប់បុគ្គលិក មន្ត្រីរាជការ អង្គការក្រៅរដ្ឋាភិបាល។
ព័ត៌មាននេះគឺប្រហាក់ប្រហែលគ្នាទៅនឹងការលើកឡើងរបស់ឯកឧត្តម ណាត់តាវុធ ប៉ូទីសារ៉ូ ឯកអគ្គរាជទូតថៃប្រចាំព្រះរាជាណាចក្រកម្ពុជាដែលបានប្រាប់ ខេមបូណូមិស កាលពីពេលថ្មីៗថា ផ្សារទំនើបរបស់ថៃនេះនឹងសាងសង់ស្ថិតនៅតាមបណ្តោយមហាវិថីមួយ ក្នុងទីក្រុងភ្នំពេញនេះ ប៉ុន្តែលោកបដិសេធមិនប្រាប់ទីតាំងច្បាស់លាស់នោះទេ។
ឯកឧត្តម ណាត់តាវុធ ប៉ូទីសារ៉ូ (Nuttavudh Photisaro) បានបញ្ជាក់ប្រាប់ថា ក្រុមហ៊ុនលក់រាយដ៏ធំជាងគេនៅប្រទេសថៃ ដែលមានឈ្មោះថា សិនត្រាល់ គ្រុប នឹងមកវិនិយោគផ្សារទំនើបដ៏ធំជាងគេនៅប្រទេសកម្ពុជាក្នុងឆ្នាំនេះ។ ឯកឧត្តមបន្តថា តំណាងក្រុមហ៊ុនថៃមួយនេះបានមកសិក្សាលើទីតាំងសម្រាប់សាងសង់រួចហើយ។
ឯកអគ្គរាជទូតថៃប្រចាំនៅកម្ពុជារូបនេះ មានមោទនភាពដែលថា ក្នុងអាណត្តិការទូតនៅក្នុងព្រះរាជាណាចក្រកម្ពុជារយៈពេលបីឆ្នាំកន្លងមកនេះ លោកបានការខិតខំកៀងគរវិនិយោគិនថៃតូចធំជាច្រើនឲ្យមកវិនិយោគនៅប្រទេសកម្ពុជា។ ជាក់ស្តែង ក្រុមហ៊ុនលក់រាយ សិនត្រាល់គ្រុបនេះ លោកបានទាក់ទាញតាំងពី៣ឆ្នាំមុនមកម្ល៉េះ។
នៅក្នុងឆ្នាំនេះ ក្រុមហ៊ុនសិនត្រាល់គ្រុបមានផែនការពង្រីកអាជីវកម្មរបស់ខ្លួននៅអឺរ៉ុប កម្ពុជា វៀតណាម ភូមា ឡាវ ដែលមានទឹកប្រាក់ជាង ១ពាន់លានដុល្លារអាមេរិក។ ក្រុមហ៊ុន សិនត្រាល់ គ្រុប ទទួលបានប្រាក់ចំណេញចំនួនជិត ១០ពាន់លានដុល្លារអាមេរិក កាលពីឆ្នាំ២០១៦ ពោលគឺមានការកើនឡើងប្រមាណជាង ១៣ភាគរយ ធៀបនឹងឆ្នាំ២០១៥។
ឯកឧត្តម ណាត់តាវុធ ប៉ូទីសារ៉ូ បានបញ្ជាក់ថា តាមរយៈការវិនិយោគផ្សារទំនើបដ៏ធំមួយនេះ សង្ឃឹមថា ទំហំពាណិជ្ជកម្មទ្វេភាគីរវាងកម្ពុជានិងថៃ អាចនឹងកើនឡើងខ្លាំង។ យោងតាមរបាយការណ៍ពីស្ថានទូតថៃប្រចាំនៅកម្ពុជា បង្ហាញថា ទំហំពាណិជ្ជកម្មរវាងកម្ពុជានិងថៃកាលពីឆ្នាំ២០១៦ សម្រេចបានទឹកប្រាក់ ៥ពាន់៦០០លានដុល្លារ ពោលគឺមានការថយចុះ៦ភាគរយ បើធៀបទៅនឹងរយៈពេលដូចគ្នាកាលពីឆ្នាំមុន។
បើទោះបីជាទំហំពាណិជ្ជកម្មទេ្វភាគីរវាងប្រទេសទាំងពីរមានភាពល្អប្រសើរក៏ពិតមែន ប៉ុន្តែ កម្ពុជាហាក់បីដូចជាទទួលបានទឹកប្រាក់តិចតួចពីទំនាក់ទំនងពាណិជ្ជកម្មជាមួយថៃ។ ជាក់ស្តែង នៅក្នុងឆ្នាំ២០១៦កន្លងទៅនេះ កម្ពុជាបាននាំចេញផលិតផលសំខាន់ៗទៅទីផ្សារថៃ ដែលមានតម្លៃទឹកប្រាក់៩៣៦លានដុល្លារ ខណៈថៃនាំចូលមកកម្ពុជាក្នុងទឹកប្រាក់ ៤ពាន់៧០០លានដុល្លារ។ ដូច្នេះបើមើលពីទំហំទឹកប្រាក់រវាងប្រទេសទាំងពីរឃើញថា កម្ពុជាចំណេញតិចតួចណាស់។
ប្រទេសថៃបានរៀបចំគោលនយោបាយនាំចេញរបស់ខ្លួនជាថ្មី ដោយងាកទៅរកតំបន់អាស៊ីវិញ ជាពិសេស ប្រទេសជិតខាងដូចជាកម្ពុជា។ ប្រជាពលរដ្ឋកម្ពុជា និងមីយ៉ាន់ម៉ា ដែលត្រូវការទំនិញថៃ មានប្រមាណ ៦៥លាននាក់៕
