នាយកប្រតិបត្តិទីភ្នាក់ងារថាមពលអន្តរជាតិ (IEA) លោក Fatih Birol និងរដ្ឋមន្ត្រីក្រសួងថាមពលសហរដ្ឋអាមេរិកលោកស្រី Jennifer Granholm បាននិយាយថា វិបត្តិថាមពលបច្ចុប្បន្នកើតឡើងចេញពីការដាក់ទណ្ឌកម្មរបស់លោកខាងលិចលើប្រទេសរុស្ស៊ី ដែលបានហ៊ុមព័ទ្ធការនាំចេញប្រេងរបស់ទីក្រុងម៉ូស្គូ ដើម្បីកាត់បន្ថយចំណូលរបស់ប្រទេសនេះ ដែលយកទៅឧបត្ថមដល់សង្គ្រាមនៅអ៊ុយក្រែន ខណៈប្រទេសក្នុងតំបន់ឥណ្ឌូប៉ាស៊ីហ្វិក គួរតែចូលរួមផ្តោតការយកចិត្តទុកដាក់បន្ថែមទៀតលើការផ្លាស់ប្តូរ ដោយមិនប្រើឥន្ធនៈហ្វូស៊ីលពីប្រទេសរុស្ស៊ី។ ទីភ្នាក់ងារថាមពលអន្តរជាតិធ្វើជាម្ចាស់ផ្ទះ ក៏បានទទូចឱ្យប្រទេសក្នុងតំបន់អាស៊ីងាកចេញពីការពឹងផ្អែកលើប្រទេសចិនសម្រាប់បច្ចេកវិទ្យាថាមពលពន្លឺព្រះអាទិត្យ និងបណ្តាប្រទេសដូចជាសាធារណរដ្ឋប្រជាធិបតេយ្យកុងហ្គោ និង រុស្ស៊ីសម្រាប់សារធាតុរ៉ែសំខាន់ៗដែលត្រូវការសម្រាប់រថយន្តអគ្គិសនី និងអាគុយជាដើម។
នាយកប្រតិបត្តិទីភ្នាក់ងារថាមពលអន្តរជាតិលោក Birol បាននិយាយថា ប្រទេសចិនមានចំណែក ៨០% នៃខ្សែចង្វាក់ផ្គត់ផ្គង់សកលនៃបច្ចេកវិទ្យាថាមពលព្រះអាទិត្យ ហើយនៅឆ្នាំ ២០២៥ នឹងមានការកើនឡើងដល់ ៩៥% ។ លោកស្រី Granholm រដ្ឋមន្ត្រីក្រសួងថាមពលអាមេរិក បាននិយាយនៅឯវេទិកាថាមពលទីក្រុងស៊ីដនីថា ប្រជាជាតិទាំងអស់ត្រូវតែប្រាដកថា មិននៅក្រោមការបញ្ជារបស់មេដឹកនាំផ្តាច់ការ ដែលចង់គ្រប់គ្រងយុទ្ធសាស្ត្រនៃខ្សែចង្វាក់ផ្គត់ផ្គង់សកលនោះទេ។ ទាំងលោក Birol និងលោកស្រី Granholm បាននិយាយស្រដៀងថា ការពឹងផ្អែកលើប្រទេសតែមួយសម្រាប់បច្ចេកវិទ្យា ឬ ប្រេងឥន្ធនៈ គួតែជៀសវាង ដោយមានប្រទេសរុស្ស៊ីជាមេរៀនស្រាប់ ខណៈពេលដែលបាត់បង់ការផ្គត់ផ្គង់ថាមពលពីប្រទេសរុស្ស៊ី តម្លៃថាមពលសកលមានការប្រែប្រួលជាខ្លាំង។
អត្ថបទគួរអាន
លោកស្រី Granholm បានប្រាប់អ្នកយកព័ត៌មាននៅក្រៅវេទិកាថា ប្រសិនបើតំបន់អាស៊ីមិនអភិវឌ្ឍខ្សែចង្វាក់ផ្គត់ផ្គង់របស់ខ្លួនទេ លោកស្រីបារម្ភថាប្រទេសចិនអាចនឹងដើរតួនាទីយ៉ាងសំខាន់នៃបណ្តាញបច្ចេកវិទ្យា និង ការផ្គត់ផ្គង់ដែលអាចធ្វើឱ្យប្រទេសក្នុងតំបន់នេះងាយរងគ្រោះ។ លោកស្រីបាននិយាយថា តាមទស្សនៈនៃសន្តិសុខថាមពល វាគឺជាការចាំបាច់ដែលប្រទេសមានសេដ្ឋកិច្ចរីកចម្រើនត្រូវ អភិវឌ្ឍខ្សែចង្វាក់ផ្គត់ផ្គង់ មិនត្រឹមតែសម្រាប់អាកាសធាតុប៉ុណ្ណោះទេ ប៉ុន្តែសម្រាប់សន្តិសុខថាមពលផ្ទាល់តែម្តង៕
None
