ខាងក្រោមនេះ ជាឈ្មោះសេដ្ឋីអចលនទ្រព្យទាំង១០ និងជាអ្នកអភិវឌ្ឍន៍សាងសង់ល្បីៗ ដែលបានវិនិយោគទៅលើគម្រោងអចលនទ្រព្យធំៗជាច្រើននៅកម្ពុជា៖
១. អ្នកឧកញ៉ា ពុង ឃាវសែ ប្រធានក្រុមប្រឹក្សាភិបាលនៃធនាគារកាណាឌីយ៉ា និងក្រុមហ៊ុន OCIC
ក្រៅតែពីតួនាទីជា ប្រធានក្រុមប្រឹក្សាភិបាលនៃធនាគារកាណាឌីយ៉ា អ្នកឧកញ៉ា ពុង ឃាវសែក៏មានតួនាទីជា អគ្គនាយកក្រុមហ៊ុនវិនិយោគទុនអាណិកជនកម្ពុជា (OCIC), ប្រធានសមាគម ខែ្មរ-ចិន និងជាពិសេសជា ប្រធានសមាគមអ្នកសាងសង់កម្ពុជាផងដែរ។ អ្នកឧកញ៉ា ពុង ឃាវសែ ត្រូវបានគេស្គាល់ថា ជាអ្នកវិនិយោគ និងអភិវឌ្ឍន៍ ដ៏មានឥទ្ធិពលមួយរូបនៅកម្ពុជា ដែលលោកមានបណ្ដាញទំនាក់ទំនងច្រើនជាមួយនឹងវិនិយោគិនធំៗមកពីប្រទេសចិន។
ស្នាដៃដ៏ធំសម្បើមរបស់អ្នកឧកញ៉ា ពុង ឃាវសែ ដែលបាន និងកំពុងតែដំណើរការសាងសង់ និងអភិវឌ្ឍទៅយ៉ាងរលូននោះរួមមាន៖
- ទីក្រុងរណបកោះពេជ្រ ដែលកំពុងក្លាយជាទីក្រុងទំនើប និងមានការអភិវឌ្ឍខ្លាំងក្លាជាងគេមួយរបស់កម្ពុជា
- ទីក្រុងរណបជ្រោយចង្វារដែលកំពុងដំណើរការក្រោមទុនវិនិយោគ ១.៦០០លានដុល្លារ
- ទីក្រុងរណបកោះនរា ដែលមានតម្លៃទុនវិនិយោគប្រមាណ ២.៥០០ លានដុល្លារ បច្ចុប្បន្ន កំពុងចាក់ដី និងអភិវឌ្ឍហេដ្ឋារចនាសម្ព័ន្ធជាបណ្ដើរហើយ។
អត្ថបទទាក់ទង!
លើសពីនេះ គម្រោងធំៗចុងក្រោយគេបង្អស់ដែលយើងសង្កេតឃើញក្នុងពេលថ្មីៗនេះគឺ គម្រោងព្រលានយន្តហោះថ្មីនៅខេត្តកណ្តាល ជាមួយនឹងគម្រោងសិក្សាសាងសង់ផ្លូវអាកាសតម្លៃ ៤០០លានដុល្លារឆ្ពោះទៅ ព្រលានយន្តហោះថ្មីនេះតែម្តង។
ជាអ្នកវិនិយោគក្នុងវិស័យសំណង់អចលនទ្រព្យ អស់ពេលជាច្រើនឆ្នាំមកហើយ រួមមានមាន ការសាងសង់លំនៅដ្ឋាន អគារពាណិជ្ជកម្មទំនើបៗជាច្រើននៅកម្ពុជា អ្នកឧកញ៉ា ពុង ឃាវសែ សម្រេចបាននូវគម្រោងចលនទ្រព្យជាច្រើនរួមមាន៖ បុរីទន្លេបាសាក់ បុរីចម្ការមន បុរីវរជន អូឡាំព្យាស៊ីធី នៅជុំវិញស្តាតអូឡាំពិក សាន់វ៉េ ស៊ីធី ទួលគោក លំនៅឋានជាច្រើននៅជុំវិញផ្សារទំនើបរតនាផ្លាហ្សា និងទល់មុខព្រលានយន្តហោះអន្តរជាតិភ្នំពេញ អគារផ្សារទំនើបសូរិយា សុវណ្ណា អគារខុនដូរ… និងបុរីលំនៅឋាន នៅតាមបណ្តាខេត្តមួយចំនួន ដូចជា សៀមរាប បាត់ដំបង និងខេត្តព្រះសីហនុ ។ល។ និង ។ល។
២. អ្នកឧកញ៉ា ភាព ហៀក ប្រធានក្រុមប្រឹក្សាភិបាលក្រុមហ៊ុន Chip Mong Group
នៅប៉ុន្មានឆ្នាំចុងក្រោយនេះ ក្រុមហ៊ុនក្នុងស្រុកមួយនេះបានពង្រីកការវិនិយោគរបស់ខ្លួនលើវិស័យអចលនទ្រព្យជាច្រើនដូចជា ការសាងសង់លំនៅឋានប្រណីតៗជាច្រើនកន្លែង។ អ្វីដែល គេចាប់អារម្មណ៍ខ្លាំងបំផុត គឺនៅឆ្នាំ២០២០ កន្លងទៅ ក្រុមហ៊ុនយក្សរបស់កម្ពុជាមួយនេះ ក៏ទើបតែបានទិញយក ប្រតិបត្តិការអាជីវកម្មទាំងស្រុងរបស់ទីក្រុងរណបហ្គ្រេនភ្នំពេញផងដែរ។
