ជាក់ស្ដែង តំបន់ភាគខាងត្បូងឈៀងខាងលិច រាជធានីភ្នំពេញ ដែលស្ថិតនៅភាគខាងត្បូងផ្សារទួលពង្រ សង្កាត់ព្រៃស ខណ្ឌដង្កោ ដែលធ្លាប់តែជាតំបន់សម្បូរទៅដោយបឹង និងជាតំបន់មួយប្រជុំទៅដោយរោងចក្រនោះ បច្ចុប្បន្ន តំបន់នេះបាននិងកំពុងក្លាយជាទិសដៅសំខាន់មួយសម្រាប់អ្នកអភិវឌ្ឍអចលនទ្រព្យ ពិសេស អ្នកវិនិយោគសាងសង់បុរីលំនៅដ្ឋានតែម្ដង។
លោក សាំង វាសនា នាយកប្រតិបត្តិក្រុមហ៊ុនសាងសង់ផ្ទះល្វែង TV Star ដែលទើបតែបើកសម្ពោធគម្រោងលំនៅដ្ឋានទី៣របស់ខ្លួន ជាមួយនឹងទឹកប្រាក់វិនិយោគសរុបជិត ១០លានដុល្លារ លើផ្ទៃដីជិត២ហិកតា នៅតំបន់ភាគខាងត្បូងផ្សារទួលពង្រនេះ បានលើកឡើងថា ជាការពិតណាស់ កាលពី១ឆ្នាំ ឬ២ឆ្នាំមុន តំបន់នេះគឺហាក់មានភាពស្ងប់ស្ងាត់ មិនសូវមានគម្រោងធំៗចូលមកអភិវឌ្ឍច្រើននោះទេ។ ប៉ុន្ដែ បច្ចុប្បន្ន តំបន់ភាគខាងត្បូងផ្សារទួលពង្រនេះកំពុងទាក់ទាញអ្នកវិនិយោគសាងសង់លំនៅដ្ឋានកាន់តែច្រើនឡើងៗ ដោយសារតែតំបន់នេះមានប្រព័ន្ធផ្លូវប្រទាក់ក្រឡាគ្នាយ៉ាងល្អសម្រាប់ការធ្វើដំណើរចេញចូលរាជធានីភ្នំពេញ និងបណ្ដាខេត្តមួយចំនួនផងដែរ។
លោកបន្ថែមទៀតថា មិនលើសពី២ឆ្នាំនោះទេ តំបន់នេះនឹងមានប្រជាជនចូលមករស់នៅកាន់តែច្រើន និងមានគម្រោងអភិវឌ្ឍធំៗជាច្រើនទៀត នឹងចូលមកអភិវឌ្ឍជាបន្តបន្ទាប់។
តើអ្នកបានអានអត្ថបទនេះ ឬនៅ?
ការចូលរួមចំណែកក្នុងការពង្រីកទិសដៅអភិវឌ្ឍនៅតំបន់ជាយរាជធានីភ្នំពេញនេះ ក៏ស្ថិតនៅក្រោមគម្រោងអភិវឌ្ឍរបស់រាជរដ្ឋាភិបាលកម្ពុជា ក្នុងការពង្រីកសក្ដានុពលអភិវឌ្ឍន៍រាជធានីភ្នំពេញ និងបញ្ជៀសការកកស្ទះចរាចរណ៍នៅតំបន់កណ្ដាលរាជធានីភ្នំពេញផងដែរ។
ឯកឧត្តម មាន ចាន់យ៉ាដា អភិបាលរងនៃគណៈអភិបាលរាជធានីភ្នំពេញ ធ្លាប់បានគូសបញ្ជាក់ដែរថា គិតមកទល់ពេលនេះ ផ្ទៃដីរាជធានីភ្នំពេញបានរីកធំគួរឲ្យកត់សម្គាល់ ពោលគឺមានទំហំផ្ទៃដីសរុបជិត៧០០គីឡូម៉ែត្រការ៉េ។ ក្នុងនោះដែរ វិស័យសំណង់និងអចលនទ្រព្យនៅកម្ពុជាបាននិងកំពុងពង្រីកសក្ដានុពលរបស់ខ្លួនកាន់តែខ្លាំងឡើងៗ តួយ៉ាង ការរីកកើនឡើងនៃអគារពាណិជ្ជកម្ម អគារស្នាក់នៅរួម អគារខុនដូប្រណីត ដែលកំពុងសាងសង់ឡើងជាបន្តបន្ទាប់។
គិតមកទល់ពេលនេះ សំណង់បុរីលំនៅដ្ឋាននៅរាជធានីភ្នំពេញ មានចំនួន ១៨៨កន្លែង និងអគារខ្ពស់ៗមាន ៩៧៩អគារ។ ហើយបើគិតត្រឹម៩ខែឆ្នាំនេះ រាជធានីភ្នំពេញទទួលបានគម្រោងសាងសង់ចំនួន៧៧៧គម្រោង ដែលមានទុនវិនិយោគសរុបប្រមាណជាង ១ពាន់៥០០លានដុល្លារអាមេរិក។
តើអ្នកបានអានអត្ថបទនេះឬនៅ?
ជាមួយគ្នានេះដែរ លោកឧកញ៉ា នួន រិទ្ធី ប្រធានក្រុមហ៊ុនអចលនទ្រព្យ KFA បានលើកឡើងថា នៅឆ្នាំ២០១៧នេះ វិស័យអចលនទ្រព្យនៅតែមានកំណើនល្អ ពិសេស លោកកត់សម្គាល់ឃើញថា ការអភិវឌ្ឍលំនៅដ្ឋាននៅតំបន់ជាយរាជធានីភ្នំពេញ គឺមានការកើនឡើងច្រើនគួរឲ្យកត់សម្គាល់។ តួយ៉ាង នៅតំបន់ភាគខាងត្បូងផ្សារទួលពង្រនេះ គឺជាតំបន់មួយកំពុងមានសក្ដានុពល ដោយសារតែវាមានប្រព័ន្ធផ្លូវខ្វាត់ខ្វែង និងបណ្ដុំទីប្រជុំជន ពិសេសគឺរោងចក្រតែម្ដង។
លោកបន្ថែមថា តម្លៃដីក្នុងតំបន់នេះ ក៏មានការកើនឡើងគួរឲ្យកត់សម្គាល់ដែរ ពោលគឺនៅតាមបណ្ដោយផ្លូវធំអាចមានតម្លៃចាប់ពី ៣៥០ដុល្លារ ដល់ ៤៥០ដុល្លារ ក្នុងមួយម៉ែត្រការ៉េ ខណៈដែលដីនៅផ្លូវក្នុងអាចមានតម្លៃចាប់ពី ២០០ ទៅ ៣០០ដុល្លារ ក្នុងមួយម៉ែត្រការ៉េ។
លោកឧកញ៉ា នួន រិទ្ធី បានគូសបញ្ជាប់ទៀតថា ត្បិតថា ឆ្នាំ២០១៨ ជាពេលវេលាបោះឆ្នោតជាតិ កាន់តែកៀកមកដល់ក៏ដោយក្ដី ប៉ុន្ដែ លោកសង្កេតឃើញថា អ្នកវិនិយោគនៅតែមានទំនុកចិត្តលើទីផ្សារអចលនទ្រព្យនៅកម្ពុជា ពោលគឺការបន្ថែមទុនវិនិយោគលើគម្រោងថ្មីៗនៅតែបន្ដកើនឡើងជាបន្តបន្ទាប់៕
None
