អាជ្ញាធរថៃពេលនេះ កំពុងប្រញាប់ប្រញាល់ដោះស្រាយករណីថ្មីនៃការឆ្លងវីរុសកូវីដ-១៩ ដែលប្រឈមនឹងការឆ្លងរាលដាលខ្លាំង ក្រោយរកឃើញមនុស្ស ៤០៥នាក់ វិជ្ជមានកូវីដ-១៩ ដែលមានជាប់ពាក់ព័ន្ធនឹងក្លឹបកម្សាន្តពេលរាត្រីមួយកន្លែងនាទីក្រុងបាងកក។
អ្នកនាំពាក្យក្រសួងសុខាភិបាលបានឲ្យដឹងថា ខ្លួនកំពុងស្វែងរកការយល់ព្រមពីរាជរដ្ឋាភិបាលថៃ ដើម្បីបិទកន្លែងកម្សាន្តទាំងនោះ ដែលរួមមានហាងស្រា និងខារ៉ាអូខេ រយៈពេល២សប្តាហ៍នៅក្នុងខេត្តចំនួន៤០ បូករួមទាំងក្រុងបាងកកផងដែរ។
គួរបញ្ជាក់ថា កូវីដ-១៩បានរាលដាលជាថ្មីស្របពេលដែល ថៃទើបនឹងផ្តើមអនុវត្តវិធានការស្តារវិស័យទេសចរណ៍ឡើងវិញ រួមមានការកាត់បន្ថយចំនួនថ្ងៃធ្វើចត្តាឡីស័កសម្រាប់ភ្ញៀវទេសចរបរទេសជាដើម។ បន្ថែមលើនេះ វាបានបង្កជាការព្រួយបារម្ភយ៉ាងខ្លាំង អំពីការចរាចរនៃជំងឺកូវីដ-១៩ នៅទូទាំងប្រទេស ដោយហេតុថា បុណ្យចូលឆ្នាំថ្មីនឹងខិតជិតមកដល់នៅសប្តាហ៍ក្រោយនេះ គ្រាដែលពលរដ្ឋថៃកំពុងត្រៀមធ្វើដំណើរទៅលេងស្រុកកំណើតនៅតាមបណ្តាខេត្ត ហើយថ្មីៗនេះអាជ្ញារថៃបានបញ្ជាក់ដែរថា ពលរដ្ឋទាំងនោះមិនត្រូវបានដាក់ឲ្យនៅដាច់ដោយឡែកនោះទេ នៅពេលពួកគេបានទៅដល់ផ្ទះ។
អត្ថបទទាក់ទង!
យ៉ាងណាមិញ អាជ្ញាធរថៃបានបញ្ជាក់ហើយថា វិធានការកាត់បន្ថយចំនួនថ្ងៃធ្វើចត្តាឡីស័កពី១៤ថ្ងៃមកត្រឹម១០ថ្ងៃ ដែលទើបបានដាក់ចេញនោះ ទំនងនឹងត្រូវយកមកពិចារណាឡើងវិញថា គួរបន្តនិវិធីបែបនេះទៀត ឬយ៉ាងណា។
ជុំវិញបញ្ហារាលដាលកូវីដ-១៩ជាថ្មីនេះ កោះភូកេតដែលបានត្រៀមខ្លួនទទួលទេសចរបរទេសក្នុងពេលខាងមុខ ក្នុងគោលដៅស្តារទេសចរណ៍ឡើងវិញនោះ ក៏រងគ្រោះដោយការរាលដាលជាថ្មីដូចគ្នាដែរ ដោយអាជ្ញាធរទើបរកឃើញអ្នកវិជ្ជមានកូវីដ-១៩ ចំនួន៨នាក់នៅកោះភូកេត ដែលមានជាប់ពាក់ព័ន្ធនិងឆ្លងបន្តពីករណីក្លឹបកម្សាន្តនៅក្រុងបាងកក ហើយក្នុងនោះ មាន៤នាក់ បានមកកម្សាន្តនៅក្លឹបរាត្រីមួយកន្លែងទៀតលើកោះភូកេត។
ប្រការនេះបាននិងកំពុងចោទជាបញ្ហាដល់ភ្ញៀវទេសចរ ដែលមានគម្រោងមកលេងកោះភូកេតនៅថ្ងៃចូលឆ្នាំថ្មី ព្រមទាំងទេសចរចិន ដែលបានកក់ការធ្វើដំណើរកម្សាន្តមកតំបន់ទេសចរណ៍ដ៏មានសក្តានុពលរបស់ថៃមួយនេះនៅខែកក្កដាខាងមុខផងដែរ។
សូមបញ្ជាក់ថា រដ្ឋាភិបាលលោកប្រាយុទ្ធ ចាន់អូចានឹងមានបន្ទុកថ្មីមួយទៀត ដោយហេតុថា កាលថ្ងៃពុធទី៧មេសា ថៃបានរកឃើញវីរុសកូវីដ-១៩បំប្លែងខ្លួនប្រភេទថ្មីមួយប្រភេទទៀត ដែលវាមានវត្តមានដំបូងនៅប្រទេសអង់គ្លេស ពេលនេះបានឆ្លងមកដល់ទឹកដីថៃហើយ៕None