ក្រៅតែពីគម្រោងលំនៅឋាន ក្រុមហ៊ុនយក្សមួយនេះក៏បាននិងកំពុងអភិវឌ្ឍនូវគម្រោងផ្សារទំនើបធំៗជាច្រើនផ្សេងទៀត ដោយក្នុងនោះផ្សារទំនើបចំនួន ២ បានដំណើរការរួចហើយ គឺ ផ្សារជីបម៉ុងណូរ៉ូម៉ល និងផ្សារជីបម៉ុងបាក់ទូក។ ដោយឡែកគម្រោងផ្សារទំនើបធំៗចំនួន ៣ គម្រោងទៀតគ្រោងនឹងបញ្ចប់ក្នុងពេលខាងមុខ។
ក្រៅតែពីផ្សារទំនើប ក្រុមហ៊ុន ជីប ម៉ុង ក៏មានវិនិយោគលើសណ្ឋាគារប្រណីត ដែលមានយីហោដ៏ល្បីពីប្រទេសផងដែរ គឺ Hyatt Regency ដែលទើបនឹងបើកដំណើរការថ្មីៗនេះផងដែរ។
៣. អ្នកឧកញ៉ា លី យ៉ុងផាត់ ប្រធានក្រុមប្រឹក្សាភិបាលក្រុមហ៊ុន លីយ៉ុងផាត់ (L.Y.P Group)
អ្នកឧកញ៉ា លី យ៉ុង ផាត់ត្រូវបានគេស្គាល់ថា ជាអ្នកពូកែវិយោគលើការសាងសង់ សណ្ឋាគារលំដាប់ផ្កាយនិង កន្លែងកំសាន្តធំៗជាច្រើនរួមមាន សណ្ឋាគារផ្កាយ ៥ និងកាស៊ីណូ ស្ថិតនៅលើបន្ទាត់ព្រំដែនខ្មែរថៃ ក្បែរច្រកព្រំដែនអន្តរជាតិ ចាំយាម, សណ្ឋាគារភ្នំពេញ លំដាប់ផ្កាយ៤ និងសណ្ឋាគារ ហ្គាឌិន ស៊ីធី (Garden City Hotel) នៅភ្នំពញ, សណ្ឋាគារ និងកាស៊ីណូ អូរស្មាច់ ខេត្តឧត្តរមានជ័យ, ក្លិបវាយកូនហ្គោល សួនសត្វ សាហ្វារី វើល ភ្នំពេញ និងសាលសម្រាប់ពិធីរៀបអាពាហ៍ពិពាហ៍ The Premier Centre សែនសុខជាដើម។
វិស័យអចលនទ្រព្យផ្សេងទៀត អ្នកឧកញ៉ា លី យ៉ុងផាត់ ក៏ល្បីល្បាញខ្លាំងណាស់ដែរ ដោយលោកឧកញ៉ាបានវិនិយោគលើទីក្រុងរណប ហ្គាឌិន ស៊ីធី។ ក្រៅពីនេះ លោកក៏មានវិនិយោគលើតំបន់សេដ្ឋកិច្ចពិសេសកោះកុង តំបន់សេដ្ឋកិច្ចពិសេស គិរីសាគរ កោះកុង ជាដើម។
ស្របពេលដែលទីផ្សារលំនៅដ្ឋានកំពុងមានសក្តានុពល ក្រុមហ៊ុន លីយ៉ុងផាត់ គ្រុប កាលពីពេលថ្មីៗនេះ បានចាប់ផ្តើមចូលមកវិនិយោគលើវិស័យអចលនទ្រព្យលំនៅឋានតាមរយៈការបោះទុនដើម្បីវិនិយោគសាងសង់បុរីមួយមានឈ្មោះថា The Premier Land។
៤. អ្នកឧកញ៉ា ហុង ពីវ ប្រធានក្រុមប្រឹក្សាភិបាលក្រុមហ៊ុនពិភពថ្មី
អ្នកកញ៉ា ហុង ពីវ ត្រូវបានប្រជាជនទូទៅស្គាល់លោក តាមរយៈការវិនិយោគលើការសាងសង់សំណង់ផ្ទះល្វែង នៃបុរីពិភពថ្មីរាប់សិបគម្រោង ដែលគិតជាផ្ទះមានចំនួន រាប់ម៉ឺនខ្នងផ្ទះ នៅក្នុងរាជធានី និងជាយក្រុងភ្នំពេញ ដូចជា បុរីពិភពថ្មី ចំការដូង, បុរីពិភពថ្មីគួរស្រួវ, បុរីពិភពថ្មីក្រុងតាខ្មៅ, បុរីពិភពថ្មីឈូកវ៉ា, បុរីពិភពថ្មីសែនសុខ, បុរីពិភពថ្មីបឹងឈូក, បុរីពិភពថ្មីកំបូល និង ផ្លូវជាតិលេខ៣។ល។
អ្វីដែលគួរឲ្យកត់សម្គាល់នោះឃើញថា រាល់គម្រោងដែលបុរីពិភពថ្មីសាងសង់ឡើងក្នុងតំបន់ណា រមែងប្រែក្លាយតំបន់នោះឲ្យមានសកម្មភាពអ៊ូអរ ប្រជាពលរដ្ឋប្រមូលផ្តុំគ្នាទៅរស់នៅច្រើន ជាលក្ខណៈសហគមន៍។ ទីផ្សារបុរីលំនៅដ្ឋានរបស់មហាសេដ្ឋីរូបនេះ គឺផ្ដោតលើចំណែកទីផ្សារភាគច្រើនអ្នកមានចំណូលមធ្យម។
អត្ថបទគួរឲ្យចាប់អារម្មណ៍!
