ក្រុមហ៊ុន វីរៈ ប៊ុនថាំ ចាប់ដៃជាមួយកំពង់ផែទេសចរណ៍អន្តរជាតិខេត្តកំពត ដើម្បីជំរុញកំណើនភ្ញៀវទេសចរ
ក្រុមហ៊ុន វីរៈ ប៊ុនថាំ រំពឹងអាចទាក់ទាញភ្ញៀវទេសរចរជាតិ និងអន្តរជាតិបានប្រមាណ៥០ម៉ឺននាក់នៅក្នុងឆ្នាំ២០២៥ និងប្រមាណ១លាននាក់នៅក្នុងឆ្នាំ២០…
នៅចំពោះមុខសមាជិកសមាជិកាគណបក្សប្រជាជនកម្ពុជាប្រមាណ២ម៉ឺននាក់ ដែលចូលរួមកម្មវិធីអបអរខួបលើកទី៤៦ នៃទិវាជ័យជម្នះ ៧ មករា សម្តេចតេជោ ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជាបានថ្លែងថា វាល្មមដល់ពេលហើយដែលកម្ពុជាត្រូវបង្កើតឱ្យមានច្បាប់ដែលចាត់បុគ្គល ឬក្រុមណា ដែលមានគម្រោងការ ឬបង្កើតចលនាប្រឆាំងជ្រុលនិយម បង្កភាពវឹកវរ អសន្តិសុខក្នុងសង្គម និងប៉ុនប៉ងផ្តួលរំលំរដ្ឋាភិបាលស្របច្បាប់ ជាភេរវករ។
ជុំវិញគម្រោងរៀបចំច្បាប់ថ្មីនេះដែរលោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិ នៃកម្ពុជា នៃរាជបណ្ឌិត្យសភាកម្ពុជា បានបង្ហាញការគាំទ្រចំពោះគម្រោងបង្កើតឱ្យមានថ្មីខាងលើនេះ ព្រោះលោកយល់ថា ច្បាប់ថ្មីនេះបង្កើតឡើងក្នុងគោលបំណងដើម្បីការពារ និងរក្សាសុខសន្តិភាពតែប៉ុណ្ណោះ។ អ្នកជំនាញរូបនេះជឿជាក់ថា ការបកស្រាយណាមួយរបស់ច្បាប់ពីការកំណត់ព្រំដែន និងវិសាលភាពមិនបានច្បាស់នឹងនាំឱ្យមានការប្រតិកម្មជាក់ជាមិនខាន។
ដោយឡែកលោក អំ សំអាត នាយកប្រតិបត្តិអង្គការលីកាដូយល់ឃើញថា កម្ពុជាមានច្បាប់ច្រើនប្រឆាំងនឹងភេរវកម្ម ហើយគួរអនុវត្តច្បាប់ដែលមានស្រាប់ឱ្យមានប្រសិទ្ធិភាពទើបជារឿងល្អ ខណៈការបង្កើតច្បាប់នីមួយៗត្រូវសិក្សា និងពិចារណាឱ្យបានច្បាស់លាស់។
ជាមួយគ្នានេះលោក យង់ គិមអេង ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាពយល់ឃើញថា នៅក្នុងស្ថានភាពបច្នុប្បន្ន កម្ពុជាពុំទាន់មានភាពចាំបាច់ត្រូវបង្កើតច្បាប់ថ្មីនោះទេ ហើយប្រសិនបើនៅតែមានការបង្កើតច្បាប់ថ្មីមែននោះប្រាកដជាមានមតិប្រតិកម្មពីអន្តរជាតិ ហើយអាចនឹងធ្វើឱ្យបាត់បង់ឱកាសក្នុងការអភិវឌ្ឍជាតិផងដែរ។
បើតាមប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព បច្ចុប្បន្នកម្ពុជាមានច្បាប់ដែលបានអនុម័តចូលជាធរមានជាច្រើន ដែលសមស្របគ្រប់គ្រាន់ក្នុងការចាត់វិធានការ ផ្តន្ទាទោស និងការពារភាពវឹកវរ អសន្តិសុខក្នុងសង្គមយ៉ាងមានប្រសិទ្ធិភាពផងដែរ៕
អត្ថបទដោយ៖ ជា ម៉ារ៉ា,រូបភាព ឯកសារ
