លោកស្រី ឆូទីម៉ា ប៉ុន្នីយ៉ា ប្រាផាសារ៉ា រដ្ឋមន្រ្តីស្តីទីនៃក្រសួងពាណិជ្ជកម្មថៃ បានអះអាង ប្រទេសថៃបានបាត់បង់ប្រាក់ចំណូលពីការនាំចេញ រហូតដល់ទៅ ៧៨០លានដុល្លារអាមេរិក ក្នុងរយៈពេល ១ឆ្នាំនេះ ដោយសារតែ សង្គ្រាមពាណិជ្ជកម្មរវាងប្រទេសទាំងពីរ នៅតែបន្ត។
ការនាំចេញទៅកាន់សហរដ្ឋអាមេរិក បានធ្លាក់ចុះជាង ៣០០លានដុល្លារអាមេរិក ក្នុងអំឡុងពេលនោះ រួមមាន បន្ទះសូឡា ម៉ាស៊ីនបោកគក់ ផលិតផលដែក និងអាលុយមីញ៉ូម។
ការនាំចេញរបស់ប្រទេសថៃ ទៅកាន់ប្រទេសចិន ក៏មានការធ្លាក់ចុះផងដែរ ប្រមាណ ១ពាន់លានដុល្លារអាមេរិក មានដូចជា រថយន្ត គ្រឿងបន្លាស់ សម្ភារៈប្រើប្រាស់ក្នុងផ្ទះ និងការិយាល័យ គ្រឿងម៉ាស៊ីន និងឧបករណ៍អេឡិចត្រូនិក ជាច្រើនមុខទៀត។
យ៉ាងណាមិញ លោកស្រី ឆូទីម៉ា បានបញ្ជាក់ថា ក្រសួង កំពុងតែរៀបចំកិច្ចប្រជុំបន្ទាន់ ជាមួយនាយកការិយាល័យមជ្ឈមណ្ឌលពាណិជ្ជកម្មថៃ នៅទូទាំងសកលលោក ដើម្បីសិក្សាវាយតម្លៃនិងពិភាក្សាអំពី យុទ្ធសាស្រ្តពង្រឹងការនាំចេញ នៅក្នុងឆមាសទី២ ឆ្នាំ២០១៩នេះ។
តើបានអានអត្ថបទនេះ ឬនៅ?
មកទល់ពេលនេះ ថៃនៅតែឃ្លាំមើលការចរចាពាណិជ្ជកម្មរវាងប្រទេសអាមេរិកនិងចិន អំពីការប្រកាសរបស់ប្រធានាធិបតីអាមេរិក លោក ដូណាល់ ត្រាំ ថា នឹងដំឡើងពន្ធពី ១០ភាគរយ ទៅ ២៥ភាគរយ ទៅលើទំនិញនាំចូលពីប្រទេសចិន ដែលមានតម្លៃជាង ២០០ពាន់លានដុល្លារ ដោយសារតែលោកមិនពេញចិត្តនឹងការចរចានេះ។
លោកស្រី ឆូទីម៉ា បន្តថា បើសិនជាអាមេរិកដំឡើងពន្ធដល់ ២៥ភាគរយមែន ទីផ្សារមូលធនពិភពលោក តម្លៃប្រេង និងមាស នឹងរងផលប៉ះពាល់យ៉ាងខ្លាំង ក៏ដូចជាប៉ះពាល់ដល់សេដ្ឋកិច្ចប្រទេសថៃ និងទំនុកចិត្តអ្នកប្រើប្រាស់ផងដែរ។
គិតមកទល់ពេលនេះ ការចរចាពាណិជ្ជកម្មពុំទាន់បានបញ្ចប់នៅឡើយទេ ដោយភាគីចិនប្រកាសនឹងចាត់វិធានការចាំបាច់ បើសិនជា អាមេរិក ដំឡើងពន្ធមែន តែអ្នកវិភាគជាច្រើនបានលើកឡើងថា នេះគ្រាន់តែជា ការដាក់សម្ពាធទៅលើភាគីចិន ឲ្យកាន់តែពិបាកក្នុងការចរចាប៉ុណ្ណោះទេ ព្រោះអាមេរិកក៏នឹងខាតបង់ក្នុងសង្គ្រាមពាណិជ្ជកម្មមួយនេះដែរ បើសិនជាសង្គ្រាមនេះផ្ទុះឡើង៕
