ទីផ្សារប្រេងឆៅនៅអង់គ្លេស សម្រាប់កិច្ចសន្យាលក់សម្រាប់ខែឧសភា មានការកើនឡើងដល់ទៅ ២៣សេនបន្ថែមទៀត ធ្វើឲ្យតម្លៃប្រេងក្នុង១ធុងបារ៉ែលកើនដល់ ៦៩ដុល្លារ៤៥សេន ខណៈដែលទីផ្សារប្រេងឆៅនៅអាមេរិកវិញ សម្រាប់កិច្ចសន្យាលក់នៅខែមេសា មានតម្លៃដល់ទៅ ៦៥ដុល្លារ ៩០សេនក្នុងមួយធុងបារ៉ែល កើនខ្ពស់ជាងមុន២៩សេន។
ប្រភពពី Reuters បានឲ្យដឹងថា ប្រទេសកំពូលអ្នកនាំចេញប្រេង អារ៉ាប់ប៊ី ស៊ាអូឌីត បានកាត់បន្ថយការផ្គត់ផ្គង់សម្រាប់ខែមេសាខាងមុខនេះ សម្រាប់អ្នកទិញនៅអាស៊ីខាងជើង យ៉ាងតិចដល់ទៅ ១៥%។
អត្ថបទទាក់ទង
ការកាត់បន្ថយការផ្គត់ផ្គង់ បន្ទាប់ពីអង្គការប្រទេសអ្នកនាំចេញប្រេង OPEC និងសម្ព័ន្ធមិត្ត បានសម្រេចចិត្ត កាលពីដើមខែនេះ ក្នុងការបន្ដការកាត់បន្ថយការផ្គត់ផ្គត់ប្រេង រហូតដល់ខែមេសាខាងមុខ។
ជាមួយគ្នានេះដែរ វិនិយោគិន កំពុងមានក្ដីរំពឹងខ្ពស់ ចំពោះប្រទេសចិនដែលកំពុងបង្ហាញពីសញ្ញាសេដ្ឋកិច្ចវិជ្ជមាន ដ្បិតថាប្រទេសចិនគឺជាអ្នកប្រើប្រាស់ប្រេងធំបំផុតទី២ក្នុងពិភពលោក។
ដោយឡែក នៅសហរដ្ឋអាមេរិកវិញ សមត្ថភាពចម្រាញ់ប្រេងប្រចាំសប្ដាហ៍មានការកើនឡើង១លាន៦សែនបារ៉ែលក្នុងមួយថ្ងៃ នៅពេលដែលរោងចក្រជាច្រើនបានចាប់ផ្ដើមប្រតិបត្តិការឡើងវិញបន្ទាប់ពីមានការដាច់ចរន្ដអគ្គិសនីនៅអំឡុងព្យុះរដូវរងារនៅក្នុងរដ្ឋតិចសាស់កាលពីខែមុន។ នេះបើតាមការអះអាងរបស់ក្រុមហ៊ុន ស្រាវជ្រាវ IIR Energy ៕
None
