ព្រះរាជក្រឹត្យរំលាយសភាដែលចេញនៅថ្ងៃទី១៧ ខែមីនា បានចូលជាធរមាននៅថ្ងៃច័ន្ទ ទី ២០ខែមីនា។ រដ្ឋធម្មនុញ្ញថៃចែងថា ការបោះឆ្នោតត្រូវធ្វើឡើងនៅចន្លោះពី ៤៥ ទៅ ៦០ ថ្ងៃ បន្ទាប់ពីការរំលាយសភា។ ដូចនេះវាមានន័យថា ការបោះឆ្នោតនឹងប្រព្រឹត្តទៅនៅចន្លោះថ្ងៃទី ៤ ដល់ថ្ងៃទី១៩ ខែឧសភាខាងមុខនេះ។
ទោះយ៉ាងណា កាលបរិច្ឆេទពិតប្រាកដនៃការបោះឆ្នោតនឹងត្រូវប្រកាសដោយគណៈកម្មាធិការរៀបចំការបោះឆ្នោតរបស់ថៃ ហើយនឹងត្រូវបានចុះផ្សាយក្នុងព័ត៌មាននៅពេលក្រោយទៀត។ កាលពីសប្តាហ៍មុន នាយករដ្ឋមន្ត្រីថៃលោក Prayut Chan-o-cha បានស្នើសុំព្រះរាជក្រឹត្យពីព្រះមហាក្សត្រថៃក្នុងការរំលាយសភា មុនពេលបញ្ចប់អាណត្តិរយៈពេល ៤ ឆ្នាំរបស់រដ្ឋាភិបាលរបស់លោក នៅថ្ងៃទី ២៣ ខែមីនានេះ។
អត្ថបទគួរអាន
គួរជម្រាបផងដែរថា ប្រទេសថៃបានរៀបចំការបោះឆ្នោតជាតិរបស់ខ្លួននៅថ្ងៃទី ២៤ ខែមីនា ឆ្នាំ២០១៩កន្លងទៅ ដែលជាការផ្លាស់ប្តូរពីរបបយោធាជិតប្រាំឆ្នាំឆ្ពោះទៅរកការបង្កើតរដ្ឋាភិបាលជាប់ឆ្នោតតាមបែបប្រជាធិបតេយ្យឡើងវិញ។
ទន្ទឹមគ្នានេះ រដ្ឋធម្មនុញ្ញនៃប្រទេសថៃបច្ចុប្បន្នផ្តល់អំណាចភាគច្រើនដល់ព្រឹទ្ធសភា ដែលជាសភាជាន់ខ្ពស់ក្នុងប្រព័ន្ធនីតិបញ្ញត្តិ នៃប្រទេសមួយនេះ ដែលមានតួនាទីជ្រើសរើសនាយករដ្ឋមន្ត្រីរួមគ្នា ជាមួយសភាតំណាង ឬរដ្ឋសភា។
លោកប្រាយុទ្ធ ចាន់អូចារ កាលពីថ្ងៃទី ២០ មីនា បាននិយាយអរគុណទៅកាន់សមាជិកសភា សម្រាប់បំពេញការងារនៅក្រោមការដឹកនាំរបស់លោកនៅរយៈពេល៤ឆ្នាំកន្លងមកនេះ។ លោកសង្កត់ធ្ងន់ទៀតថា លោកមិនមានជម្លោះជាមួយនរណាម្នាក់នោះទេ នៅក្នុងអំឡុងពេលធ្វើការនៅក្នុងសភានេះ៕
អត្ថបទ ៖ សុខ ជា
