ឯកឧត្តម តុប សុភ័ក រដ្ឋលេខាធិការ និងជាអ្នកនាំពាក្យនៃក្រសួងទេសចរណ៍ បានបញ្ជាក់ឱ្យដឹងថា គម្រោងកំពង់ផែទេសចរណ៍អន្តរជាតិខេត្តកំពត នៅមិនទាន់អាចបើកដំណើរការបានតាមការគ្រោងទុក ក៏ដោយសារតែ ក្រសួងពាក់ព័ន្ធត្រូវធ្វើការត្រួតពិនិត្យបន្ថែមឱ្យបានម៉ត់ចត់ទៅលើកកិច្ចការមួយចំនួនទាក់ទង នឹងស្ថានភាព សុវត្ថិភាព របស់ផ្លូវនាវាចរ ពោលគឺសិក្សាទៅលើផ្លូវទឹករបស់នាវាដែលត្រូវដឹកអ្នកដំណើរចូលមកកាន់កំពង់ផែទេសចរណ៍អន្តរជាតិខេត្តកំពតនេះ។ លើសពីនេះ គឺត្រូវសិក្សាទៅលើយន្តការនៃការគ្រប់គ្រោង លើសេវាកម្មទាំងអស់របស់កំពង់ផែទេសចរណ៍អន្តរជាតិខេត្តកំពតនេះផងដែរ។ យ៉ាងណាក៏ដោយចុះ ឯកឧត្តម តុប សុភ័ក អះអាងថា កំពង់ផែទេសចរណ៍អន្តរជាតិកំពតនេះ នឹងអាចនឹងដាក់ឱ្យដំណើរការក្នុងឆ្នាំ២០២៣នេះ។
ជាមួយគ្នានេះ ឯកឧត្តម ម៉ក់ ស៊ីដេត អគ្គនាយកដឹកជញ្ជូនផ្លូវទឹក ផ្លូវសមុទ្រ និងកំពង់ផែ បានបញ្ជាក់ឱ្យដឹងដែរថា បច្ចុប្បន្នក្រសួងសេដ្ឋកិច្ចនិងហិរញ្ញវត្ថុកំពុងឲ្យអ្នកជំនាញសិក្សាភាពជាដៃគូរវាងរដ្ឋ និងឯកជន ដើម្បីដាក់ដេញថ្លៃគម្រោងកំពង់ផែទេសចរណ៍អន្តរជាតិខេត្តកំពតនេះ ហើយបន្ទាប់ពីធ្វើការដេញថ្លៃរួចនឹងអាចដាក់កំពង់ផែទេសចរណ៍អន្តរជាតិនេះដំណើរការបានផងដែរ។
អត្ថបទគួរអាន
ឯកឧត្តម រំពឹងថា ក្រោយបើក ឱ្យដំណើរការកំពង់ផែទេសចរណ៍អន្តរជាតិនេះ ការតភ្ជាប់រវាងដីគោកទៅដីកោះ ការតភ្ជាប់ប្រទេសនៅក្នុងអនុតំបន់ និងតំបន់កាន់តែមានភាពប្រសើរឡើង សម្រាប់ភ្ញៀវទេសចរធ្វើដំណើរទស្សនា ពីកន្លែងមួយទៅកន្លែងមួយ ពីប្រទេសមួយ ទៅប្រទេសមួយទៀត ទន្ទឹមនោះសេដ្ឋកិច្ចប្រទេសនីមួយៗនឹងមានភាពរីកចំចម្រើន ហើយទំនងទំនងការទូត និងកិច្ចសហប្រតិបត្តិការក្នុងតំបន់ក៏កាន់តែល្អប្រសើរផងដែរ។
សូមជម្រាបថា គម្រោងសាងសង់កំពង់ផែទេសចរណ៍ខេត្តកំពតនេះ មានទីតាំងស្ថិតនៅក្នុងស្រុកទឹកឈូ ខេត្តកំពត ស្ថិតលើផ្ទៃដីទំហំ៤,២៥ហិកតា ដែលបានបើកការដ្ឋានសាងសង់កាលពីថ្ងៃទី ០៨ ខែសីហា ឆ្នាំ ២០១៨ និងបានបញ្ចប់ការសាងសង់ជាស្ថាពរកាលពីថ្ងៃទី៣០ ខែមិថុនា ឆ្នាំ២០២២ ដោយប្រើប្រាស់ថវិកាសាងសង់សរុបប្រមាណ ៩,២៧លានដុល្លា ក្រោមថវិកាបដិភាគរវាងធនាគារអភិវឌ្ឍន៍អាស៊ី និងរាជរដ្ឋាភិបាលកម្ពុជា។ នេះបើយោងតាមក្រសួងសាធារណការ និងដឹកជញ្ជូន៕
