សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា កត់សម្គាល់ឃើញថា នៅប៉ុន្មានឆ្នាំចុងក្រោយតំបន់ភាគខាងត្បូង រាជធានីភ្នំពេញ មានការរីកចម្រើនយ៉ាងឆាប់រហ័ស ដែលបានប្រែក្លាយទៅជាតំបន់មួយក៏មានសក្តានុពលក្នុងការពង្រីកសកម្មភាពសេដ្ឋកិច្ចនាថ្ងៃអនាគត។ តាមរយៈការពង្រីកការតភ្ជាប់ និងការអភិវឌ្ឍជាបន្តបន្ទាប់នៅតំបន់ភាគខាងត្បូងរាជធានីភ្នំពេញនេះ បានធ្វើឱ្យសម្តេចធិបតីមានជំនៀជឿជាក់ថា នៅ២០ឆ្នាំខាងមុខតំបន់ន្លេបាទី និងភ្នំតាម៉ៅ នឹងក្លាយទៅជាជាយទីក្រុងភ្នំពេញ ដែលនឹងជំរុញឱ្យតំបន់នោះមានការអភិវឌ្ឍហេដ្ឋារចនាសម្ព័ន្ធ និងមានសក្តានុពលខ្ពស់សម្រាប់ប្រជាពលរដ្ឋរស់នៅ។
ជាមួយគ្នានេះលោកបណ្ឌិត គីម ហ៊ាង ប្រធាន KW Cambodia បានបង្ហាញការគាំទ្រ និងយល់ស្របចំពោះការវាយតម្លៃរបស់ សម្តេចធិបតី ដែលរំពឹងនៅ២០ឆ្នាំខាងមុខតំបន់ទន្លេបាទី និងភ្នំតាម៉ៅនឹងក្លាយជាជាយទីក្រុងភ្នំពេញ។ យល់ស្រប ក៏ដោយសារលោកបណ្ឌិតជឿជាក់ថា រាជរដ្ឋាភិបាលទំនងជាមានប្លង់មេក្នុងការអភិវឌ្ឍតំបន់ភាគខាងត្បូងរាជធានីភ្នំពេញនេះ។ សម្រាប់អ្នកជំនាញរូបនេះ នៅពេលតំបន់ទន្លេបាទី និងភ្នំតាម៉ៅក្លាយជាជាយក្រុងភ្នំពេញ ចង់ ឬមិនចង់វានឹងជួយជំរុញឱ្យតម្លៃដីធ្លីនៅតំបន់នោះនឹងមានការកើនឡើងមួយកម្រិតទៀត។
គួរជម្រាបថា ការឡើងរបស់សម្តេចធិបតី ហ៊ុន ម៉ាណែត ធ្វើឡើងនាពិធីបើកការដា្ឋនសាងសង់ស្ពានអាកាសភ្លោះចំណុចប្រសព្វមហាវិថី សម្ដេចតេជោ ហ៊ុន សែន និងផ្លូវជាតិលេខ២ នៅព្រឹកថ្ងៃទី១៧ ខែមិថុនា ឆ្នាំ២០២៤។ សម្តេចធិបតី បានចាត់ទុកការស្ថាបនាស្ពានអាកាសភ្លោះរវាងព្រំប្រទល់រាជធានីភ្នំពេញ និងខេត្តកណ្តាលនេះ គឺជាការគិតគូរវែងឆ្ងាយរបស់រាជរដ្ឋាភិបាល ដើម្បីដោះស្រាយបញ្ហាលំហូរចរាចរក្នុងតំបន់ភាគខាងត្បូងរាជធានីភ្នំពេញ និងដើម្បីតភ្ជាប់ទៅនឹងប្រព័ន្ធឡូជីស្ទីកនៃគម្រោងអាកាសយានដ្ឋានអន្តរជាតិតេជោ និងគម្រោង «ព្រែកជីកហ្វូណនតេជោ» ឱ្យកាន់តែមានភាពប្រទាក់ក្រឡាគ្នាសម្រាប់ជាប្រយោជន៍ជាតិ និងប្រជាជន៕
