អំឡុងកិច្ចសន្ទនាតាមទូរស័ព្ទជាមួយអធិការបតីថ្មីរបស់អាល្លឺម៉ង់ លោកស៊ី ជីនពីង ប្រធានាធិបតីចិនបានលើកឡើងថា ក្នុងនាមចិនជាមហាអំណាចសេដ្ឋកិច្ចលំដាប់លេខ២ពិភពលោក ហើយអាល្លឺម៉ង់ជាមហាអំណាចលេខ៤នោះ គួរតែយល់ច្បាស់ពីការពឹងពាក់គ្នាទៅវិញទៅមកហើយ។ ចិនជាប្រទេសដៃគូរពាណិជ្ជកម្មដ៏ធំមួយរបស់អាល្លឺម៉ង់ ហើយចិនក៏ជាទីផ្សារយានយន្តដ៏សំខាន់មួយដែរសម្រាប់ផលិតផលរថយន្តអាល្លឺម៉ង់។
លោក ស៊ី ជីន ពីង បន្តថា ប្រទេសចិនតែងតែបើកចំហប្រទេស ទទួលយកក្រុមហ៊ុនអាល្លឺម៉ង់ទាំងអស់ ព្រមទាំង ស្វាគមន៍ដើម្បីចាប់យកឱកាសវិនិយោគ។ ផ្ទុយមកវិញ ចិនសង្ឃឹមថាអាល្លឺម៉ង់នឹង ផ្តល់បរិយាកាសធុរកិច្ចល្អ ប្រកបដោយយុត្តិធម៌សម្រាប់អ្នកវិនិយោគចិនដូចគ្នា។
ដោយឡែក អធិការបតីថ្មីរបស់អាល្លឺម៉ង់ លោក អូឡាហ្វ ស្កុល ដែលទើបតែឡើងកាន់តំណែងជំនួស លោកស្រី អង់កូឡា ម៉ាកេល បាននិយាយដែរថា ប្រទេសអាល្លឺម៉ង់មានឆន្ទៈក្នុងការពង្រឹងកិច្ចសហប្រតិបត្តិការជាក់ស្តែងជាមួយប្រទេសចិនក្នុងវិស័យថាមពលបៃតង សេដ្ឋកិច្ចឌីជីថល និងសេវាកម្មជាដើម ហើយក៏សង្ឃឹមដែរថា កិច្ចព្រមព្រៀងវិនិយោគ រវាងចិន និង សហភាពអឺរ៉ុប អាចចូលជាធរមានក្នុងពេលឆាប់ៗផងដែរ។
អត្ថបទគួរអាន
គួររំឭកត្រង់នេះបន្តិចថា កិច្ចព្រមព្រៀងវិនិយោគរវាងអឺរ៉ុប និងចិន ត្រូវបានសហភាពអឺរ៉ុបផ្អាកការផ្តល់សច្ចាប័នចាប់តាំងពីខែឧសភាមកដល់ចុងឆ្នាំ២០២១នេះ ខណៈដែលកិច្ចព្រមព្រៀងខាងលើបានចំណាយពេលអស់ ៧ឆ្នាំក្នុងការចរចា។
សូមជម្រាបដែរថា ការស្កាត់ជួបជជែកគ្នាតាមទូរស័ព្ទរបស់ថ្នាក់ដឹកនាំកំពូលទាំងពីរ ធ្វើឡើងខណៈពេលដែល ចិន និងអឺរ៉ុប មិនសូវមានទំនាក់ទំនងល្អជាមួយគ្នាប៉ុន្មានទេ ចាប់តាំងពីពាក់កណ្តាលឆ្នាំ២០២១នេះមកម្ល៉េះ។ ភាគីទាំងពីរបានដាក់ទណ្ឌកម្មលើគ្នាទៅវិញទៅមក ជុំវិញបញ្ហាសិទ្ធិមនុស្សនៅតំបន់ស៊ីនជាំងប្រទេសចិន៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
