អាជ្ញាធរប្រទេសកម្ពុជាបាននិយាយកាលពីថ្ងៃចន្ទ (ទី៩ វិច្ឆិកា ឆ្នាំ២០២០) ថា យ៉ាងហោចណាស់ មានការឆ្លងវីរុសកូវីដ-១៩ចំនួន ៤ករណី នៅកម្ពុជា ដែលត្រូវបានគេជឿថា មានជាប់ទាក់ទងនឹងដំណើរទស្សនកិច្ចរបស់រដ្ឋមន្ត្រីការបរទេសហុងគ្រី លោក Peter Szijjarto ។
លោកនាយករដ្ឋមន្រ្តី ហ៊ុន សែន និងសាច់ញាតិរបស់លោក ស្ថិតក្នុងចំណោមមនុស្សជាង ១០០០នាក់ ដែលត្រូវបានធ្វើតេស្តរកវីរុសកូវីដ-១៩ ដោយសារតែការធ្វើទស្សនកិច្ចនេះ ហើយត្រូវបានបញ្ជាក់ថា តេស្តមានលទ្ធផលអវិជ្ជមាន ។
អាជ្ញាធរថៃបាននិយាយថា លោក Szijjarto ត្រូវបានគេរកឃើញថា បានឆ្លងវីរុសកូវីដ-១៩ បន្ទាប់ពីបានទៅដល់ប្រទេសថៃក្រោយចាកចេញពីប្រទេសកម្ពុជា កាលពីថ្ងៃទី ៣ ខែវិច្ឆិកា។
អត្ថបទទាក់ទង
អ្នកការទូតហុងគ្រីដែលមានមូលដ្ឋាននៅទីក្រុងបាងកក បានធ្វើតេស្តវិជ្ជមានកូវីដ-១៩ កាលពីថ្ងៃចន្ទ ម្សិលមិញនេះ ។
មន្ត្រីសុខាភិបាលថៃ បាននិយាយថា អ្នកការទូតហុងគ្រីរូបនោះបានស្ថិតនៅជិតស្និទ្ធនឹងលោក Szijarto ភ្លាមៗ នៅមុនពេលនៃការធ្វើតេស្តមួយទៅលើរូបលោករដ្ឋមន្ត្រី ខណៈលោកចូលមកដល់ទឹកដីថៃ ហើយដែលលទ្ធផលតេស្តនោះបង្ហាញថា លោករដ្ឋមន្ត្រីការបរទេសហុងគ្រី វិជ្ជមានកូវីដ-១៩ ។
មន្ត្រីសុខាភិបាលថៃមិនបានផ្ដល់អត្តសញ្ញាណមន្ត្រីការទូតហុងគ្រីទេ ប៉ុន្តែ បាននិយាយថា មនុស្ស ១៦នាក់ដែលបានជួបនិងពាក់ព័ន្ធនឹងលោករដ្ឋមន្ត្រីការបរទេសហុងគ្រី ត្រូវបានធ្វើតេស្តរកឃើញថា អវិជ្ជមាន ៕
