ថ្នាក់ដឹកនាំជាន់ខ្ពស់នៃក្រុមហ៊ុនផ្សារភាគហ៊ុនថៃ បានគូសបញ្ជាក់ថា ចំនួននៃការបោះផ្សាយមូលបត្រ (IPO) នៅក្នុងប្រទេសថៃ គិតចាប់ពីដើមឆ្នាំ មកទល់ថ្ងៃទី ២៥ ខែធ្នូ ឆ្នាំ ២០២០នេះ សម្រេចបាន ២៦កិច្ចព្រមព្រៀង ទាបជាងឆ្នាំ ២០១៩ ដែលមានដល់ទៅ ២៨កិច្ចព្រមព្រៀង។
ក្រុមហ៊ុនផ្សារភាគហ៊ុនថៃ បានបង្ហាញដែរថា ចិនប្រមូលដើមទុនពីការបោះផ្សាយមូលបត្របានដល់ទៅ ៦៥ពាន់លានដុល្លារអាមេរិក ខណៈប្រទេសថៃ ប្រមូលបានជិត ៥ពាន់លានដុល្លារ និងប្រទេសឥណ្ឌា ប្រមូលដើមទុនបាន ៤ពាន់ ៥រយលានដុល្លារអាមេរិក។
អត្ថបទទាក់ទង!
ប្រធានក្រុមហ៊ុនផ្សារភាគហ៊ុនថៃ លើកឡើងដែរថា មូលធននីយកម្មទីផ្សាររបស់ ការបោះផ្សាយ IPO ក្នុងឆ្នាំនេះ បានកើនដល់ ១៨ពាន់ ៥រយលានដុល្លារអាមេរិក ដែលជាកម្រិតមួយខ្ពស់បំផុតមិនធ្លាប់មាន ហើយការបោះផ្សាយនេះ ជាការរួមចំណែកធំជាងគេ នៅក្នុងកំណើនប្រចាំឆ្នាំនេះ។
ក្រុមហ៊ុនដែលបោះផ្សាយលក់មូលបត្រក្នុងឆ្នាំនេះ ភាគច្រើនមកពីក្រុមហ៊ុនបច្ចេកវិទ្យា ក្រុមហ៊ុនវិទ្យាសាស្រ្តចំណីអាហារ និងក្រុមហ៊ុនផលិតគំនូរជីវចល។
បើតាមអ្នកជំនាញ នៅក្នុងវិស័យមូលបត្រថៃ បានបង្ហើបថានៅក្នុងឆ្នាំ ២០២១ខាងមុខ ទីផ្សារមូលបត្រថៃ នឹងកាន់តែមានប្រជាប្រិយភាពជាងនេះទៅទៀត ដោយវិនិយោគិន កំពុងតែផ្តោតអារម្មណ៍ទៅលើ ការបោះផ្សាយ IPO ហើយទីផ្សារភាគហ៊ុន ក៏បន្តឈានទៅរកសញ្ញាវិជ្ជមានជានិច្ច។
លើសពីនេះ អាជីវកម្មពាក់ព័ន្ធនឹងវិស័យអាកាសចរណ៍ និងវិស័យលក់រាយបន្ត ក៏បានពន្យារពេលបោះផ្សាយ IPO នៅក្នុងឆ្នាំនេះដែរ ដែលពួកគេ រំពឹងនឹងអាចធ្វើការបោះផ្សាយនៅឆ្នាំក្រោយវិញ បន្ទាប់ពីស្ថានការណ៍មេរោគកូវីដ១៩ បានធូរស្បើយជាងនេះ។
គួរជម្រាបដែរថា អាជីវកម្មពាក់ព័ន្ធនឹង វិស័យសុខាភិបាល សំណង់ និងអចលនទ្រព្យ ក៏គ្រោងនឹងពង្រីកដើមទុន តាមរយៈការបោះផ្សាយ IPO នៅឆ្នាំ ២០២១ខាងមុខនេះដែរ ហើយបើសិនជាមានក្រុមហ៊ុនដែលប្រើប្រាស់បច្ចេកវិទ្យាពាណិជ្ជកម្ម និងទីផ្សារអនឡាញ គឺកាន់តែទាក់ទាញមួយកម្រិតទៀត៕
None
