បើតាមសេចក្តីប្រកាសព័ត៌មានពីអាជ្ញាធរប្រឆាំងកូវីដ១៩របស់ថៃ គម្រោងការដ្ឋានសាងសង់ដែលនឹងអនុញ្ញាឲ្យដំណើរការឡើងវិញរួមមានការដ្ឋានដែលចាំបាច់សម្រាប់ប្រយោជន៍សាធារណៈ ដូចជា ការដ្ឋានសំណង់រថភ្លើងក្រោមដី ទីតាំងសាងសង់ភ្លើងសញ្ញាចរាចរណ៍ និង ការដ្ឋានសាងសង់មន្ទីរពេទ្យចល័តសម្រាប់ដាក់អ្នកជំងឺកូវីដ១៩ជាដើម។
យ៉ាងណាមិញ ការបើកឲ្យដំណើរការ ការរដ្ឋានសំណង់ខាងលើនេះ មិនបានសំដៅដល់គ្រប់ការដ្ឋានទាំងអស់នោះទេ។ មានតែការដ្ឋានចាំបាច់មួយចំនួនតូចប៉ុណ្ណោះ ត្រូវបានអនុញ្ញាត ខណៈការដ្ឋានសំណង់អគារធំៗនៅក្នុងទីក្រុងបាងកកដែលជាកន្លែងផ្ទុះឆ្លងរាលដាលខ្លាំងនៃកូវីដ១៩ និង នៅតាមខេត្តទាំង៥ ដែលនៅជាប់នឹងទីក្រុងបាងកក ត្រូវបន្តផ្អាកដំណើរការរហូតដល់ចុងខែកក្កដានេះ ដើម្បីទប់ស្កាត់ការឆ្លង និង ស្លាប់ដោយសារកូវីដ១៩។
អ្នកជំនាញនៅក្នុងវិស័យសំណង់ថៃ បានលើកឡើងប្រាប់សារព័ត៌មានបាងកកប៉ុស្ដិ៍ថ្មីៗនេះថា ការបិទខ្ទប់ជាបណ្ដោះអាសន្នរយៈពេល៣០ថ្ងៃ លើគ្រប់ការដ្ឋានសំណង់ និងផ្ទះកម្មករទាំងអស់នៅក្នុងក្រុងបាងកក ដែលជាបណ្ដុំកន្លែងផ្ទុះរាលដាលឆ្លងខ្លាំងនៃជំងឺកូវីដ-១៩ នឹងធ្វើឲ្យថៃ ខាតបង់គិតជាទឹកប្រាក់ប្រមាណជាង៤ពាន់៣រយលានដុល្លារអាមេរិក។ លើសពីនេះទៀត វាក៏បានធ្វើឲ្យមានការប៉ះពាល់យ៉ាងខ្លាំងទៅលើខ្សែចង្វាក់ផ្គត់ផ្គង់នៅក្នុងការដ្ឋានសំណង់ និង វិស័យអចលនវត្ថុ ក្នុងទំហំខាតបង់ ដែលបានមិនអាចប៉ាន់ស្មានបានផងដែរ។
អត្ថបទទាក់ទង
គួរជម្រាបថាគិតមកទល់ពេលនេះ
ប្រទេសថៃ
និងជាពិសេសក្រុងបាងកកមិនទាន់មានការស្រាកស្រាន្ដពីការរាតត្បាតកូវីដ-១៩នោះទេ។
ជាក់ស្តែង នៅថ្ងៃច័ន្ទទី៥ ខែកក្កដា ថៃបន្តរកឃើញអ្នកឆ្លងកូវីដ១៩ថ្មីចំនួនជាង
៦.០០០នាក់ទៀត ខណៈអ្នកស្លាប់មានដល់៥០នាក់។
ប្រការនេះបានធ្វើឲ្យចំនួនអ្នកឆ្លងសរុបនៅប្រទេសថៃកើនដល់ជាង ២៩ម៉ឺននាក់
និងស្លាប់សរុបជាង ២.២០០នាក់។
បើងាកមកចាប់អារម្មណ៍នឹងយុទ្ធនាការចាក់វ៉ាក់សាំងក្នុងប្រទេសថៃវិញ គេសង្កេតឃើញថាកំពុងមានសភាពយឺតយ៉ាវ ស្របពេលដែលរដ្ឋាភិបាលលោកប្រាយុទ្ធចាន់អូចា កំពុងរងការរិះគន់យ៉ាងដំណំជុំវិញបញ្ហានេះ។
រងការរិះគន់គឺដោយសារតែ វ៉ាក់សាំងចំនួន៦លានដូសដែលរំពឹង យកមកផ្គត់ផ្គង់ដល់យុទ្ធនាការចាក់វ៉ាក់សាំងចាប់ពីខែមិថុនាមកនោះ ត្រូវបានពន្យារពេលផ្តល់ឲ្យម្តងហើយម្តងទៀត។
ទន្ទឹមនឹងនេះ រដ្ឋាភិបាលថៃក៏បានសារភាពផងដែរថា ដំបូងឡើយខ្លួនគ្រោងនឹងផ្តល់ឲ្យពលរដ្ឋនូវវ៉ាក់សាំង AstraZeneca ចំនួន ១០លានដូសក្នុងកក្កដាខែនេះ ប៉ុន្តែជាក់ស្តែងគឺមានតែ ៥ទៅ៦លានដូសប៉ុណ្ណោះ ដែលនឹងដឹកមកដល់ប្រទេសថៃ ពីព្រោះថៃមានភាពយឺតយ៉ាវក្នុងការបញ្ជាទិញវ៉ាក់សាំង។
សូមបញ្ជាក់ថា គិតមកដល់បច្ចុប្បន្ន មានពលរដ្ឋថៃប្រមាណ១១%ប៉ុណ្ណោះដែលទទួលបានវ៉ាក់សាំងពីរដ្ឋាភិបាលយ៉ាងហោចណាស់មួយដូស ក្នុងនោះ មាន៤% ទទួលបានទាំងពីរដូសរួចហើយ៕
None
