សេដ្ឋកិច្ចពិភពលោកប្រឈមនឹងភាពផុយស្រួយ ខណៈកំណើនសេដ្ឋកិច្ចជារួមនឹងធ្លាក់ចុះនៅឆ្នាំ២០២៥ នេះ

តាមរយៈរបាយការណ៍របស់ Moody's ដែលជាទីភ្នាក់ងារវាយតម្លៃឥណទានហិរញ្ញវត្ថុដ៏ល្បីល្បាញនៅលើពិភពលោក ចេញផ្សាយនៅថ្ងៃទី១៣ ខែមីនា ឆ្នាំ២០២៥ បានព្យាករថា ផលិតផលក្នុងស្រុកសរុបជាសកលនឹងសម្រេចបានកំណើន២,៤% នៅក្នុងឆ្នាំ២០២៥ និងឆ្នាំ២០២៦ មានការធ្លាក់ចុះ០,៣% បើធៀបនឹងឆ្នាំ២០២៤ ដែលមានក្នុងរង្វង់២,៧%។ ស្ថាប័ននេះ អះអាងថា សេដ្ឋកិច្ចពិភពលោកកំពុងស្ថិតក្នុងភាពមិនច្បាស់លាស់ ហើយសហរដ្ឋអាម៉េរិក ដែលមានកំណើនសេដ្ឋកិច្ចល្អប្រសើរជាងដៃគូរបស់ខ្លួននៅ៣ឆ្នាំចុងក្រោយ កំពុងបង្ហាញសញ្ញានៃការធ្លាក់ចុះ ខណៈការកម្រិតទំហំបំណុលថ្មី និងការបិទរដ្ឋាភិបាលនៅអាម៉េរិក អាចបន្ថែមភាពចលាចលថែមទៀត។

​ទីភ្នាក់ងារវាយតម្លៃឥណទានអន្តរជាតិ Moody's នេះបានព្រមានថា សេដ្ឋកិច្ចពិភពលោកមើលទៅមានភាពផុយស្រួយកាន់តែខ្លាំង ដោយសារក្ដីកង្វល់សំខាន់ៗមួយចំនួនដូចជា ពន្ធគយកើនឡើងខ្ពស់ សង្គ្រាមពាណិជ្ជកម្ម ជម្លោះភូមិសាស្ត្រនយោបាយ និងការជួញដូរទីផ្សារហិរញ្ញវត្ថុរងការរង្គោះរង្គើជាដើម។

ជាមួយគ្នានេះ ប្រទេសចិន ដែលជាមហាអំណាចសេដ្ឋកិច្ចធំបំផុតទីពីរនៅពិភពលោកត្រូវបានគេរំពឹងថា នឹងឃើញកំណើន GDP ធ្លាក់ចុះមកនៅត្រឹម៤,២% នៅឆ្នាំ២០២៥ និង៣,៨% ក្នុងឆ្នាំ២០២៦ ដោយសារសម្ពាធសង្រ្គាមពាណិជ្ជកម្ម និងបញ្ហាប្រឈមរចនាសម្ព័ន្ធធ្វើឱ្យចិន កាន់តែពិបាកសម្រេចបាននូវគោលដៅកំណើនប្រកបដោយមហិច្ឆតារបស់ខ្លួន។

ទន្ទឹមនឹងនេះ កំណើនសេដ្ឋកិច្ចនៅសហភាពអឺរ៉ុប និងជប៉ុននឹងមានភាពប្រសើរឡើងបន្តិច ខណៈការស្ទុះងើបកំណើនសេដ្ឋកិច្ចឡើងវិញដោយសន្សឹមៗ និងមិនស្មើគ្នា បានជួយឱ្យពួកគេទទួលបានចំណែកដែលខាតបង់មួយចំនួនឡើងវិញ។ ចំណែកកំណើនផលិតផលក្នុងស្រុកសរុបរបស់ឥណ្ឌា នឹងរក្សាស្ថិរភាពត្រឹមតែ៦,៥% ក្នុងឆ្នាំ២០២៥ និង២០២៦ ប្រហាក់ប្រហែលនឹងឆ្នាំ២០២៤ ដែរ។

យ៉ាងណាមិញទីភ្នាក់ងារវាយតម្លៃឥណទានអន្តរជាតិ Moody's ខាងលើ បានព្រមានទៀតថា ទីផ្សារដែលកំពុងរីកចម្រើនភាគច្រើននឹងជួបការលំបាក ដោយសារការធ្វើពាណិជ្ជកម្មបានក្លាយជាក្បាលម៉ាស៊ីនមិនសូវទទួលបានទុកចិត្ត ខណៈសេដ្ឋកិច្ចទីផ្សារសំខាន់ៗមានភាពងាយរងគ្រោះដោយសារជំនួយអភិវឌ្ឍន៍របស់អាម៉េរិក (USAID) ត្រូវបានកាត់បន្ថយ៕

អត្ថបទ៖ សុខ មង្គល