៥. អ្នកឧកញ៉ា សៀ ឫទ្ធី ប្រធានក្រុមប្រឹក្សាភិបាលក្រុមហ៊ុន វើលប៊ី្រដ គ្រុប
អ្នកឧកញ៉ា សៀ ឫទ្ធី ត្រូវបានគេស្គាល់ច្បាស់ ជាអ្នកអភិវឌ្ឍដ៏លេចធ្លោរមួយរូប លើការសាងសង់អគារខ្ពស់ៗនៅរាជធានីភ្នំពេញ ដូចជាអគារ The Bridge កម្ពស់ ៤៥ជាន់ ដែលបច្ចុប្បន្នកំពុងបើកដំណើរការយ៉ាងសកម្ម ខណៈដែលអគារ The Peak កម្ពស់ ៥៥ជាន់ កំពុងបន្ដការសាងសង់យ៉ាងមមាញឹក និងគ្រោងបញ្ចប់ឆាប់ៗនេះ ដែលអគារទាំងពីរនេះ គឺស្ថិតនៅក្បែរគ្នាតែម្ដងនៅជាប់នឹងទីក្រុងរណបកោះពេជ្រ។
ក្រៅតែពីការអភិវឌ្ឍអគារខ្ពស់ៗ អ្នកឧកញ៉ា សៀ ឫទ្ធី ក៏មានការអភិវឌ្ឍតំបន់សេដ្ឋកិច្ចពិសេស Kerry និងគម្រោងទីក្រុងរណបសិរីមង្គល ដោយក្នុងនោះ ក៏មានគម្រោងអភិវឌ្ឍន៍លំនៅដ្ឋានតម្លៃសមរម្យសម្រាប់ប្រជាពលរដ្ឋមានប្រាក់ចំណូលមធ្យម និងក្រោមមធ្យម ពិសេសគឺមន្ត្រីរាជការតែម្ដង។ គម្រោងលំនៅឋាន លំនៅឋានទីក្រុងរណបសេរីមង្គល ស្ថិតតាមបណ្តោយផ្លូវជាតិលេខ ២១ ភូមិកោះគរ សង្កាត់រកាខ្ពស់ ក្រុងតាខ្មៅ ខេត្តកណ្តាល ក្បែរព្រលានយន្តហោះភ្នំពេញថ្មី។
អ្នកឧកញ៉ា សៀ ឫទ្ធី ក៏មានអភិវឌ្ឍគម្រោងលំនៅឋានបែបប្រណិតផងដែរ ដែលមានឈ្មោះថា The Palm មានទីតាំស្ថិតនៅតាមបណ្តោយផ្លូវជាតិលេខ១។
បើយើងនិយាយពីក្រុមហ៊ុនបុត្រសម្ព័ន្ធ ដែលមាននៅក្រោម វើលប្រ៊ីដ គ្រុប របស់អ្នកឧកញ៉ា សៀ ឫទ្ធី សរុបមានជាង ៣០ក្រុមហ៊ុនឯណោះ ដែលមកពីវិស័យរួមទាំង អចលនទ្រព្យ ហិរញ្ញវត្ថុ ហាងបញ្ចាំ និងដឹកជញ្ជូន។
សូមបញ្ជាក់ដែរថា នេះមិនមែនជាការវាយតម្លៃ ឬចាត់ថ្នាក់នោះទេ អ្វីដែល Cambonomist បានរៀបរាងឡើង គឺចង់ឲ្យប្រិយមិត្តបានស្គាល់ ពីតួអង្គសំខាន់ៗ ដែលបាននិងកំពុងបោះទុនវិនិយោគនៅក្នុងវិស័យសំណង់ និងអចលនទ្រព្យនៅកម្ពុជាតែប៉ុណ្ណោះ។ សូមប្រិយមិត្ត រង់ចាំតាមដាននូវអត្ថបទភាគទី២ ដែលផ្សាយជូនក្នុងពេលឆាប់ៗនេះ។
None
