សាច់ជ្រូកកើនឡើងថ្លៃនៅក្នុងប្រទេសថៃ គឺដោយសារតែមានកំណើនតម្រូវការសាច់ក្នុងស្រុក និងជាពិសេសគឺការសម្រុកនាំចេញទៅកាន់ប្រទេសជិតខាង និងប្រទេសចិន។
បើតាមប្រភពពីក្រសួងពាណិជ្ជកម្មថៃ ដែលសុំមិនបញ្ចេញឈ្មោះ បានបញ្ជាក់ថា ក្រសួងទទួលបានពាក្យតវ៉ាជាច្រើនពី សាធារណជន អំពីតម្លៃសាច់ជ្រូក បន្តកើនឡើងខ្លាំងនៅក្នុងតំបន់ជាច្រើន។
កាលពីដើមឆ្នាំ ២០២០កន្លងទៅ ក្រសួងបានចុះកិច្ចព្រមព្រៀងជាមួយក្រុមអ្នកចិញ្ចឹមជ្រូករួចហើយថា បើសិនជាតម្លៃសាច់ជ្រូក កើនឡើងលើសពី ២ដុល្លារ ៥០សេនក្នុងមួយគីឡូក្រាម នោះនឹងមានការផ្អាកការនាំចេញសាច់ជ្រូកទៅក្រៅប្រទេស ដើម្បីការពារដល់តម្លៃសាច់ជ្រូកក្នុងស្រុក។
អត្ថបទទាក់ទង!
បើតាមប្រភពដដែល បានគូសបញ្ជាក់ថា តម្លៃសាច់ជ្រូកកើនឡើងខ្លាំង ដោយសារតែ តម្រូវការប្រើប្រាស់សាច់ ចាប់ផ្តើមកើនឡើងវិញ បន្ទាប់ពីមានសកម្មភាពសេដ្ឋកិច្ចចាប់ផ្តើមដំណើរការឡើងវិញ និងការបើកដំណើរការសាលារៀនជាដើម។
លើសពីនេះទៅទៀត ការផ្គត់ផ្គង់សាច់ជ្រូក នឹងធ្លាក់ចុះដោយសារតែ គ្រោះរាំងស្ងួត ដែលប៉ះពាល់ដល់ ការលូតលាស់របស់សត្វជ្រូក និងគំរាមកំហែងដល់ជីវិតថែមទៀតផង។
បន្ថែមលើនេះ ជម្ងឺប៉េស្តជ្រូក បានរាតត្បាតនៅក្នុងប្រទេសចិន ឡាវ និងវៀតណាម ដែលធ្វើឲ្យពួកគេ ត្រូវការនាំចូលសាច់ជ្រូកយ៉ាងច្រើនសន្ធឹកសន្ធាប់ ក្នុងនោះថៃបានផ្គត់ផ្គង់ជ្រូក ចន្លោះពី ៦ពាន់ ដល់ ៨ពាន់ក្បាលក្នុងមួយថ្ងៃ ដល់ប្រទេសទាំង ៣ខាងលើនេះ។
អគ្គនាយករងនៃនាយកដ្ឋានពាណិជ្ជកម្មផ្ទៃក្នុងថៃ បានគូសបញ្ជាក់ថា ដើម្បីធានាឲ្យបាននូវការផ្គត់ផ្គង់ក្នុងស្រុកឲ្យបានគ្រប់គ្រាន់ ក្រសួងនឹងចាប់ផ្តើមធ្វើការកំណត់លើការនាំចេញ ដូចដែលធ្លាប់បានយល់ព្រមគ្នារួចហើយ កាលពីដើមឆ្នាំនេះ ហើយអាជ្ញាធរក្នុងស្រុក នឹងធ្វើការជាមួយអ្នកលក់រាយ ដើម្បីកំណត់តម្លៃអតិបរមានៃ សាច់ជ្រូកលក់រាយក្នុងស្រុក។
គួរជម្រាបដែរថា ប្រទេសថៃ មានសមត្ថភាពបង្កើតជ្រូករស់ បាន ២២លានក្បាលក្នុងមួយឆ្នាំ ហើយកាលពីឆ្នាំ ២០១៩កន្លងទៅ ថៃ បាននាំចេញជ្រូក ៥សែនក្បាល៕
None
