រដ្ឋមន្រ្តីក្រសួងឧស្សាហកម្មថៃ លោក សូរិយា ជុង រុង រៀង គីត បានបញ្ជាក់ថា មានក្រុមហ៊ុនជប៉ុនចំនួន ៣ ដែលផលិត ម៉ាស៊ីនគិតលេខ នាឡិកា និងម៉ាស៊ីនព្រីន ព្រមទាំងក្រុមហ៊ុនផលិតកង់ឡានរបស់ចិន នឹងចូលមកវិនិយោគ នៅក្នុងប្រទេសថៃ។
រដ្ឋមន្រ្តីក្រសួងឧស្សាហកម្មថៃថា សង្គ្រាមពាណិជ្ជកម្មសកល គឺបានជះឥទ្ធិពលសាយភាយទូទាំងពិភពលោក ទៅលើបញ្ហាជំនួញ និងពាណិជ្ជកម្ម យ៉ាងណាមិញ ប្រទេសថៃ នៅមានផ្លូវដើរ ដោយសារ ថៃ មិនត្រូវបានបញ្ចូលទៅក្នុងបញ្ជីត្រួតពិនិត្យរបស់អាមេរិក នោះឡើយ ហើយ ថៃ នៅតែជាមជ្ឈមណ្ឌលឧស្សាហកម្មផលិត សម្រាប់តំបន់អាស៊ីអាគ្នេយ៍ដដែល។
អត្ថបទទាក់ទង!
រដ្ឋមន្រ្តីក្រសួងឧស្សាហកម្មរូបនេះ បានបញ្ជាក់ទៀតថា ក្រសួង នឹងរៀបចំផែនការ ដើម្បីជួប និងអញ្ជើញវិនិយោគិនជប៉ុន និងចិន ឲ្យចូលមកវិនិយោគនៅ ប្រទេសថៃបន្ថែមទៀត ជាពិសេសក្នុង ច្រករបៀងសេដ្ឋកិច្ចភាគខាងកើត។
ចំណែក លោក សូរិយា នឹងជួបតំណាងអង្គការពាណិជ្ជកម្មក្រៅប្រទេសជប៉ុន JETRO មុនដំណាច់ខែកក្កដា ដើម្បីពិភាក្សាពី គោលនយោបាយវិនិយោគ ហើយលោក ក៏បញ្ជាក់ដែរថា ជនជាតិជប៉ុន គឺជាវិនិយោគិនធំជាងគេបង្អស់ នៅក្នុងប្រទេសថៃ ហើយ ច្រករបៀងសេដ្ឋកិច្ចភាគខាងកើត ជាគោលដៅសំខាន់ សម្រាប់ក្រុមហ៊ុនជប៉ុនដូចគ្នា។
រដ្ឋាភិបាលថៃ ទើបតែបានអនុម័តច្បាប់ថ្មី ដើម្បីទាក់ទាញការវិនិយោគបន្ថែម តួយ៉ាងដូចជា ការអនុគ្រោះពន្ធចំពោះ វិនិយោគិន ក្នុងច្រករបៀងសេដ្ឋកិច្ច និងអនុញ្ញាតឲ្យមានការជួលដីរហូតដល់ទៅ ៩៩ឆ្នាំ។
គួរជម្រាបដែរថា តាមការអះអាងពីមន្ត្រីជាន់ខ្ពស់ថៃ រដ្ឋាភិបាលអាណត្តិចាស់របស់ថៃ ធ្លាប់បានសម្រេចការងារជោគជ័យក្នុងការបង្កើតច្រករបៀងសេដ្ឋកិច្ចនេះ កាលពី ៣ឆ្នាំមុន ដែលទទួលបានការចាប់អារម្មណ៍ច្រើនពី សំណាក់វិនិយោគិនបរទេស ហើយសម្រាប់រដ្ឋាភិបាលអាណត្តិថ្មីថៃ ក៏រំពឹងទទួលបានលទ្ធផលល្អប្រសើរដូចគ្នាដែរ ដោយគ្មានការព្រួយបារម្ភពី ស្ថិរភាពនយោបាយឡើយ៕
None
