ស្របពេលដែលអំពើហិង្សាលើបាតុករភូមាពីសំណាក់ក្រុមយោធាបន្តកើតមានជារៀងរាល់ថ្ងៃ ទណ្ឌកម្ម និងការថ្កោលទោសលើរបបសឹកភូមាក៏មានកាន់តែច្រើន។ មិនត្រឹមតែក្រុមយោធាទេដែលទទួលរងសម្ពាធ សូម្បីតែក្រុមហ៊ុនបរទេសធំៗជាច្រើនដែ លរកស៊ីនៅភូមា ក៏សុទ្ធតែបានទទួលសម្ពាធពីអង្គការក្នុង និងក្រៅស្រុក ឲ្យបញ្ឈប់ការរកស៊ីនៅភូមាជាបន្ទាន់ដោយអង្គការទាំងនោះ អះអាងថា ការបន្តអាជីវកម្មនៅភូមាក្នុងពេលបច្ចុប្បន្ន គឺជាការរួមចំណែកគាំទ្រដល់ពួកយោធា។
សារព័ត៌មាន Reuters បានចុះផ្សាយកាលពីពេលថ្មីៗ ដោយបានដកស្រង់សម្ដីពីភាគីក្រុមហ៊ុនតូតាល់បានឲ្យដឹងថា ក្រុមហ៊ុនប្រេងឥន្ធនៈនិងឧស្ម័នតូតាល់នឹងមិនបញ្ឍប់ការរកស៊ីរបស់ខ្លួនលើភូមានោះទេ ដរាបណាអាជីវកម្មរបស់ខ្លួននៅអាចបន្តប្រតិបត្តិការបានដោយសុវត្ថិភាព។
ក្រុមហ៊ុនបារាំងមួយនេះបន្តអះអាងថា ការដែលតូតាល់សម្រេចមិនដកខ្លួនពីភូមាគឺមិនមែន គោលដៅចង់រកប្រាក់ចំណេញឲ្យបានច្រើននោះទេ តែដើម្បីការពារសន្តិសុខ និងសុវត្ថិភាពនិយោជិកនិងជួយដល់ពលរដ្ឋភូមាអំឡុងពេលវិបត្តិនយោបាយ។
អត្ថបទទាក់ទង
ការលើកឡើងនេះ គឺផ្ទុយស្រឡះពីការទាមទារចង់បានរបស់ក្រុមអង្គការសិទ្ធិមនុស្សជាតិ និងអន្តរជាតិ រួមទាំងពលរដ្ឋភូមាផង ដែលពួកគេចាត់ទុកការការបន្តរកស៊ីរបស់តូតាល់ថាជាការជួយឧបត្ថម្ភគាំទ្រដល់របបសឹកតាមរយៈការបង់ពន្ធ។
ចុះហេតុអ្វីបានជាភាគីក្រុមហ៊ុនតូតាល់ ចាត់ទុកការរកស៊ីរបស់ខ្លួន ជាការជួយពលរដ្ឋភូមាទៅវិញ?
មែនទែនទៅ ក្រុមហ៊ុនតូតាល់នៅភូមាមិនត្រឹមតែរកស៊ីខាងប្រេងឥន្ធនៈនោះទេ តូតាល់ក៏រកស៊ីក្នុងវិស័យហ្គាស និងឧស្ម័នផងដែរ។ ប្រសិនបើតូតាល់ដកខ្លួន លែងបូមហ្គាស ដើម្បីផលិតជាអគ្គិសនីនៅភូមាមែននោះ ប្រជាជនជាង៥លាននាក់នៅ រដ្ឋធានីរ៉ង់ហ្គូន នឹងគ្មានភ្លើងអគ្គិសនីប្រើប្រាស់។
បន្តការរកស៊ីបានន័យថាបន្តបង់ពន្ធឲ្យយោធាភូមា នេះមិនហៅថាជាការគាំទ្រដល់របបសឹកទេឬ?
ពិតណាស់ដែលថា ក្រុមហ៊ុនដ៏ធំរបស់បារាំងនេះត្រូវបង់ពន្ធចូលរដ្ឋភូមាជាច្រើនរយលានដុល្លារក្នុងមួយឆ្នាំៗ សម្រាប់ការធ្វើអាជីវកម្មប្រេង និងឧស្ម័នរបស់ខ្លួន។ ប៉ុន្តែ តូតាល់បានអះអាងឆ្លើយតបទៅនឹងសំណួរខាងលើវិញថា គិតចាប់ពីមានរដ្ឋប្រហារយោធាថ្ងៃទី១កុម្ភៈមក ក្រុមហ៊ុនតូតាល់មិនទាន់បានបង់ពន្ធឲ្យរបបសឹកម្តងនៅឡើយទេ ដោយមួយខែៗក្រុមហ៊ុននេះ ត្រូវបង់ពន្ធចូលរដ្ឋភូមាប្រហែល៤លានដុល្លារអាមេរិក។ លើសពីនេះទៀត ក្រុមហ៊ុនថែមទាំងបានសន្យាថា នឹងបង្វិលសាច់ប្រាក់ទាំងនេះ ទៅឲ្យក្រុមអង្គការដែលការពារសិទ្ធិមនុស្សនៅភូមាវិញ ទុកជាការគាំទ្រ។
សូមបញ្ជាក់ថា ក្រុមហ៊ុនតូតាល់ធ្លាប់បានបង់ប្រាក់ ២៣០លានដុល្លារទៅឲ្យអាជ្ញាធរភូមាសម្រាប់ថ្លៃពន្ធ កាលពីឆ្នាំ២០១៩ និងចំនួន១៧៦លានដុល្លារកាលពីឆ្នាំ២០២០កន្លងទៅ គ្រាភូមាស្ថិតក្រោមការគ្រប់គ្រងដោយរដ្ឋាភិបាលស៊ីវិលរបស់លោកស្រី អ៊ុងសាន្តស៊ូជី៕
None
