នៅក្រោមការស្នើសុំឲ្យមានការផ្លាស់ប្តូរនេះ ភ្ញៀវទេសចរធ្វើដំណើរចូលទៅក្នុងប្រទេសថៃ នឹងមិនត្រូវប្រឈមមុខនឹងការចំណាយថវិកា និង ពេលវេលាក្នុងការធ្វើតេស្ត PCR និង ដាក់ឲ្យនៅដាច់ដោយឡែកមួយយប់ដំបូងនៅក្នុងសណ្ឋាគារទៀត នោះទេ។
លោក ភីផាត់ រ៉ាត់ឆាគីត ប្រាខន (Phiphat Ratchakitprakarn) រដ្ឋមន្ត្រីក្រសួងទេសចរណ៍ និងកីឡារំពឹងថា លើកលែងការធ្វើតេស្ដ PCR សម្រាប់អ្នកដំណើរពីបរទេសនេះ នឹងត្រូវបានអនុម័ត និងអនុវត្តចាប់ពីថ្ងៃទី ១ ខែឧសភា តទៅ ហើយថៃសង្ឃឹមថា នឹងមិនមានការកើនឡើងនៃការឆ្លងថ្មី និងការស្លាប់ដោយមេរោគ កូវីត ១៩ ក្នុងអំឡុងពេល និងក្រោយពិធីបុណ្យសង្ក្រាន្ដឡើយ។
លោក ភីផាត់ បានលើកឡើងថា ការផ្លាស់ប្តូរនេះនឹងស្តារការធ្វើដំណើរចេញចូលធម្មតាមកកាន់ប្រទេសថៃ ដូចក្នុងឆ្នាំ ២០១៩ មុនពេលមានជំងឺ កូវីដ១៩ ខណៈបច្ចុប្បន្នមេរោគរាតត្បាតនេះ បាននិងកំពុងបង្កឱ្យមានការហាមឃាត់ការធ្វើដំណើរទូទាំងពិភពលោក។
អត្ថបទគួរអាន
ប្រសិនបើរាជរដ្ឋាភិបាលទទួលយកសំណើនេះ ទេសចរអន្តរជាតិដែលចូលទៅក្នុងប្រទេសថៃ នឹងលែងតម្រូវឱ្យចុះឈ្មោះសម្រាប់បណ្ណធ្វើដំណើរ Thailand Pass នៅក្រោមគម្រោង Test & Go, Sandbox និងគម្រោងដាក់ឲ្យធ្វើចត្តាឡីស័ក ទៀតនោះទេ។
គួរជម្រាបថា ក្រសួងទេសចរណ៍បានប៉ាន់ប្រមាណថា ប្រទេសថៃនឹងស្វាគមន៍ភ្ញៀវទេសចរបរទេសយ៉ាងហោចណាស់ ៧ លាននាក់នៅឆ្នាំនេះ ទាបជាងការព្យាករណ៍ពីមុនចំនួន ១០ លាននាក់។ ក្នុងនោះប្រាក់ចំណូលពីវិស័យទេសចរណ៍នៅឆ្នាំ ២០២២ ត្រូវបានគេព្យាករណ៍ថានឹងកើនឡើងដល់ប្រមាណ ៣០ពាន់លានដុល្លារ ឬស្មើនឹង ៣០% នៃទំហំប្រាក់ចំណូលជិត ៩០ពាន់លានដុល្លារកាលពីឆ្នាំ ២០១៩ ។
ក្រសួងទេសចរណ៍ថៃ មានសុទិដ្ឋិនិយមទៀតថា ប្រាក់ចំណូលនៅឆ្នាំ ២០២៣ នឹងកើនឡើង ៥០% ទៀត ជាមួយនឹងទំហំទឹកប្រាក់ដល់ជាង ៤៤ពាន់លានដុល្លារ ហើយវិស័យទេសចរណ៍ត្រូវបានរពឹងថា នឹងអាចវិលមករកភាពប្រក្រតីដូចកាលពីអំឡុងពេលមិនទាន់មានកូវីដ១៩ឡើងវិញ នៅឆ្នាំ២០២៤៕
អត្ថបទ វ៉ាន់ ស្រីរ័ត្ន
None
