លោកតេដ្រូសប្រមុខដឹកនាំ អង្គការសុខភាពពិភពលោក បានបញ្ជាក់អះអាងថា «ឆ្នាំ២០២២ ត្រូវតែជាឆ្នាំដែលយើងនឹងបិទបញ្ចប់រោគរាតត្បាតសកលមួយនេះ»។ ការប្តេជ្ញារបស់មេដឹកនាំ WHO ដូចនេះ បានធ្វើឡើង ស្របពេលដែលពិភពលោកកំពុងបន្តគំរាមកំហែងដោយកូវីដ១៩បំប្លែងខ្លួន អូមីក្រុង។ ពីមួយថ្ងៃទៅមួយថ្ងៃ អូមីក្រុងដែលមានប្រភពចេញពីអាហ្វ្រិកខាងត្បូងកាលពីជិត១ខែមុន កំពុងឆ្លងក្នុងល្បឿនលឿន និងឆ្លងខ្លាំងចូលទៅក្នុងប្រទេសកាន់តែច្រើន។ សព្វថ្ងៃនេះ អូមីក្រុងបាននិងកំពុងឆ្លងរីករាលដាលដែលភាគច្រើននៅក្នុងប្រទេសមួយចំនួន ពិសេសនៅក្នុងប្រទេសអឺរ៉ុប។
បន្ថែមពីលើនេះ ប្រធានអង្គការសុខភាពពិភពលោកបានអំពាវនាវឲ្យបង្កើនការប្រុងប្រយ័ត្ន នៅក្នុងថ្ងៃបុណ្យណូអែល និងថ្ងៃចូលឆ្នាំសកលនាពេលខាងមុខ។ អ្នកជំនាញរូបនេះបានអះអាងថា ការជួបជុំគ្នាកាន់តែច្រើនមានន័យថាចំនួនអ្នកឆ្លងកាន់តែច្រើន ចំនួនអ្នកឆ្លងកាន់តែច្រើននាំឲ្យមានអ្នកចូលមន្ទីរពេទ្យកាន់តែច្រើន ហើយអ្នកចូលមន្ទីរពេទ្យកាន់តែច្រើនអាចនាំឲ្យមានអ្នកស្លាប់កាន់តែច្រើនក៏ថាបាន។
មេដឹកនាំអង្គការសុខភាពពិភពលោក លោកតេដ្រូស បានលើកឡើងទៀតថា យើងទាំងអស់គ្នាចង់ជួបជុំគ្រួសារ និងមិត្តភក្តិ យើងទាំងអស់គ្នាចង់ត្រឡប់ទៅរកសភាពធម្មតាវិញ ប៉ុន្តែវាមិនទាន់ហួសពេលនោះទេ ប្រសិនបើយើងលើកការជួបជុំទៅពេលក្រោយនោះ។
អត្ថបទគួរអាន
សូមជម្រាបថា អង្គការសុខភាពពិភពលោក នៅតែបន្តទាមទារ ឲ្យមានការទទួលបានវ៉ាក់សាំងស្មើភាពគ្នា ពិសេសសម្រាប់ក្រុមប្រទេសក្រីក្រ ដែលកំពុងមានអត្រាចាក់វ៉ាក់សាំងទាប។ បើគេចង់បិទបញ្ចប់កូវីដ១៩ នៅឆ្នាំ ២០២២មែន គេត្រូវបិទបញ្ចប់វិសមភាពវ៉ាក់សាំង ដោយឲ្យការចាក់វ៉ាក់សាំងរបស់ប្រទេសនីមួយៗនៅទូទាំងពិភពលោក មានអត្រា ៧០% ស្មើៗគ្នា ពីពេលនេះទៅពេញមួយឆ្នាំ២០២២ នោះប្រាកដណាស់ កូវីដ១៩ នឹងអាចបិទបញ្ចប់បានហើយ៕
None
