វិបត្តិជំងឺកូវីដ-១៩ បានបង្រៀនឲ្យម្ចាស់ក្រុមហ៊ុន សហគ្រាស និងអាជីវកម្មមួយចំនួនកាន់តែមានការប្រុងប្រយ័ត្ន និងប្រិតប្រៀងបំផុតក្នុងការផលិត និងប្រើប្រាស់ហិរញ្ញវត្ថុ ដើម្បីពង្រីកមុខរបរ និងអាជីវកម្មរបស់ពួកគេ ព្រោះថា នៅក្នុងអំឡុងពេលនេះបើអ្នករកស៊ីមិនបានសិក្សា និងវាយតម្លៃឲ្យបានហ្មត់ចត់ទេនោះអាជីវកម្មរបស់ពួកគេអាចប្រឈមនឹងបិទទ្វារ ឬក្ស័យធនក៏អាចថាបាន។
លោកជំទាវឧកញ៉ា កែវ មុំ អគ្គនាយិកាក្រុមហ៊ុនផលិតនំស្រួយលីលី បានចែករំលែកជាគំនិតយោបល់ថា ក្រុមហ៊ុនអាជីវកម្ម ឬសហគ្រាសមិនគួរចំណាយដើមទុនច្រើន ដើម្បីពង្រីកអាជីវកម្មក្នុងអំឡុងវិបត្តិកូវីដ-១៩ នេះនោះទេ ដ្បិតវាជាការប្រថុយប្រថាន ដែលមានហានិភ័យខ្ពស់។ ម្យ៉ាងការឆ្លងរាលដាលនៃជំងឺកូវីដ-១៩ នៅកម្ពុជាស្ថិតក្នុងភាពស្រពិចស្រពិលនៅឡើយ ក្នុងការឈានទៅបិទបញ្ចប់ព្រឹត្តិការណ៍សហគមន៍២០កុម្ភៈ។
លោកជំទាវ ឧកញ៉ា កែវ មុំ បានលើកឡើងទៀតថា នៅឆមាសទី១ឆ្នាំ២០២១ ក្រុមហ៊ុននំស្រួយលីលី បានបាត់បង់ចំណូលយ៉ាងច្រើនបើធៀបឆមាសទី១កាលពីឆ្នាំ២០២០។ មូលហេតុដែលធ្វើឲ្យក្រុមហ៊ុននំស្រួយលីលីធ្លាក់ចុះចំណូល ដោយសារការឆ្លងរាលដាលជំងឺកូវីដ-១៩ នៅឆ្នាំ២០២១ មានស្ថានភាពធ្ងន់ធ្ងរជាងឆ្នាំ២០២០។
អត្ថបទទាក់ទង!
លោក មង វណ្ឌី ប្រធានផ្នែកគ្រប់គ្រងសហគ្រាសផលិតទឹកត្រី លាង ឡេង បានបញ្ជាក់ថា ទោះកម្ពុជារងនូវការឆ្លងជំងឺកូវីដ-១៩ ប៉ុន្តែសហគ្រាសលោកមិនបានផ្អាកដំណើរការនោះទេ គ្រាន់តែមានការផ្លាស់ប្តូររបៀបក្នុងការផលិត និងចែកចាយតែប៉ុណ្ណោះ។ លោកអះអាងថា នៅអំឡុងកូវីដ-១៩ សហគ្រាសលោកបានកាត់បន្ថយថ្ងៃធ្វើការចំនួនពីរថ្ងៃក្នុង១សប្តាហ៍ រីឯបុគ្គលិកនិងកម្មករទាំងអស់តម្រូវឲ្យស្នាក់នៅកន្លែងផលិតមិនអនុញ្ញាតឲ្យទៅផ្ទះនោះទេ ក្រោយចប់ការងារ។
អ្នកជំនាញសេដ្ឋកិច្ច និងជាអ្នកជំនួញល្បីឈ្មោះមួយរូបនៅកម្ពុជា លោក យក់ ចំរើនឬទ្ធិ ប្រធានអគ្គនាយកប្រតិបត្តិ នៃក្រុមហ៊ុនសម្ព័ន្ធធានារ៉ាប់រង FORTE បានលើកឡើងដែរថា លោកជំរុញឲ្យក្រុមហ៊ុន សហគ្រាស និងអាជីវកម្មត្រូវរកវិធីសាស្ត្រ ដើម្បីរស់ជាមួយកូវីដ-១៩ ដ្បិតជំងឺរាតត្បាតជាសកលមួយនេះនឹងបន្តរស់នៅជាមនុស្សជារៀងរហូត ប្រៀបបាននឹងជំងឺផ្តាសាយធំដូច្នេះដែរ។ លោកមើលឃើញថា ក្រោតែជាវិបត្តិ កូវីដ-១៩ ក៏ជាឱកាសសម្រាប់ក្រុមហ៊ុន សហគ្រាស និងអាជីវកម្មក្នុងការកែប្រែចំណុចខ្វះខាត និងដោះស្រាយបញ្ហាផ្ទៃក្នុងផ្សេងៗផងដែរ។
សូមបញ្ជាក់ថា កូវីដ-១៩ នៅកម្ពុជានៅតែបន្ដអូសបន្លាយហើយចំនួនអ្នកឆ្លងក៏មានការកើនឡើងកាន់តែច្រើនដែរ ដោយគិតមកទល់ពេលនេះ កម្ពុជាមានអ្នកឆ្លងកូវីដ-១៩ សរុបដល់ទៅជាង៥ម៉ឺននាក់ និងអ្នកស្លាប់វិញមានប្រមាណ៧០០នាក់។ នៅប៉ុន្មានថ្ងៃចុងក្រោយនេះ ចំនួនអ្នកឆ្លងប្រចាំថ្ងៃមានក្នុងរង្វង់ប្រមាណជាង៩០០នាក់៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
