ថៃរំពឹងទាក់ទាញភ្ញៀវទេសចរចិន បានជាង២ម៉ឺននាក់ក្នុង១ថ្ងៃ ក្រោយការលើកលែងទិដ្ឋាការចូលជាធរមាន

លោក ស៊ីឌីវាច ឆេវារ៉ាតាណាផន (Sisdivachr Cheewarattanaporn) ប្រធានសមាគមភ្នាក់ងារទេសចរណ៍ថៃ បានវាយតម្លៃថា ទំនុកចិត្តរបស់ភ្ញៀវទេសចរចិន ក្នុងការធ្វើដំណើរមកកាន់ប្រទេសថៃត្រូវបានស្តារឡើងវិញទាំងស្រុង​នៅពីរខែដើមឆ្នាំ២០២៤នេះ។ ទោះបីជាបែបនេះក្តីអ្នកជំនាញរូបនេះយល់ឃើញថា រដ្ឋាភិបាលថៃ គួរតែបន្តយុទ្ធនាការផ្សព្វផ្សាយទេសចរណ៍ រួមជាមួយនឹងដៃគូឯកជន ដើម្បីទាក់ទាញភ្នាក់ងារទេសចរណ៍ចិន រៀបចំដំណើរទេសចរណ៍ជាក្រុម និងកម្មវិធីទាក់ទាញផ្សេងៗទៀត។

យ៉ាងណាមិញប្រធានសមាគមរូបនេះរំពឹងថា តាមរយៈគោលនយោបាយមិនគិតថ្លៃទិដ្ឋាការជាអចិន្ត្រៃយ៍រវាងប្រទេសទាំងពីរ ដែលនឹងចូលជាធរមាននាពេលឆាប់ៗខាងមុខនេះ នឹងអាចជួយទាក់ទាញភ្ញៀវទេសចរចិន លើស២ម៉ឺននាក់ ក្នុងមួយថ្ងៃនៅពេញមួយឆ្នាំ២០២៤នេះ ដែលនឹងជួយឱ្យប្រទេសថៃសម្រេចបាននូវគោលដៅនៃការស្វាគមន៍ការមកដល់របស់ភ្ញៀវទេសចរអន្តរជាតិ ប្រមាណ៤០លាននាក់ ជាមួយនឹងប្រាក់ចំណូលប្រហែលជាង៦៤ពាន់លានដុល្លារ។

សម្រាប់អ្នកជំនាញរូបនេះ ដើម្បីអាចឈានទៅសម្រេចគោលដៅនេះចំណុចសំខាន់ គឺរាជរដ្ឋាភិបាលថៃត្រូវរក្សាកម្រិតទំនុកចិត្តរបស់ភ្ញៀវទេសចរ និងត្រូវប្រាកដថា មិនមានព័ត៌មានអវិជ្ជមានណាមួយ ដែលអាចរំខានដល់ទំនុកចិត្តរបស់អ្នកទេសចរក្នុងការធ្វើដំណើរមកកាន់ប្រទេសថៃ ជាពិសេសទាក់ទងនឹងសុវត្ថិភាពតែម្តង។ ក្រៅពីវិស័យទេសចរណ៍ ថៃក៏កំពុងដាក់ចេញនូវគោលដៅក្លាយជាមជ្ឈមណ្ឌលអាកាសចរណ៍ពិភពលោកកំពូលទាំង១០ផងដែរ។

គួរបញ្ជាក់ថា កាលពីពេលថ្មីៗ លោក ស៊ីថា ថាវេស៊ីន នាយករដ្ឋមន្រ្តីថៃ បានប្រកាសថា លោកនឹងអភិវឌ្ឍន៍​ប្រទេសឱ្យក្លាយជាមជ្ឈមណ្ឌលអាកាសចរណ៍ក្នុងតំបន់នៅឆ្នាំ២០៣០ ដែលអាចផ្ទុកអ្នកដំណើរអន្តរជាតិ បានជាង១៥០លាននាក់ក្នុងមួយឆ្នាំៗ ជាមួយនឹងផែនការទំនើបកម្មអាកាសយាន្តដ្ឋានអន្តរជាតិទាំង៦ រួមទាំងសុវណ្ណភូមិ ដនមឿង និងឈៀងម៉ៃផងដែរ៕

ដោយៈ សរ សុជាតិ